ទីក្រុងឡុងដ៍ ៖ ការព្រួយបារម្ភពីមនុស្សយន្តបានកើតឡើង ដោយមនុស្សគិតថា ការងារកាន់តែច្រើនចាប់ផ្តើមធ្វើដោយស្វ័យប្រវត្តិ ដែលធ្វើឲ្យការងារសម្រាប់មនុស្សមានកាន់តែតិច ។ ឧទាហរណ៍ ប្រសិនបើរថយន្ត និងនាវាដឹកទំនិញ អាចបើកបរដោយខ្លួនឯងបាន តើអ្នកបើកបរ ឬអ្នករត់តាក់ស៊ី នឹងធ្វើដូចម្តេច ?
ទស្សនៈសេដ្ឋកិច្ចនឹងប្រាប់ថា ការប្រើប្រាស់ម៉ាស៊ីនជាមួយពលករ នឹងបង្កើនទិន្នផលការងារ ហើយពេលនោះពួកគេនឹងមានជម្រើសថា តើគួរតែធ្វើការតិចជាងមុន ខណៈមានប្រាក់បៀវត្សរ៍ដដែល ឬធ្វើការដដែល ប៉ុន្តែទទួលបានប្រាក់បៀវត្សរ៍ច្រើនជាងមុន ។
ជាមួយគ្នានេះ តម្លៃផលិតផលនឹងធ្លាក់ចុះ អតិថិជននឹងមានប្រាក់កាន់តែច្រើនដើម្បីចំណាយលើផលិតផលដដែល ឬផលិតផលផ្សេងទៀត។ ដូច្នេះ វានឹងមិនបាត់បង់ការងារសម្រាប់មនុស្សទេ គឺមានតែការរស់នៅប្រចាំថ្ងៃល្អប្រសើរឡើងប៉ុណ្ណោះ ។
ប្រវត្តិសាស្ត្រក៏បង្ហាញមកដូច្នេះដែរ ។ ក្នុងរយៈពេលប្រមាណ២០០ឆ្នាំមកនេះ សមត្ថភាពផលិតបានកើនឡើងជាបន្តបន្ទាប់ ជាពិសេសនៅប្រទេសលោកខាងលិច ។ ពលរដ្ឋរស់នៅក្នុងប្រទេសទាំងនោះបានជ្រើសរើសការដើរលេងកម្សាន្តកាន់តែច្រើនផង និងរកប្រាក់ចំណូលច្រើនផង ។ ម៉ោងធ្វើការក្នុងប្រទេសអភិវឌ្ឍន៍បានធ្លាក់ចុះពាក់កណ្តាលតាំងពីឆ្នាំ១៨៧០មក ខណៈប្រាក់ចំណូលក្នុងមនុស្សម្នាក់បានកើនឡើងយ៉ាងខ្លាំង ។
តើការងារធ្វើដោយមនុស្ស ពិតជាអាចបាត់បង់ដោយសារមនុស្សយន្តដែរឬទេ ?
យោងតាមរបាយការណ៍មួយរបស់វិទ្យាស្ថាន Mckinsey Global Institute បានឲ្យដឹងថា ពេលវេលា៥០%ដែលមនុស្សចំណាយក្នុងការធ្វើការងារណាមួយ នឹងត្រូវបានជំនួសដោយម៉ាស៊ីន ។ ប៉ុន្តែនិន្នការបច្ចុប្បន្ននេះបង្ហាញថា អត្រានេះនឹងកើនឡើងត្រឹម៣០%ប៉ុណ្ណោះក្នុងឆ្នាំ២០៣០ ដោយយោងតាមល្បឿននៃការប្រើប្រាស់បច្ចេកវិទ្យាថ្មីៗ ។
វិទ្យាស្ថានខាងលើអះអាងថា នៅក្នុងឆ្នាំ២០៣០ មនុស្សប្រមាណពី៤០០ ទៅ៨០០លាននាក់នឹងត្រូវស្វែងរកការងារថ្មី ដែលប្រហែលជាមិនទាន់បង្កើតឡើងនៅឡើយ ។ អត្រានៃការផ្លាស់ប្តូរការងារនេះ គឺមិនខុសគ្នាប៉ុន្មាននឹងរយៈពេលមុនទេ ។
មូលហេតុនៃការធ្វើស្វ័យប្រវត្តិកម្មគួរឲ្យខ្លាច នេះ មកពីភាពមិនប្រាកដប្រជាកាលពីអតីតកាល គឺកង្វះទិន្នន័យសម្រាប់ការព្យាករ ។
សេដ្ឋវិទូតែងជឿជាក់ថា ការប៉ះពាល់ដល់ការងារកាលពីលើកមុនបានបង្កឲ្យតម្រូវការ និងការផ្គត់ផ្គង់ជួបគ្នា ដែលធ្វើឲ្យចំនួនការងារ និងប្រាក់ចំណូលកើនឡើង ។ ប្រសិនបើមនុស្សយន្តអាចជំនួសមនុស្សមែននោះ វាប្រហែលជាពិបាកមើលឃើញលទ្ធផលដូចនេះម្តងទៀតណាស់ ។
ប៉ុន្តែរបាយការណ៍ពីវិទ្យាស្ថានខាងលើបានបដិសេធនឹងអំណះអំណាងនេះ ដោយនិយាយថា ក្នុងរយៈពេលវែង សេដ្ឋកិច្ចនឹងអាចសម្របខ្លួន ហើយបង្កើតការងារដល់មនុស្សដែលចង់បាន ។ ពួកគេនិយាយថា ៖« សម្រាប់សង្គមទាំងស្រុង ម៉ាស៊ីនអាចធ្វើការងារជាប្រចាំ, មានគ្រោះថ្នាក់, កខ្វក់ និងអាចអនុញ្ញាតឲ្យមនុស្សប្រើប្រាស់ទេពកោសល្យរបស់ខ្លួនកាន់តែខ្លាំងឡើង ខណៈអាចមានពេលវេលាសម្រាកកាន់តែច្រើនផងដែរ » ។
ទោះជាយ៉ាងណា អំណះអំណាងនេះនៅតែមានចំណុចខ្វះខាត ។ ទី១ ទាក់ទងនឹងការធ្វើការងារជំនួសមនុស្សដោយម៉ាស៊ីន ។ កាលពីអតីតកាល ពិភពលោកជួបប្រទះនឹងការផ្លាស់ប្តូរផ្នែកបច្ចេកវិទ្យាតិច ដែលធ្វើឲ្យមនុស្សអាចសម្របទៅនឹងការផ្លាស់ប្តូរបានស្រួល ។ ប៉ុន្តែបច្ចុប្បន្ននេះ ការផ្លាស់ប្តូរនឹងមានល្បឿនលឿនជាងមុន ព្រោះបច្ចេកវិទ្យាត្រូវបានបង្កើតឡើង និងចែកចាយលឿនជាងមុន ។
កត្តានេះផ្តល់បញ្ហាដល់អ្នកបង្កើតច្បាប់ ព្រោះការបង្កើតបច្ចេកវិទ្យាថ្មីៗកាន់តែលឿនអាចនឹងប៉ះពាល់ដល់ការងារកាន់តែច្រើន ប៉ុន្តែវាក៏ផ្តល់អត្ថប្រយោជន៍កាន់តែលឿនផងដែរ ។
ហេតុនេះ អ្នកនយោបាយគួរតែផ្តោតសំខាន់ទៅលើការវិនិយោគយ៉ាងច្រើនលើការអប់រំ និងការហ្វឹកហាត់ពលករដើម្បីធានាថា មនុស្សមានជំនាញខ្ពស់ទើបអាចទប់ទល់នឹងការផ្លាស់ប្តូរនេះបាន ។
របាយការណ៍របស់វិទ្យាស្ថាននេះមិនបានមើលច្បាស់ថា អត្ថប្រយោជន៍មួយចំនួនដែល
បានមកពីការលូតលាស់នៃសមត្ថភាពផលិត គឺត្រូវបានប្រមូលដោយមនុស្សមួយក្រុមតូច ។
ជាចុងក្រោយ របាយការណ៍នេះគិតថា ការធ្វើស្វ័យប្រវត្តិកម្មមិនអាចបង្វែរទិសបានទេ បើយើងដឹងពីវិធីធ្វើអ្វីមួយមានប្រសិទ្ធភាពជាងមុន ហើយយើងមិនអាចធ្លាក់មកកម្រិតមានប្រសិទ្ធភាពទាបជាងមុនទេ ប៉ុន្តែការគិតដូចនេះមិនបានមើលថា តើវាល្អដែរឬទេ ?
ដកស្រង់ពី Project-syndicate
ចែករំលែកព័តមាននេះ