រាជធានីភ្នំពេញ ៖ តមតាមសំណើរបស់ក្រសួងបរិស្ថាន រាជរដ្ឋាភិបាលបានចេញអនុក្រឹត្យសម្រេចបង្កើតតំបន់២ គឺ «សសរស្តម្ភសត្វតោ» និង «ភ្នំនាងកង្រី-ភ្នំទូក មាស» ទៅជាតំបន់ប្រើប្រាស់ច្រើនយ៉ាងដែលមានផ្ទៃដីសរុបជិត៥៩០២…
រាជធានីភ្នំពេញ ៖ តមតាមសំណើរបស់ក្រសួងបរិស្ថាន រាជរដ្ឋាភិបាលបានចេញអនុក្រឹត្យសម្រេចបង្កើតតំបន់២ គឺ «សសរស្តម្ភសត្វតោ» និង «ភ្នំនាងកង្រី-ភ្នំទូក មាស» ទៅជាតំបន់ប្រើប្រាស់ច្រើនយ៉ាងដែលមានផ្ទៃដីសរុបជិត៥៩០២ ហិកតា ឱ្យស្ថិតនៅក្រោមការគ្រប់គ្រងរបស់ក្រសួងបរិស្ថាន ។ នេះបើយោងតាមអនុក្រឹត្យរបស់រាជរដ្ឋាភិបាលកម្ពុជា ដែលចុះហត្ថលេខាដោយសម្តេចតេជោ ហ៊ុន សែន នាយករដ្ឋមន្ត្រីកម្ពុជា កាលពីថ្ងៃទី២៨ វិច្ឆិកា ឆ្នាំ២០១៧ ។
បើតាមខ្លឹមសារអនុក្រឹត្យបានឲ្យដឹងថា តំបន់ប្រើប្រាស់ច្រើនយ៉ាង «ភ្នំនាងកង្រី-ភ្នំទូកមាស» មានផ្ទៃដី៥០៦៣ហិកតា ស្ថិតក្នុងភូមិសាស្ត្រឃុំត្រងិល ឃុំពោធិ៍ ឃុំច្រណូក ឃុំដារ និងឃុំស្វាយរំពារ ស្រុកកំពង់លែង ខេត្តកំពង់ឆ្នាំង។ ដោយឡែកតំបន់ប្រើប្រាស់ច្រើនយ៉ាង «សសរស្តម្ភសត្វតោ» ដែលមានផ្ទៃដីសរុបចំនួន៨៣៩ ស្ថិតក្នុងភូមិសាស្ត្រ ស្រុកសំបូរ ខេត្តក្រចេះ។
យោងតាមអនុក្រឹត្យដដែលបានឱ្យដឹងថា ការបង្កើតតំបន់ប្រើប្រាស់ច្រើនយ៉ាងទាំងពីរនេះ មានគោលបំណងចំនួន៥ចំណុចធំៗ ៖
ទី១- ដើម្បីធានាឱ្យមានការថែទាំទីជម្រក និងស្ថេរភាពនៃប្រព័ន្ធអេកូឡូស៊ី សារព័នមជ្ឈដ្ឋានធម្មជាតិ សត្វព្រៃ រុក្ខជាតិ សម្រាប់យូរអង្វែង,
ទី២- រក្សាលំនឹងបរិស្ថាន ការពារ និងអភិរក្សធនធានធម្មជាតិ និងរួមចំណែកធនធានធម្មជាតិ និងរួមចំណែកកាត់បន្ថយការប្រែប្រួលអាកាសធាតុ និងហានិភ័យគ្រោះមហន្តរាយធម្មជាតិ,
ទី៣- លើកទឹកចិត្តឱ្យមានការចូលរួមរបស់សហគមន៍មូលដ្ឋាន ក៏ដូចជាអ្នកពាក់ព័ន្ធក្នុងការថែរក្សា ការពារ អភិរក្ស និងការប្រើប្រាស់ធនធានធម្មជាតិដោយនិរន្តរភាព,
ទី៤- បង្កើនតួនាទីប្រព័ន្ធអេកូឡូស៊ី តំបន់ការពារធម្មជាតិ សម្រាប់ជាផលប្រយោជន៍ដល់សង្គមជាតិគ្រប់ជំនាន់
និងទី៥- ផ្តល់ផលិតផល និងសេវាកម្មធម្មជាតិសម្រាប់ប្រើប្រាស់តាមតម្រូវការរបស់សហគមន៍។
សូមកត់សំគាល់ថា តំបន់ប្រើប្រាស់ច្រើនយ៉ាង សំដៅដល់តំបន់ក្នុងដែនដីគោក និង/ឬដែនទឹក ដែលក្នុងនោះមានសំបូរដោយប្រព័ន្ធធម្មជាតិ ដែលពុំទាន់រងការបំផ្លិចបំផ្លាញ និងតម្រូវឱ្យមានសកម្មភាពគ្រប់គ្រង ដើម្បីធានាការការពារ ការថែទាំធនធានជីវៈចម្រុះ និងប្រព័ន្ធអេកូឡូស៊ី សម្រាប់ពេលយូរអង្វែង។ ទន្ទឹមនឹងនេះដែរ វាអាចផ្តល់ផលិតផល និងសេវាកម្មធម្មជាតិសម្រាប់ការប្រើប្រាស់តាមតម្រូវការរបស់សហគមន៍។
សូមបញ្ជាក់ថា ប្រព័ន្ធការពារធម្មជាតិនៅក្នុងព្រះរាជាណាចក្រកម្ពុជា មានតំបន់ការពារធម្មជាតិចំនួន៥០កន្លែង ដោយបូកបញ្ចូលតំបន់ប្រើប្រាស់ច្រើនយ៉ាង «ភ្នំនាងកង្រី-ភ្នំទូកមាស» និង «សសរស្តម្ភសត្វតោ» របៀងអភិរក្សជីវៈចម្រុះ ប្រព័ន្ធតំបន់ការពារធម្មជាតិចំនួន៣កន្លែង ដែលគ្របដណ្តប់លើផ្ទៃដីប្រមាណ៧,៥លានហិកតា ស្មើនឹង៤១% នៃផ្ទៃដីទូទាំងប្រទេស៕
ចែករំលែកព័តមាននេះ