ប្រទេសយេម៉ែន ៖ អ្នកទទួលខុសត្រូវម្នាក់របស់ពួកឧទ្ទាមហ៊ូធីយេម៉ែនថ្លែងថា ពួកឧទ្ទាមហ៊ូធីយ៉ាងតិច២០នាក់ស្លាប់កាលពីថ្ងៃទី១០ ធ្នូ ពេលកងកម្លាំងអាកាសរបស់ក្រុមចម្រុះនាំមុខដោយអារ៉ាប៊ី សាអ៊ូឌីត វាយប្រហារឃ្លាំងស្តុកមីស៊ីលមួយនៅខេត្ត HAJJAH នាភាគពាយ័ព្យយេម៉ែន…
ប្រទេសយេម៉ែន ៖ អ្នកទទួលខុសត្រូវម្នាក់របស់ពួកឧទ្ទាមហ៊ូធីយេម៉ែនថ្លែងថា ពួកឧទ្ទាមហ៊ូធីយ៉ាងតិច២០នាក់ស្លាប់កាលពីថ្ងៃទី១០ ធ្នូ ពេលកងកម្លាំងអាកាសរបស់ក្រុមចម្រុះនាំមុខដោយអារ៉ាប៊ី សាអ៊ូឌីត វាយប្រហារឃ្លាំងស្តុកមីស៊ីលមួយនៅខេត្ត HAJJAH នាភាគពាយ័ព្យយេម៉ែន ។
អ្នកទទួលខុសត្រូវរូបនេះអះអាងថា យុទ្ធជនរបស់យើង២០នាក់បានត្រូវស្លាប់ ហើយច្រើននាក់ទៀតរងរបួសនៅទីតាំងរងការវាយប្រហារនេះ ។ ឃ្លាំងស្តុកមីស៊ីលនេះបានផ្ទុះហើយឆេះក្រោយរងការវាយប្រហារតាមអាកាស២លើកបន្តបន្ទាប់គ្នា ។ ទីតាំងរងការវាយប្រហារស្ថិតនៅក្នុងមូលដ្ឋានយោធាតូចមួយរបស់ពួកឧទ្ទាមហ៊ូធី ក្នុងតំបន់ AL RABOO ស្រុក ABS ដែលផ្គត់ផ្គង់សម្ភារយោធាដល់ពួកយុទ្ធជននៃទីក្រុង MEDI ជាប់ព្រំដែនជាមួយអារ៉ាប៊ី សាអ៊ូឌីត ។
ក្រុមចម្រុះអារ៉ាប់នាំមុខដោយអារ៉ាប៊ី សាអ៊ូឌីត បានបង្កើនការវាយប្រហារតាមអាកាសប្រឆាំងពួកហ៊ូធី៦ថ្ងៃ ក្រោយពីពួកហ៊ូធីសម្លាប់អតីតប្រធានាធិបតីយេម៉ែន លោកអាលី អាប់ដាល់ឡាហ៍ សាឡេហ៍ ដែលបានក្បត់ពួកគេងាកទៅឈោងចាប់ដៃជាមួយអារ៉ាប៊ី សាអ៊ូឌីត ។
អគ្គលេខាធិការ អ.ស.ប លោក ANTONIO GUTERRES កាលពីថ្ងៃទី១០ ធ្នូ បានហៅសង្គ្រាមនៅយេម៉ែនថាជាសង្គ្រាមភ្លីភ្លើដែលលោកថា ផ្ទុយទៅនឹងផលប្រយោជន៍ផ្ទាល់របស់បណ្តាប្រទេសចូលរួមផង ។
អគ្គលេខាធិការ អ.ស.ប ក៏សង្ឃឹមដែរថា អន្តរាគមន៍របស់ប្រធានាធិបតីអាមេរិក លោកដូណាល់ ត្រាំ នឹងជួយសម្រួលដល់ការបញ្ជូនជំនួយមនុស្សធម៌ទៅកាន់ប្រទេសនេះ ។
ក្នុងបទសម្ភាសន៍មួយជាមួយទូរទស្សន៍អាេមរិក CNN លោក GUTERRES ថ្លែងថា ខ្ញុំយល់ថា នេះជាសង្គ្រាមភ្លីភ្លើមួយប្រឆាំងផលប្រយោជន៍របស់អារ៉ាប៊ី សាអ៊ូឌីត និងរបស់អេមីរ៉ាត់ អារ៉ាប់រួម ។ ចំពោះបញ្ហាអ៊ីរ៉ង់ខ្ញុំពុំឃើញមានផលប្រយោជន៍អីដែរ ព្រោះយេម៉ែនពុំមានឥទ្ធិពលសំខាន់អ្វីក្នុងតំបន់ឡើយ ។ សង្គ្រាមនេះក៏ផ្ទុយផងដែរទៅនឹងផលប្រយោជន៍របស់ប្រជាជនយេម៉ែនដែលកំពុងជួបវិបត្តិមនុស្សធម៌យ៉ាងអាក្រក់បំផុតនៃពិភពលោក ៕
ចែករំលែកព័តមាននេះ