អាមេរិក ៖ តាមប្រភពព័ត៌មាន Metro បានឲ្យដឹងថា ស្ត្រីម្នាក់ជាម្តាយបានដកកាំភ្លើងចេញពីកាបូប ដោយសារតែជាងកាត់សក់កូនយូរពេក។ រឿងនេះកើតឡើងនៅហាងកាត់សក់មួយ ក្នុង Cleveland រដ្ឋ Ohio។
កូនប្រុសរបស់ស្ត្រីម្នាក់នោះ ដែលជាក្មេងអាយុ៧ឆ្នាំ កំពុងអង្គុយឲ្យជាងកាត់សក់ឲ្យ។ ជាងកាត់សក់ គឺជាកូនជាងដែលរៀននៅថ្នាក់មហាវិទ្យាល័យ ហើយឆ្លៀតមកធ្វើការ។
ដោយសារតែជាងកាត់សក់យូរពេក ស្ត្រីចិត្តឆៅម្នាក់នោះបានស្រែករអ៊ូពីការគ្រប់គ្រងនៅក្នុងហាង។
នៅពេលអ្នកគ្រប់គ្រងមកជួបនិយាយ នាងក៏ដកកាំភ្លើងចេញពីកាបូប ហើយនិយាយថា៖ «អញមានគ្រាប់ពីរបង់ ហើយអញនឹងបាញ់ហ្អែង»។ ក្រោយពេលនិយាយហើយ នាងក៏ទុកកាំភ្លើងនោះវិញ ហើយឲ្យជាងកាត់សក់បន្តរហូតដល់រួចរាល់។ នាងក៏បានដើរចេញទៅជាមួយនឹងកូនរបស់នាងពីរនាក់។
សាក្សីនៅកន្លែងកើតហេតុ អ្នកស្រី Marlyn Medina បានប្រាប់ថា ៖ «នាងដកកាំភ្លើងចេញមក ហើយនិយាយថា នាងមានការអនុញ្ញាតឲ្យកាន់កាំភ្លើង។ តែពេលនោះមានកូនជាងម្នាក់ទៀត ស្រែកថា ទោះបីជាអញ្ចឹងក៏ដោយ ក៏មិនត្រូវដកចេញឲ្យគេឃើញដែរ»៕
ចែករំលែកព័តមាននេះ