រាជធានីភ្នំពេញ ៖ ជាមួយកិត្តិយសជាម្ចាស់ពានរង្វាន់អ្នកដឹកនាំរឿងឆ្នើម ពីមហោស្រពភាពយន្តខ្មែរលើកទី៥ អ្នកដឹកនាំរឿងលោកពេជ្រ វិចិត្រ រីករាយពន់ពេក ហើយចាត់ទុកថាការទទួលបានពានរង្វាន់នេះ ដោយសារប្រទេសមិនមានសង្គ្រាម ព្រោះបើមានសង្គ្រាមមិនអាចផលិតភាពយន្តបានឡើយ…
រាជធានីភ្នំពេញ ៖ ជាមួយកិត្តិយសជាម្ចាស់ពានរង្វាន់អ្នកដឹកនាំរឿងឆ្នើម ពីមហោស្រពភាពយន្តខ្មែរលើកទី៥ អ្នកដឹកនាំរឿងលោកពេជ្រ វិចិត្រ រីករាយពន់ពេក ហើយចាត់ទុកថាការទទួលបានពានរង្វាន់នេះ ដោយសារប្រទេសមិនមានសង្គ្រាម ព្រោះបើមានសង្គ្រាមមិនអាចផលិតភាពយន្តបានឡើយ ។
លោកជុំ វិចិត្រជាម្ចាស់ជ័យលាភីអ្នកដឹកនាំរឿងឆ្នើម (Best Director) ឆ្នាំ២០១៧ សម្រាប់ស្នាដៃដឹកនាំរឿងរបស់ផលិតកម្មមហាហង្ស ។ លោកនិយាយទាំងរំភើបអួលដើមកទៅកាន់អ្នកគាំទ្រ ពិសេសគោរពដឹងគុណប្រមុខដឹកនាំប្រទេស ដែលដឹកនាំប្រទេសប្រកបដោយសុខសន្តិភាព ។ សមិទ្ធផលដែលលោកសម្រេចបាននេះមិនមែនជាការចៃដន្យទេ គឺកើតចេញពីការប្រឹងប្រែង និងការលើកទឹកចិត្ត ។
លោកថ្លែងថា «អ្វីដែលខ្ញុំខំប្រឹងប្រែង និងព្យាយាមតស៊ូធ្វើការងារក្នុងអាជីពជាអ្នកដឹកនាំរឿងនេះ គឺធ្វើដោយក្តីស្រឡាញ់ ទោះជាដឹងថាអាជីពមួយនេះមិនបានធ្វើឱ្យខ្លួនឯងមានបាន មានទ្រនំ មានរថយន្តទំនើប ក៏មិនបានបោះបង់ក៏ព្រោះតែបេះដូងមួយនេះមិនអាចខ្វះបាន ។
សម្រាប់ពានរង្វាន់ជាអ្នកដឹកនាំឆ្នើមមួយនេះ ក៏មិនដែលគិតស្រមៃថាខ្លួនឯងនឹងទទួលបានដែរ តែពេលដែលទទួលបានពានរង្វាន់មួយនេះរំភើបចិត្តនិយាយមិនចេញ ឈរញរ័ជើង តែអ្វីដែលនឹកដល់នោះ គឺសន្តិភាព ! បើប្រទេសជាតិគ្មានសន្តិភាពយើងទាំងអស់គ្នាក៏គ្មានថ្ងៃនេះ ហើយខ្ញុំក៏មិនមានឱកាសក្លាយជាអ្នកដឹកនាំរឿង និងទទួលបានពានរង្វាន់ជាអ្នកដឹកនាំរឿងឆ្នើម ក្នុងមហោស្រពភាពយន្តជាតិលើកទី៥នេះដែរ ។ អរគុណលោកពុកសម្រាប់សន្តិភាពមួយនេះ »។
លោកជុំ វិចិត្រ បង្ហាញបំណងចង់ផលិតភាពយន្តខ្មែរឱ្យបានល្អជាងនេះ ចង់ឱ្យកុនខ្មែរយើងមានលក្ខណៈល្អដូចប្រទេសជិតខាង បរទេសទទួលយកបាន ។ ទាំងនេះជាអ្វីដែលលោកបានតាំងចិត្តចំពោះជំនាញដែលមាន ។
លោកជុំ វិចិត្រ បានចូលប្រឡូកក្នុងអាជីពផលិតភាពយន្តអស់រយៈពេល១០ឆ្នាំមកហើយផ្តើមចេញពីអាជីពជាអ្នកចាត់ការទូទៅនៅផលិតកម្ម FCI ។ ពីមួយឆ្នាំទៅមួយឆ្នាំលោកចាប់ផ្តើមឈ្វេងយល់ពីសិល្បៈភាពយន្ត តាមរយៈការណែនាំបង្ហាញពីផលិតករជើងចាស់ និងតាមរយៈការសិក្សាស្រាវជ្រាវជាមួយឯកសារបរទេសជាច្រើន ។
លោកជុំ វិចិត្រ មានស្នាដៃភាពយន្តប្រមាណជាង២០រឿងដែលលោកដឹកនាំសម្តែង ។ ភាពយន្តចំនួន១០ដែលទស្សនិកជនស្គាល់ច្រើន មានដូចជារឿង«ម៉ែដោះក្រមុំ» រឿង «បំពេព្រលឹង» និងរឿង«ស៊ុបពើម៉ាំ» ជាដើម។ ផលិតករមានប្រភពកំណើតពីខេត្តបាត់ដំបងរូបនេះទើបបញ្ចប់ការដឹកនាំផលិតភាពយន្តខ្នាតធំរឿង«ក្រមុំចាស់ប៉ះក្មេងស្ទាវ» ។ លើសពីនេះទើបតែចាប់ផ្តើមផលិតភាពយន្តថ្មីមួយទៀតរឿង«ផ្ទះចុងភូមិ»របស់ផលិតកម្មមហាហង្ស ។
លោកជុំ វិចិត្រ តាំងចិត្តខិតខំប្រឹងប្រែងលើវិស័យភាពយន្តទៅមុខទៀត បើទោះបីជាជួបបញ្ហាយ៉ាងណាក៏ដោយ ៕
ចែករំលែកព័តមាននេះ