រាជធានីភ្នំពេញ ៖ ប្រធានអង្គភាពប្រឆាំងអំពើពុករលួយបានអះអាងថា ករណីបក្សពួកនិយម មិនមែនជាបទល្មើសអំពើពុករលួយ ឬទោសព្រហ្មទណ្ឌនោះទេ ។
លោកបានថ្លែងដូចនេះនៅក្នុងសិក្ខាសាលា ស្ដីពីអ្នកសារព័ត៌មាន និងការប្រយុទ្ធប្រឆាំងអំពើពុករលួយ ដែលរៀបចំឡើងនៅអង្គភាពប្រឆាំងអំពើពុករលួយ នាថ្ងៃទី២៥ ខែធ្នូ ម្សិលមិញ ។
លោក ឱម យ៉ិនទៀង ប្រធានអង្គភាពរូបនេះបន្ដថា កន្លងមក មានមហាជនមួយចំនួនតែងលើកឡើងថា បក្សពួកនិយមនៅក្នុងស្ថាប័នរដ្ឋគឺជាអំពើពុករលួយដែលពួកគេទាមទារឱ្យអង្គភាពប្រឆាំងអំពើពុករលួយចាត់វិធានការចំពោះករណីនេះ ។
លោកបានបញ្ជាក់ថា ៖« មានការលើកឡើងថា បក្សពួកនិយម បងប្អូននិយម គ្រួសារនិយមជាអំពើពុករលួយ អាហ្នឹងដាក់កូនគាត់ធ្វើនៅ ខុទ្ទកាល័យ… អត់មានច្បាប់ណាចែងថា ជាអំពើពុករលួយទេ » ។
លោកបន្តថា ប្រសិនបើមន្ត្រីរដ្ឋាភិបាល ឬស្ថានប័នណាមួយដាក់បញ្ចូលបងប្អូន ឬគ្រួសារ របស់ខ្លួន ឱ្យមានតួនាទីសំខាន់ណាមួយក្នុងស្ថាប័ន បានត្រឹមស្នើសុំឱ្យដកចេញតែប៉ុណ្ណោះ តែពួកគេនឹងមិនជាប់ទោសក្នុងអំពើពុករលួយ ឬច្បាប់ព្រហ្មទណ្ឌឡើយ ។
ប៉ុន្តែករណីបទល្មើសបក្សនិយមដែលអាចឱ្យអង្គភាពប្រឆាំងអំពើពុករលួយចាត់វិធានការបានគឺ នៅក្នុងបទដេញថ្លៃតែមួយប៉ុណ្ណោះ ។ ប្រសិនបើមានការឃុបឃិតដេញថ្លៃឱ្យបក្សពួករបស់ខ្លួន អង្គភាពប្រឆាំងអំពើពុករលួយនឹងចាត់វិធានការតាមផ្លូវច្បាប់ ។
លោកបានបញ្ជាក់យ៉ាងដូចនេះថា ៖« ដេញថ្លៃ ប្រសិនបើឱ្យកូនឯង សាច់ញាតិខ្លួនឯង ឱ្យមិត្តភក្តិជិតដិតខ្លួនឯង អីចឹង ច្បាប់បក្សពួកនិយមនេះ មានតែនៅក្នុងករណីដេញថ្លៃតែមួយគត់ ក្រៅពីនេះ ដេញថ្លៃអត់មានជាប់បក្សពួកនិយមទេ » ៕
ចែករំលែកព័តមាននេះ