លោកឡាវរ៉ូវ និយាយថា ក្រុងព្យុងយ៉ាងចង់ចរចាជាមួយអាមេរិក
ប្រទេសកូរ៉េខាងជើង ៖ រដ្ឋមន្ត្រីការបរទេសរុស្ស៊ី លោកស័រហ្គេយឡាវរ៉ូវ កាលពីថ្ងៃទី៧ ធ្នូ បានប្រាប់ដល់សមភាគីអាមេរិក លោក REX TILLERSON…
ប្រទេសកូរ៉េខាងជើង ៖ រដ្ឋមន្ត្រីការបរទេសរុស្ស៊ី លោកស័រហ្គេយឡាវរ៉ូវ កាលពីថ្ងៃទី៧ ធ្នូ បានប្រាប់ដល់សមភាគីអាមេរិក លោក REX TILLERSON ថា កូរ៉េខាងជើងចង់ឱ្យមានការចរចាគ្នាដោយផ្ទាល់ជាមួយសហរដ្ឋអាមេរិក ដើម្បីឱ្យទទួលបានការធានានានាលើសន្តិសុខរបស់ខ្លួន ។
លោកស័រហ្គេយឡាវរ៉ូវ បានបញ្ជូនសារនេះដល់រដ្ឋមន្ត្រីការបរទេសអាមេរិកនៅខាងក្រៅសន្និសីទមួយស្តីពីសន្តិសុខនៅទីក្រុងវីយែន ។ លោកថ្លែងថា យើងដឹងថា កូរ៉េខាង
ជើងជាបឋមចង់និយាយជាមួយសហរដ្ឋអាមេរិកពីការធានាលើសន្តិសុខរបស់ខ្លួន ។ យើងត្រៀមខ្លួនជួយទ្រទ្រង់ ហើយយើងត្រៀមចូលរួម ដើម្បីសម្រួលដល់ការចរចាបែបនេះ ។ បណ្តាសហសេវិកអាមេរិក ក្នុងនោះមានទាំងលោក REX TILLERSON ផងបានដឹងនូវសារនេះ ។
កាលពីយប់ថ្ងៃទី៦ ធ្នូ ក្រសួងការបរទេសកូរ៉េខាងជើងវាយតម្លៃថា សមយុទ្ធយោធារួមធ្វើនាពេលបច្ចុប្បន្នដោយកងទ័ពអាមេរិក និងកូរ៉េខាងត្បូងជាការគំរាមកំហែងបង្កសង្គ្រាមរបស់ក្រុងវ៉ាស៊ីនតោននៅឧបទ្វីបកូរ៉េ ។
ខណៈភាពតានតឹងមានកាន់តែខ្ពស់រវាងក្រុងព្យុងយ៉ាង និងក្រុងវ៉ាស៊ីនតោន ដែលបង្កើនថែមតាមរយៈការអុជអាល និងការគំរាមកំហែងគ្នាទៅវិញទៅមក រវាងលោកដូណាល់ ត្រាំ និងលោកគីម ជុងអ៊ុន ប្រធានាធិបតីអាមេរិកធ្លាប់អះអាងជាច្រើនលើកថា វាជាការឥតប្រយោជន៍ក្នុងការពិភាក្សាជាមួយក្រុងព្យុងយ៉ាង ។
ក្រុងវ៉ាស៊ីនតោននៅតែនិយាយថា នៅតែបើកចំហចំពោះការចរចា ប្រសិនបើកូរ៉េខាងជើងសន្យាបោះបង់ចោលកម្មវិធីនុយក្លេអ៊ែររបស់ខ្លួន ក៏ប៉ុន្តែក្រុងព្យុងយ៉ាងបានបដិសេធជាច្រើនលើកដោយនិយាយថា អាវុធនុយក្លេអ៊ែរគឺសំខាន់បំផុតសម្រាប់ការរស់រានរបស់ខ្លួន ៕
ចែករំលែកព័តមាននេះ