រាជធានីភ្នំពេញ៖ សម្តេចតេជោ ហ៊ុន សែន នាយករដ្ឋមន្ត្រីកម្ពុជា បានប្រកាសជាសាធារណៈថា មន្ត្រីថ្នាក់មូលដ្ឋានប្រមាណជាង៦ម៉ឺននាក់នឹងទទួលបានរបបពិនិត្យជំងឺដោយឥតគិតថ្លៃនៅតាមមន្ទីរពេទ្យរដ្ឋចាប់ពីឆ្នាំ២០១៨នេះតទៅ។
ក្នុងពិធីជួបសួរសុខទុក្ខកម្មករ កម្មការិនី ១៥,១៣៣នាក់ មកពីរោងចក្រចំនួន១៣ ស្ថិតនៅតំបន់ទំនប់កប់ស្រូវ ក្នុងខណ្ឌពោធិ៍សែនជ័យ នាថ្ងៃទី១៣ ខែធ្នូ នេះ សម្តេចតេជោមានប្រសាសន៍ថា ប្រធានភូមិ អនុប្រធានភូមិចំនួន ៤៣,១៤៩នាក់ និងក្រុមប្រឹក្សាឃុំ-សង្កាត់ ចំនួន ១១,៥៧២នាក់ នឹងទទួលបានអត្ថប្រយោជន៍ដូចកម្មកររោងចក្រកាត់ដេរផងដែរ។
ជាមួយគ្នានេះដែរ ស្ត្រីថ្នាក់ភូមិ និងថ្នាក់ឃុំ-សង្កាត់ ដែលសម្រាលកូនក៏នឹងទទួលបានប្រាក់ឧបត្ថម្ភពីរដ្ឋាភិបាលចាប់ពី៤០ម៉ឺនរៀលឡើង សម្រាប់អ្នកសម្រាលបានកូនមួយ, កូន ២ ឬក៏កូន ៣។
សូមបញ្ជាក់ថា រាជរដ្ឋាភិបាលភិបាលកម្ពុជា បានដាក់ចេញគោលនយោបាយថ្មី ដោយផ្តល់ឱ្យស្ត្រីកម្មកររោងចក្រដែលសម្រាលកូន ទទួលបានប្រាក់ឧបត្ថម្ភពីរដ្ឋចំនួន៤០ម៉ឺនរៀល។ ដោយឡែកសម្រាប់ស្ត្រីមន្ត្រីរាជការ នឹងទទួលបាន៨០ម៉ឺនរៀល៕
ចែករំលែកព័តមាននេះ