គូជីវិត គូសិល្បៈបុរាណដ៏សក្តិសម
- ភ្នំពេញ
រាជធានីភ្នំពេញ ៖ ច្រៀងផង រាំផង បង្កើតបរិយាកាសរីករាយគាប់ភ្នែកទស្សនិកជន ពិសេស គឺកូនកំលោះ-ក្រមុំ ។ វាជាការសម្តែងរបស់លោកចាន់ សុធី…
រាជធានីភ្នំពេញ ៖ ច្រៀងផង រាំផង បង្កើតបរិយាកាសរីករាយគាប់ភ្នែកទស្សនិកជន ពិសេស គឺកូនកំលោះ-ក្រមុំ ។ វាជាការសម្តែងរបស់លោកចាន់ សុធី និងអ្នកស្រីឃុន សារិន ក្នុងពិធីកាត់សក់មង្គលការមួយ នៅតំបន់ចម្ការមន រាជធានីភ្នំពេញ នាពេល ថ្មីៗកន្លងមក ។
យុវជនវ័យក្មេងមួយគូរៀបពិធីប្រពៃណីដើម្បីក្លាយជាប្តី-ប្រពន្ធ ឯសិល្បករ សិល្បការិនីសម្តែងក្នុងពិធីរបស់ពួកគេជាប្តី-ប្រពន្ធនឹងគ្នាដែរ។ រាល់ទីកន្លែង រាល់ពេលវេលា អ្នកទាំងពីរជាគូសម្តែងជាមួយគ្នាជានិច្ច ។
នៅរដូវរំហើយនេះស្ទើរគ្មានលស់ថ្ងៃទេសម្រាប់លោកចាន់ សុធី និងភរិយា សម្តែងនៅទីនេះ នៅទីនោះ ។ ក្រៅពីសម្តែងសិល្បៈប្រពៃណីសម្រាប់មង្គលការ សិល្បករ សិល្បការិនីទាំងគូសម្តែងពិធីឡើងគេហដ្ឋាន ច្រៀងពិធីតន្ត្រីទូរទស្សន៍ និងសម្តែងយីកេក្នុងពិធីបុណ្យរបស់អ្នកស្រុក ។
ទេពកោសល្យសិល្បៈបុរាណ ពិសេសសំនៀងសែនពីរោះស្រទន់ផ្តល់ឲ្យលោកចាន់ សុធី នូវកេរ្តិ៍ឈ្មោះ និងប្រជាប្រិយភាពក្នុងស្រទាប់មហាជន ។ សម្រាប់ពិធីមង្គលការកូន ចៅ របស់សម្តេច ឯកឧត្តម លោកជំទាវ ឧកញ៉ា អ្នកមានស្តុកស្តម្ភ… តែងតែគាប់ចិត្តផ្តល់ឱកាសសម្រាប់ក្រុមសិល្បៈប្រពៃណីរបស់លោក ។
ថ្វីបើបែបនោះក្តី ក្រុមសិល្បៈរបស់លោកចាន់ សុធី ក៏ជាទីពេញនិយមសម្រាប់មហាជនទូទៅដែរ ។ សិល្បករប្រជាប្រិយរូបនេះមិនរើសអើងសម្រាប់ការសម្តែងទេ ពិធីរបស់មហាជនវណ្ណៈណា ជីវភាពបែបណាក៏លោករីករាយសម្តែងជូនដែរ ។ កេរ្តិ៍ឈ្មោះរបស់លោកសុធីមិនមែនជាការកំណត់តម្លៃខ្លួនខ្ពស់ដែលតម្រូវសម្រាប់តែអ្នកមាននោះទេ លោកតែងតែសម្របសម្រួលទៅតាមកម្រិតជីវភាពរបស់អ្នកពេញចិត្តការសម្តែងរបស់លោក ។
មហាជនបានកោតសរសើរចំពោះទឹកដមច្រៀងដ៏ពីរោះ និងទេពកោសល្យសម្តែងដ៏ល្អតាមក្បួនខ្នាតរបស់លោកចាន់ សុធី និងភរិយា សម្រាប់ពិធីមង្គលការ ។ ក្រុមសិល្បៈប្រពៃណីនេះអាចបំពេញចិត្តម្ចាស់មង្គលការ ដោយចេះចាំក្បួនខ្នាត ទម្រង់ពិធី ផ្សេងៗតាមទំនៀមបុរាណ ដូចជាពិធីបុកល័ក្ត ធ្វើធ្មេញ ជាដើម ។
ម្ចាស់មង្គលការមួយដែលមិនខុសពីអ្នកផ្សេងជាច្រើនទៀតនិយាយដោយរីករាយថា «ក្រុមលោកចាន់ សុធី សម្តែងល្អណាស់ មិនឆ្គង មិនភ្លាវ ប្រាសចាកទំនៀមមង្គលការខ្មែរ។ ជាពិសេសលោកសុធី ច្រៀងពីរោះណាស់ ។ ស្តាប់គាត់ច្រៀងមិនសរសើរមិនបាន» ។
ការគាំទ្រផ្តល់តម្លៃពីមហាជនធ្វើឲ្យលោកចាន់ សុធី រីករាយ និងមានមោទនភាព ។ «ខ្ញុំសូមអរគុណចំពោះមហាជនទាំងអស់ដែលពេញចិត្តការសម្តែងរបស់ខ្ញុំ និងភរិយា ព្រមទាំងសិល្បកររួមក្រុមទាំងអស់ ។ យើងខ្ញុំនឹងយកចិត្តទុកដាក់សម្តែងឲ្យកាន់តែល្អឡើងមិនឲ្យអស់លោកអ្នកអាក់អន់ចិត្តទេ »។ លោកចាន់ សុធី ថ្លែងបែបនេះទាំងងាកញញឹមដាក់ភរិយាដែលនៅអង្គុយក្បែរ ហើយបានស្នាមញញឹមពព្រាយតបវិញ ។
ដោយប្រជាប្រិយភាព លោកចាន់ សុធី និងភរិយា មានពេលសម្រាកនៅផ្ទះតិចណាស់ ពេញមួយខែៗមានចន្លោះថ្ងៃតិចតួចណាស់ដែលលោកមិនសម្តែង ។ ទោះបីហត់នឿយបែបណាក្តីលោកសុធី នៅតែរីករាយបំពេញការងារសិល្បៈដែលទុកដូចជាជីវិតរបស់ខ្លួននេះ ។
លោកចាន់ សុធី ជាអតីតតួឯកយីកេនៅក្រុមសិល្បៈមន្ទីរវប្បធម៌ និងវិចិត្រសិល្បៈខេត្តតាកែវ រួមជាមួយភរិយារបស់លោក ។ ទោះបីបែកចេញពីក្រុមដើម កន្លែងដែលផ្តល់ភាពលូតលាស់សម្រាប់ជំនាញសិល្បៈបុរាណរបស់ខ្លួនក្តី លោកចាន់ សុធី និងភរិយា នៅតែមានក្រុមយីកែដដែលសម្រាប់បម្រើការកម្សាន្តរបស់មហាជន ហើយលើសពីនេះគឺជាការរក្សាសិល្បៈយីកេ ។
អំឡុងពេលនៅក្រុមដើមឯខេត្តតាកែវ លោកចាន់ សុធី បានចូលរួមសម្តែងយីកេជាច្រើនរឿង។ ស្នាដៃទាំងនោះផលិត និងចាក់ផ្សាយដោយទូរទស្សន៍ជាតិ ដូចជារឿង «ព្រះថោងនាងនាគ» «កាកី» និងរឿងវិធូរបណ្ឌិត ជាដើម ។
ប៉ុន្មានថ្ងៃមកហើយលោក ចាន់ សុធី និងក្រុមសិល្បៈប្រពៃណីរបស់ខ្លួនសម្តែងបន្តបន្ទាប់គ្នា ហើយនៅតែបន្តរៀងរាល់ថ្ងៃទៀត ។
បុរសមន្ត្រីរាជការមួយរូបនៅរាជធានីភ្នំពេញដែលត្រៀមរៀបចំមង្គលការកូនស្រីនៅឆ្នាំក្រោយបានប្រាថ្នានឹងយកការសម្តែងរបស់លោកចាន់ សុធី ៕
ចែករំលែកព័តមាននេះ