រាជធានីភ្នំពេញ ៖ បុរសម្នាក់ស្រវឹងធ្លាក់ភ្នែកបើករថយន្តហាយឡែនឌ័រមួយគ្រឿងបញ្ច្រាសទិសដៅចរាចរណ៍ក្នុងល្បឿនបោះពួយយ៉ាងលឿនទៅបុករថយន្តមួយគ្រឿងទៀតបង្កឲ្យមានការភ្ញាក់ផ្អើលឡើងកាលពីវេលាម៉ោង៩នឹង៥០នាទីយប់ ថ្ងៃទី២៧ ខែធ្នូ ឆ្នាំ២០១៧ត្រង់ចំណុចខាងមុខក្រសួងការពារជាតិ តាមបណ្តោយផ្លូវសហព័ន្ធរុស្ស៊ី ស្ថិតក្នុងសង្កាត់មនោរម្យ ខណ្ឌ៧មករា ។
រថយន្តបង្កម៉ាកហាយឡែនឌ័រ ពណ៌ទឹកប្រាក់ ពាក់ស្លាកលេខ ភ្នំពេញ ២J-៧៥៧៦ បើកបរដោយបុរសម្នាក់ឈ្មោះ ហុង សៅពិសិដ្ធ ភេទប្រុស អាយុ២២ឆ្នាំ ស្នាក់នៅភូមិត្រពាំងឈូក សង្កាត់ទឹកថ្លា ខណ្ឌសែនសុខ ។ ចំណែកឯរថយន្តរងគ្រោះជារថយន្តរបស់ក្រុមហ៊ុនចាប់សត្វល្អិត JAMSON ពណ៌ស្ករ ពាក់ស្លាកលេខ ភ្នំពេញ ២AJ-០១៧៥ បើកបរដោយបុរសបីនាក់ ។
តាមប្រភពព័ត៌មានពីកន្លែងកើតហេតុបានឲ្យដឹងថា នៅមុនពេលកើតហេតុគេឃើញរថយន្តរងគ្រោះខាងលើដឹកអង្គុបកណ្តុរចេញមកពីក្រុមហ៊ុននៅម្តុំស្តុបទេពផនបំណងបើកទៅចាប់កណ្តុរឱ្យគេនៅម្តុំត្រើយម្ខាងដោយធ្វើដំណើរតាមសហព័ន្ធរុស្ស៊ីក្នុងទិសដៅពីលិចទៅកើត និងក្នុងល្បឿនលឿន ។
លុះដល់ចំណុចកើតហេតុស្រាប់តែមានរថយន្តបង្កខាងលើបើកបរដោយក្នុងស្ថានភាពស្រវឹងជោកជាំហើយបើកបញ្ច្រាសទិសដៅចរាចរណ៍ទៅបុករថយន្តខាងលើចំហៀងខាងឆ្វេងពេញទំហឹងបណ្តាលឱ្យរថយន្តរងគ្រោះដាច់កាឡេកង់ខាងមុខចំហៀងខាងឆ្វេង ។
ចំណែកឯរថយន្តបង្ករងការខូចខាតបែកចង្កៀង និងដាច់កាឡេកង់ខាងមុខចំហៀងខាងឆ្វេង រីឯអ្នកបើកបររថយន្តបង្កដោយសារតែស្រវឹងខ្លាំងពេកក៏បានសន្លប់បែកពពុះមាត់ត្រូវបានរថយន្តសង្គ្រោះបន្ទាន់ដឹកទៅសង្គ្រោះនៅគ្លីនិកឯកជន ។
ក្រោយកើតហេតុសមត្ថកិច្ចមូលដ្ឋាននិងសមត្ថកិច្ចជំនាញបានចុះមកដល់នឹងបានធ្វើការវាស់វែងយករថយន្តទាំងពីរទៅរក្សាទុកនៅការិយាល័យចរាចរណ៍ផ្លូវគោករាជធានីភ្នំពេញរងចាំដោះស្រាយគ្នានៅពេលក្រោយ ៕
ចែករំលែកព័តមាននេះ