រាជធានីភ្នំពេញ ៖ យោងតាមការសិក្សាថ្មីមួយរបស់ធនាគារពិភពលោក (WB) ស្តីពីការអភិវឌ្ឍទីក្រុងនៅរាជធានីភ្នំពេញ ដែលបានចេញផ្សាយកាលពីថ្ងៃទី២០ ធ្នូ កន្លងមក បានឲ្យដឹងថា ការរីកលូតលាស់ដ៏ឆាប់រហ័សនៃក្រុងភ្នំពេញក្នុងរយៈពេល១០ឆ្នាំកន្លងមកនេះ…
រាជធានីភ្នំពេញ ៖ យោងតាមការសិក្សាថ្មីមួយរបស់ធនាគារពិភពលោក (WB) ស្តីពីការអភិវឌ្ឍទីក្រុងនៅរាជធានីភ្នំពេញ ដែលបានចេញផ្សាយកាលពីថ្ងៃទី២០ ធ្នូ កន្លងមក បានឲ្យដឹងថា ការរីកលូតលាស់ដ៏ឆាប់រហ័សនៃក្រុងភ្នំពេញក្នុងរយៈពេល១០ឆ្នាំកន្លងមកនេះ បានចូលរួមចំណែកក្នុងការបង្កើនឱកាសការងារ និងកាត់បន្ថយភាពក្រីក្រ ។ ក៏ប៉ុន្តែ ការផ្តោតការយកចិត្តទុកដាក់លើការលើកកម្ពស់ផែនការ ការគ្រប់គ្រង និងហេដ្ឋារចនាសម្ព័ន្ធនៃទីក្រុង គឺត្រូវការជាចាំបាច់ដើម្បីចៀសវាងការរីករាលដាលនៃភាពគ្មានសណ្តាប់ធ្នាប់ ការស្ទះចរាចរណ៍ និងការបំពុលផ្សេងៗ ។
របាយការណ៍មានចំណងជើងថា « ការអភិវឌ្ឍទីក្រុងក្នុងរាជធានីភ្នំពេញ » បានលើកឡើងពីភាពប្រឈមជាច្រើនក្នុងការផ្តល់សេវាកម្មជាមូលដ្ឋាន រួមមាន ប្រព័ន្ធបង្ហូរទឹកស្អុយ ស្ថានីយកែច្នៃទឹកស្អុយ សេវាដឹកជញ្ជូនសាធារណៈ និងការគ្រប់គ្រងកាកសំណល់រឹង។ ការគ្រប់គ្រង និងការផ្តល់ហិរញ្ញប្បទានលើការរៀបចំក្រុង ការពង្រឹងអភិបាលកិច្ច និងការផ្តល់សេវាកម្ម ក៏ជួបបញ្ហាប្រឈមដែរ ។ ទោះបីជាមានដំណើរការរៀបចំក្រុងដែលមានស្រាប់ក៏ដោយ ក៏ការផ្តល់ហិរញ្ញប្បទាន និងសមត្ថភាពបច្ចេកទេស ជាញឹកញាប់បង្កនូវឧបសគ្គជាច្រើនដល់ផែនការអភិវឌ្ឍន៍ទីក្រុង ទីតាំង និងផែនការប្រើប្រាស់ដី ជាពិសេស នៅថ្នាក់ខណ្ឌ និងសង្កាត់ ។
លោកស្រី អ៊ីហ្គូណា ដូប្រាចា នាយិកាគ្រប់គ្រងធនាគារពិភពលោកប្រចាំកម្ពុជា បានមានប្រសាសន៍ថា ៖« រាជធានីភ្នំពេញប្រឈមនឹងឱកាសដ៏សំខាន់មួយក្នុងការកែខៃទីក្រុងជាវិជ្ជមានសម្រាប់អនាគតរបស់ខ្លួន ការបង្កើតការងារឲ្យបានច្រើនថែមទៀត និងការបង្កលទ្ធភាពឲ្យមានសេវាកម្មកាន់តែប្រសើរជាងមុន។ ការអភិវឌ្ឍទីក្រុងដែលមានការគ្រប់គ្រង និងរៀបចំផែនការបានល្អ អាចជួយធ្វើឲ្យទីក្រុងមានភាពល្បីល្បាញក្នុងការធានាឲ្យមានស្តង់ដារស់នៅប្រសើរសម្រាប់អនាគតមនុស្សជំនាន់ក្រោយផងដែរ » ។
របាយការណ៍នេះបានផ្តល់នូវអនុសាសន៍ជាច្រើន ដើម្បីធ្វើឲ្យការរីកលូតលាស់នៅក្នុងទីក្រុងកាន់តែមានលក្ខណៈប្រកួតប្រជែង កាន់តែមាននិរន្តរភាព និងកាន់តែគ្របដណ្តប់ទូលំទូលាយលើវិស័យសំខាន់ៗចំនួន៤ រួមមាន ៖
១-ត្រូវកែលម្អស្ថាប័ន និងអភិបាលកិច្ច ដើម្បីឲ្យទីក្រុងអាចអភិវឌ្ឍន៍ទៅបានប្រកបដោយភាពសុខដុម និងមានប្រសិទ្ធភាពជាងមុន ។
២-ត្រូវកែលម្អផែនការរៀបចំទីក្រុង និងការអនុវត្តផែនការ តាមរយៈការបង្កើតបទដ្ឋានគតិយុត្ត ក្របខ័ណ្ឌច្បាប់ និងពង្រឹងផែនការរៀបចំទីក្រុងដែលមានស្រាប់ ។
៣-ត្រូវវិនិយោគលើហេដ្ឋារចនាសម្ព័ន្ធទីក្រុងដែលប្រកបដោយនិរន្តរភាព ដើម្បីលើកកម្ពស់កម្រិតជីវភាពរស់នៅ និងភាពប្រកួតប្រជែង ។
៤-ត្រូវធានាថា ការរៀបចំទីក្រុងត្រូវគិតគូរឲ្យបានគ្រប់ជ្រុងជ្រោយដើម្បីចៀសវាងកុំឲ្យមានវិសមភាព ។
លោកស្រី ជូឌី បេគ័រ ប្រធានសេដ្ឋកិច្ចវិទូរបស់ធនាគារពិភពលោក ដែលជាអ្នកនិពន្ធម្នាក់ក្នុងចំណោមអ្នកនិពន្ធជាច្រើន បានមានប្រសាសន៍ថា ៖« ទីក្រុងទាំងឡាយដែលមានផែនការល្អ ធ្វើឲ្យគេអាចគ្រប់គ្រងបានល្អនូវអត្ថប្រយោជន៍សេដ្ឋកិច្ចសង្គមផ្នែកនគរូបនីយកម្ម និងអាចបង្កើតបានជាទីកន្លែងដែលមានលក្ខណៈរស់រវើក អាចរស់នៅបាន និងមានទីធ្លាប្រសើរ។
ផែនការនេះអាចធ្វើទៅបានយ៉ាងល្អសម្រាប់រាជធានីភ្នំពេញ ក៏ប៉ុន្តែ វានឹងជាដំណើរការមួយដែលមានរយៈពេលវែង ទាមទារឲ្យមានការប្តេជ្ញាចិត្តខ្ពស់ពីសំណាក់រាជរដ្ឋាភិបាល ប្រជាពលរដ្ឋ និងវិស័យឯកជន » ៕
ចែករំលែកព័តមាននេះ