រាជធានីភ្នំពេញ ៖ តារាចម្រៀងកញ្ញាសួស វីហ្សា បានបញ្ជាក់ពីរឿងនាង និងតារាសម្តែងថ្មីលោកថមមី ក្រោយពីផ្ទុះព័ត៌មានថា ពួកនាងបង្កាត់ភ្លើងស្នេហ៍ជាមួយគ្នា ។
អ្វីដែលតារាទាំងពីរបានធ្វើឲ្យមហាជនចាប់អារម្មណ៍នោះ គឺបន្ទាប់ពីពួកគេបានបង្ហាញភាពស្និទ្ធស្នាលជាមួយគ្នាជាបន្តបន្ទាប់ ដែលមើលទៅខុសពីមិត្តភក្តិរាប់អានធម្មតាក្នុងអាជីពសិល្បៈ ។
បន្ទាប់ពីព័ត៌មានផ្ទុះឡើងនោះមក កញ្ញាសួស វីហ្សា កាលពីពេល ថ្មីៗកន្លងមកបានចេញមុខបកស្រាយប្រាប់មហាជន ដោយនាងចាត់ទុកភាពស្និទ្ធស្នាលដែលបានឃើញគ្មានអ្វីលើសពីការរាប់អានគ្នាជាមិត្តភក្តិទេ ។
តាមរយៈសំណេរលើហ្វេសប៊ុក តារាចម្រៀងក្នុងផលិតកម្មហង្សមាសកញ្ញាសួស វីហ្សា បញ្ជាក់ថា «ខ្ញុំសួស វីសា និងប្អូនប្រុសថមមី គ្មានទាក់ទងស្នេហាពិតប្រាកដអីទេ គ្រប់យ៉ាងពួកខ្ញុំគ្រាន់តែសម្តែងប៉ុណ្ណោះ ហើយពួកយើងស្រលាញ់រាប់អានគ្នាដូចបងប្អូនបង្កើត ។ ថមមី អាយុប្អូនខ្ញុំដល់ទៅបីឆ្នាំ ហើយខ្ញុំស្រលាញ់គាត់ដូចប្អូនខ្ញុំបង្កើត ។ អត់ចង់ថែមថយអីទៀតទេ សូមបកស្រាយ ខ្លីៗ វាជាការណ៍ពិត ងាយយល់ ហើយសង្ឃឹមថាអ្នកទាំងអស់គ្នានឹងអស់ចម្ង់ល់ទៀតទៅ ។ ណាមួយចេញមុខសារភាពបែបនេះ គឺដោយសារពួកខ្ញុំក៏ចង់បានស្នេហាមែនទែន ដូចគេដូចឯងដែរ ព្រោះអាយុច្រើនហើយ បើរវល់តែសម្តែងជាមួយគ្នាអុីចឹងទៀត កាលណាមានគូមែនទែននឹងគេ ! ២០១៨ហើយ មិនចង់single ទៀតទេ សុំទោសដល់ ALL MY FANS ផងណាដែលធ្វើឱ្យឆ្ងល់មួយរយៈ »។
មិនមែនជាលើកទីមួយទេដែលតារាចម្រៀងកញ្ញាសួស វីហ្សា បានពើបប្រទះរឿងរ៉ាវស្នេហា ដោយកន្លងមកនាងធ្លាប់ជួបស្នេហាបែកបាក់ម្តងរួចមកហើយជាមួយតារាចម្រៀងដូចគ្នា ។ មានការបញ្ជាក់ថា ស្នេហានោះបានផ្តើមឡើងតាំងពីសួស វីហ្សា មិនទាន់ចូលប្រឡូកក្នុងពិភពសិល្បៈមកម្ល៉េះ ។ ប៉ុន្តែក្រោយពេលនាងមានឱកាសចេញមុខនៅក្នុងវិស័យសិល្បៈបែរជាស្នេហាប្រេះឆា ហើយបុរសរូបនោះបានរៀបការនឹងនារីម្នាក់ផ្សេងទៅវិញ ៕
ចែករំលែកព័តមាននេះ