ប្រទេសកូរ៉េខាងត្បូង ៖ កងម៉ារីនកូរ៉េខាងត្បូងគូសបញ្ជាក់ថា នាវាមុជទឹកនុយក្លេអ៊ែរអាមេរិក USS MISSISSIPPI បានឈប់សំចតកាលពីថ្ងៃទី២២ វិច្ឆិកា នៅកូរ៉េខាងត្បូងក្នុងក្របខណ្ឌនៃការដាក់ពង្រាយជាទម្លាប់មួយនៅអាស៊ី ។
យោងតាមកងកម្លាំងនាវាចរណ៍អាមេរិកនៅ កូរ៉េខាងត្បូងថា ការឈប់សំចតនៅកំពង់ផែ JEJU របស់នាវាមុជទឹកវាយប្រហារប្រភេទ VIRGINIA នេះ បញ្ជាក់ពីឆន្ទៈរបស់កងទ័ពអាមេរិកជួយថែរក្សាស្ថេរភាព និងសន្តិសុខតំបន់ ។
ក្នុងសេចក្តីប្រកាសមួយមេបញ្ជាការនាវាមុជទឹកនេះ ឧត្តមនាវី BRAD COOPER គូសបញ្ជាក់ថា កងម៉ារីនសហរដ្ឋអាមេរិក និងសាធារណរដ្ឋកូរ៉េមានភាពជាដៃគូរឹងមាំមួយ ដែលត្រូវបានពង្រឹងជាបន្តបន្ទាប់តាមរយៈបណ្តាសកម្មភាពរួមជាទម្លាប់ ។ ទស្សនកិច្ចនេះនឹងអាចឱ្យក្រុមនាវិកអាមេរិកបានឃើញពីវប្បធម៌របស់ប្រជាជនកោះ JEJU កូរ៉េខាងត្បូង ។
នាវាមុជទឹក USS MISSISSIPPI ដែលមាននាវិកប្រមាណជា១៥០នាក់ ជានាវាមុជទឹកមួយក្នុងចំណោមនាវាមុជទឹកបំបាំងកាយ និងទំនើបបំផុតទាំងឡាយលើពិភពលោក ។
នាវាមុជទឹកនេះមានបណ្តោយ១១៥ម៉ែត្រ និងចំណុះ៧.៨០០តោន អាចមុជទឹកក្នុងជម្រៅ២៥០ម៉ែត្រ ហើយមានល្បឿន៤៦គីឡូម៉ែត្រ ក្នុង១ម៉ោង ។ វាបំពាក់ដោយមីស៊ីលបណ្តែត TAMOHAWK ព្រមទាំងគ្រាប់បែកបុក MK48 ៕
ចែករំលែកព័តមាននេះ