រាជធានីភ្នំពេញ ៖ ស្ត្រីអ្នកលក់អីវ៉ាន់ចាប់ហួយម្នាក់បានដេកលង់លក់យ៉ាងស្កប់ស្កល់ទាំងថ្ងៃ ហើយក្រោយពេលភ្ញាក់ឡើងស្រាប់តែបាត់លុយ និងកងដៃ ក៏មានការភ្ញាក់ផ្អើលឆោឡោ មិនដឹងថាតើនរណាជាអ្នកលួចរបស់គាត់នោះឡើយ ។ ស្របពេលកំពុងមានការភ្ញាក់ផ្អើលខាងលើ ក៏មានយុវជនម្នាក់ដែលជាអ្នកជិតខាងប្រាប់គាត់ថា…
រាជធានីភ្នំពេញ ៖ ស្ត្រីអ្នកលក់អីវ៉ាន់ចាប់ហួយម្នាក់បានដេកលង់លក់យ៉ាងស្កប់ស្កល់ទាំងថ្ងៃ ហើយក្រោយពេលភ្ញាក់ឡើងស្រាប់តែបាត់លុយ និងកងដៃ ក៏មានការភ្ញាក់ផ្អើលឆោឡោ មិនដឹងថាតើនរណាជាអ្នកលួចរបស់គាត់នោះឡើយ ។ ស្របពេលកំពុងមានការភ្ញាក់ផ្អើលខាងលើ ក៏មានយុវជនម្នាក់ដែលជាអ្នកជិតខាងប្រាប់គាត់ថា ខ្លួនបានឃើញក្មេងប្រុសម្នាក់ដើរចូលទៅក្នុងផ្ទះរបស់គាត់ ក្នុងពេលដែលគាត់កំពុងដេកលក់ ។ បន្ទាប់ពីទទួលដំណឹងនេះភ្លាម ស្ត្រីអ្នកលក់ចាប់ហួយរូបនោះបានដាក់ការសង្ស័យទៅលើយុវជនដែលចូលផ្ទះរបស់ខ្លួននោះ រួចក៏ធ្វើការចាប់ខ្លួនប្រគល់ឲ្យនគរបាល ហើយបើទោះបីជាយុវជនខាងលើបដិសេធន៍ថា មិនបានលួច ហើយរកភស្ដុតាងមិនឃើញក្ដី ក៏ស្ត្រីខាងលើបានសំណូមពរឲ្យនគរបាលចាត់ការតាមច្បាប់ដែរ ។
ហេតុការណ៍នោះបានកើតឡើងកាលពីវេលាម៉ោង០៤និង១៥នាទីរសៀល ថ្ងៃទី០៦ ខែធ្នូ ឆ្នាំ២០១៧ នៅក្នុងភូមិព្រៃព្រីងត្បូង២ សង្កាត់ចោមចៅ៣ ខណ្ឌពោធិ៍សែនជ័យ រាជធានីភ្នំពេញ ។ ស្ត្រីរងគ្រោះរូបនោះឈ្មោះ រីម ផល អាយុ៣៤ឆ្នាំ មុខរបរលក់អីវ៉ាន់ចាប់ហួយនៅផ្ទះ ស្ថិតនៅក្នុងភូមិកើតហេតុខាងលើ ។ ដោយឡែកយុវជនសង្ស័យឈ្មោះ កែវ ដែន អាយុ១៥ឆ្នាំ មានទីលំនៅក្នុងភូមិថ្មគោល សង្កាត់ចោមចៅ២ និងមានស្រុកកំណើតនៅក្នុងភូមិព្រៃព្រីងខាងត្បួងនោះដែរ ។
ស្ត្រីខាងលើបានរៀបរាប់ប្រាប់ឲ្យនគរបាលដឹងថា នាងបានបាត់លុយចំនួន២០ម៉ឺនរៀល និងកងដៃកូនស្រី១កង ដែលមានតម្លៃ២០០ដុល្លារ ប៉ុន្តែគាត់មិនបានដឹងថា នរណាជាអ្នកយក ហើយក៏មិនបានឃើញដោយផ្ទាល់ភ្នែកថាយុវជនខាងលើជាអ្នកលួចដែរ ។ នៅវេលាម៉ោងជិត២រសៀល ថ្ងៃទី០៦ ខែធ្នូ ឆ្នាំ២០១៧ នៅមុនពេលកើតហេតុ ខណៈពេលដែលគាត់កំពុងលក់ដូរនៅក្នុងផ្ទះ ស្រាប់តែឃើញក្មេងប្រុសដែលជាជនសង្ស័យម្នាក់នោះ បានកាន់ចង្ក្រានហ្គាស១ យកទៅលក់ឲ្យនាងដល់ផ្ទះក្នុងតម្លៃ១៥,០០០រៀល ។ ប៉ុន្តែពេលនោះនាងមិនទិញឡើយ ព្រោះគាត់មានចង្ក្រានហ្គាសប្រើហើយ ម្យ៉ាងមិនហ៊ានទិញទេព្រោះមិនដឹងថា ក្មេងប្រុសម្នាក់នេះបានចង្ក្រានហ្គាសនោះមកពីណាផង ។
ប្រភពដដែលបានបន្តទៀតថា បន្ទាប់មកក្មេងប្រុសរូបនោះបានដើរចេញពីផ្ទះរបស់នាង ចំណែករូបគាត់ដោយសារតែងងុយដេកខ្លាំងពេក ក៏បានដេកលង់លក់រហូតដល់វេលាល្ងាច ថ្ងៃដដែល ទើបភ្ញាក់ហើយមើលលុយ និងកងដៃកូនស្រីស្រាប់តែបាត់អស់ ទើបមានការភ្ញាក់ផ្អើលឆោឡោ ។ ពេលនោះគាត់មិនបានដឹងថានរណាជាអ្នកលួចនោះទេ ហើយក៏មិនបានឃើញដោយផ្ទាល់ភ្នែកថា ក្មេងប្រុសខាងលើជាអ្នកលួចនោះដែរ ប៉ុន្តែនៅក្នុងខណៈពេលដែលគាត់កំពុងមានការភ្ញាក់ផ្អើល មានយុវជនម្នាក់ឈ្មោះ ផល សត្យា អាយុ២៣ឆ្នាំ មុខរបរបុគ្គលិកក្រុមហ៊ុនឯកជនមួយ និងមានផ្ទះជាប់គ្នាជាមួយផ្ទះគាត់ដែរនោះ បានប្រាប់ថា ក្នុងខណៈពេលដែលគាត់កំពុងតែដេកលក់ រូបគេបានបានឃើញក្មេងប្រុសឈ្មោះ កែវ ដែន ដើរចូលទៅក្នុងផ្ទះរបស់គាត់ ប៉ុន្តែមិនដឹងថាបានលួចលុយ និងកងដៃខាងលើឬអត់នោះទេ ។ ក្រោយពេលទទួលបានព័ត៌មាននោះភ្លាម គាត់បានសង្ស័យយ៉ាងខ្លាំងទៅលើក្មេងប្រុសរូបនោះ ហើយក៏បានចាប់ខ្លួនប្រគល់ជូននគរបាលប៉ុស្ដិ៍ចោមចៅ៣ ធ្វើការសាកសួរ និងចាត់ការតាមច្បាប់តែម្ដង ។ នគរបាលបានឲ្យដឹងថា ក្រោយការសួរនាំក្មេងប្រុសរូបនោះ បានបដិសេធយ៉ាងដាច់ថា ខ្លួនមិនបានដឹង មិនបានលួចលុយ រួមនិងកងដៃរបស់ស្ត្រីនោះទេ ហើយខ្លួនពិតជាបានយកចង្ក្រានហ្គាសមួយដែលលួចបានពីអ្នកដ៏ទៅលក់ឲ្យស្ត្រីនោះមែន ។ ប៉ុន្តែគាត់មិនបានទិញឡើយ បន្ទាប់មកខ្លួនបានចាកចេញពីទីនោះ ក្រោយមកបានត្រលប់ទៅលក់ឲ្យម្ដងទៀត ប៉ុន្តែពេលទៅដល់បានឃើញគាត់ដេកលក់ ខ្លួនបានចាកចេញទៅវិញភ្លាមៗ ដោយមិនបានលួចលុយ និងកងដៃរបស់ស្ត្រីនោះឡើយ ក្រោយមកក៏ស្រាប់តែស្ត្រីនេះចាប់ខ្លួនប្រគល់ឲ្យនគរបាល និងចោទប្រកាន់រូបគេទាំងកំរោលបែបនេះតែម្ដង ។
ដោយឡែកស្ត្រីខាងលើ ទោះបីជាមានការប្រកែកយ៉ាងខ្លាំងពីសំណាក់យុវជននោះយ៉ាងណាក្ដី ក៏ស្ត្រីរូបនេះបានធ្វើការប្ដឹងចោទប្រកាន់ដដែល ព្រមទាំងសំណូមពរឲ្យនគរបាលចាត់ការតាមច្បាប់តែម្ដង បន្ទាប់មកនគរបាលប៉ុស្ដិ៍ចោមចៅ៣ បានបញ្ជូនក្មេងប្រុសម្នាក់នោះ ទៅកាន់ផ្នែកនគរបាលព្រហ្មទណ្ឌខណ្ឌពោធិ៍សែនជ័យ ដើម្បីសាកសួរ និងចាត់ការបន្តទៀត ៕
ចែករំលែកព័តមាននេះ