រាជធានីភ្នំពេញ៖ ឆ្លើយតបនឹងការអញ្ជើញរបស់រដ្ឋាភិបាលសាធារណរដ្ឋប្រជាមានិតចិន ជាពិសេសគណបក្សកុំម្មុយនីស្តចិននៅថ្ងៃពុធ ១១កើត ឆ្នាំរកា នព្វស័ក ព.ស ២៥៦១ ត្រូវនឹងថ្ងៃទី២៩ ខែវិច្ឆិកា គ.ស ២០១៧ សម្តេចអគ្គមហាសេនាបតីតេជោ ហ៊ុនសែន បានដឹកនាំគណៈប្រតិភូជាន់ខ្ពស់ទៅចូលរួមកិច្ចសន្ទនារវាងគណបក្សកុំម្មុយនីស្តចិនជាមួយនិងគណបក្សនយោបាយទូទាំងពិភពលោក ដែលនឹងប្រព្រឹត្តទៅចាប់ពីថ្ងៃទី៣០ វិច្ឆិកា រហូតដល់ថ្ងៃទី៣ ធ្នូ ឆ្នាំ២០១៧ នៅទីក្រុងប៉េកាំង។
លោកស៊ី្រ ថាមរុង្គ រដ្ឋមន្ត្រីប្រតិភូអមនាយករដ្ឋមន្ត្រីបានប្រាប់ឲ្យដឹងមុនចេញដំណើរថាកម្មវិធីកិច្ចសន្ទនាគណបក្សកុំម្មុយនីស្តចិននេះ គឺជាកិច្ចសន្ទនាគណបក្សនយោបាយលើកទី១ ដែលមិនធ្លាប់មានពីមុនមក។
លោកបានបន្តថា គណបក្សកុំម្មុយនីស្តចិនបានផ្តួចផ្តើមរៀបចំឲ្យមានជំនួបនេះឡើងបន្ទាប់ពីមហាសន្និបាតលើកទី១៩ របស់គណបក្សកុំម្មុយនីស្តចិនបានប្រព្រឹត្តទៅកាលពី១ខែមុននេះ ប្រកបដោយជោគជ័យ ដែលក្នុងនោះមានថ្នាក់ដឹកនាំចិន គណបក្សកុំម្មុយនីស្តចិនបានដាក់ចេញនូវទស្សនទានមួយក្នុងការប្រែក្លាយរៀបចំធ្វើឲ្យសង្គមដែលរស់នៅបច្ចុប្បន្ននេះមានភាពកាន់តែល្អប្រសើរឡើង ដោយសុខដុមរមនាគ្មានការជ្រៀតជ្រែក រីកចំរើនទាំងអស់គ្នាជួយគ្នាធ្វើឲ្យពិភពលោកយើងកាន់តែល្អប្រសើរឡើង។ ក្នុងកិច្ចសន្ទនារបស់បក្សកុំម្មុយនីស្តចិននេះ មានប្រតិភូប្រមាណជា៥០០នាក់មកពីបណ្តាប្រទេស១២២ចូលរួម។
លោក ស៊ី្រ ថាមរុង្គ បន្ថែមថា៖ «ក្នុងឱកាសស្នាក់នៅទីក្រុងប៉េកាំង សម្តេចតេជោនឹងជួបសម្តែងការគួរសមជាមួយនិងលោកប្រធានាធិបតី ភីហ្សីនពីង ជាអគ្គលេខាធិការនៃគណបក្សកុំម្មុយនីស្តចិន ហើយនឹងទទួលជួបជាមួយអ្នកវិនិយោគចិន ដើម្បីគៀងគរឲ្យគេមកវិនិយោគនៅកម្ពុជាយើងកាន់តែច្រើនថែមទៀត និងដើម្បីមានឱកាសដល់បងប្អូនប្រជាពលរដ្ឋយើងមានការងារធ្វើ ក៏ដូចជាជួយអភិវឌ្ឍប្រទេសយើង ជាពិសេសនៅក្នុងវិស័យកសាងហេដ្ឋារចនាសម្ព័ន្ធដូចជា ផ្លូវ ស្ពាន រថភ្លើងលើអកាស នៅពេលខាងមុខ»។
សម្តេចនឹងវិលត្រឡប់មកវិញចុះនៅទីរួមខេត្តសៀមរាប នៅថ្ងៃទី២ ខែធ្នូ ឆ្នាំ២០១៧។
ចែករំលែកព័តមាននេះ