ខេត្តកណ្តាល ៖ យ៉ាងហោចណាស់មនុស្សម្នាក់បានស្លាប់នៅនឹងកន្លែង និង២នាក់ទៀតបានស្លាប់ពេលបញ្ជូនទៅមន្ទីរពេទ្យ ក្នុងករណីគ្រោះថ្នាក់ចរាចររវាងម៉ូតូបុកម៉ូតូ កាលពីវេលាម៉ោង២០និង១០នាទីយប់ ថ្ងៃទី០៥ ខែធ្នូ ឆ្នាំ២០១៧ នៅលើកំណាត់ផ្លូវជាតិលេខ១៤…
ខេត្តកណ្តាល ៖ យ៉ាងហោចណាស់មនុស្សម្នាក់បានស្លាប់នៅនឹងកន្លែង និង២នាក់ទៀតបានស្លាប់ពេលបញ្ជូនទៅមន្ទីរពេទ្យ ក្នុងករណីគ្រោះថ្នាក់ចរាចររវាងម៉ូតូបុកម៉ូតូ កាលពីវេលាម៉ោង២០និង១០នាទីយប់ ថ្ងៃទី០៥ ខែធ្នូ ឆ្នាំ២០១៧ នៅលើកំណាត់ផ្លូវជាតិលេខ១៤ ចន្លោះគីឡូម៉ែត្រលេខ ៤២-៤៣ ស្ថិតក្នុងភូមិក្អមសំណក្រោម ឃុំក្អមសំណ ស្រុកលើកដែក ខេត្តកណ្ដាល ។
តាមរបាយការណ៍របស់សមត្ថកិច្ចបានឲ្យដឹងថា ភាគីម៉ូតូម៉ាកC១១០ ពណ៌ខ្មៅ ដឹកផ្លែស្វាយ បើកបរដោយឈ្មោះ យ៉េត សារ៉េត ភេទប្រុស អាយុ៣៨ឆ្នាំ មុខរបរកសិករ មានទីលំនៅភូមិឃុំកើតហេតុ បានស្លាប់នៅនឹងកន្លែង ។ ចំណែកភាគីម្ខាងទៀតម៉ូតូម៉ាកកែច្នៃ បើកបរដោយឈ្មោះ ថា ដារ៉ា ភេទប្រុស អាយុ២៨ឆ្នាំ មុខរបរកសិករ មានទីលំនៅភូមិក្អមសំណលើ ឃុំក្អមសំណ និងអ្នករួមដំណើរជាមួយម្នាក់ទៀតឈ្មោះ ចាន់ រ័ត្ន ភេទប្រុស អាយុ២៦ឆ្នាំ មុខកសិករ មានទីលំនៅភូមិរាំងជួរឃុំក្អមសំណ បានរងរបួសធ្ងន់ទាំង២នាក់ ហើយបានដាច់ខ្យល់ស្លាប់ពេលក្រុមគ្រួសារដឹកបញ្ជូនទៅសង្គ្រោះដល់មន្ទីរពេទ្យប្រទេសវៀតណាមទាំង២នាក់ ។
ប្រភពព័ត៌មានបាននិយាយថា មុនពេលកើតហេតុ គេឃើញភាគីខាងម៉ូតូជិះឌុបគ្នា២នាក់ ដោយមិនមានពាក់មួកសុវត្ថិភាព និងម៉ូតូគ្មានកញ្ចក់ បានបើកបរក្នុងល្បឿនយ៉ាងលឿនទិសដៅពីអ្នកលឿងទៅក្អមសំណ ។ លុះមកដល់ចំណុចខាងលើក៏បានបុកជាមួយភាគីម៉ូតូជិះម្នាក់ឯង ដោយមិនមានពាក់មួកសុវត្ថិភាពទិសដៅច្រាសទិសគ្នាពេញទំហឹងតែម្តង ។
ក្រោយទទួលបានព័ត៌មាន សមត្ថកិច្ចជំនាញបានចុះទៅធ្វើការវាស់វែងចាត់ការតាមនីតិវិធី ។ ករណីនេះ មន្ត្រីជំនាញបានសន្និដ្ឋានថា បណ្ដាលមកពីអ្នកបើកបរម៉ូតូទាំងពីរគ្រឿង បើកបរក្នុងល្បឿនលឿនខ្វះការប្រុងប្រយ័ត្នដូចគ្នា ទើបបណ្ដាលឲ្យបុកគ្នារងគ្រោះទាំងសងខាងតែម្ដងទៅ ៕
ចែករំលែកព័តមាននេះ