ប្រទេសសូម៉ាលី ៖ សេនាធិការដ្ឋានកងទ័ពអាមេរិករាយការណ៍កាលពីថ្ងៃទី២១ វិច្ឆិកា ថា ពួកជីហាដក្រុម AL CHABAAB សូម៉ាលីជាង១០០នាក់ បានត្រូវស្លាប់ក្នុងការវាយប្រហារតាមអាកាសមួយរបស់អាេមរិកប្រឆាំងជំរំមួយរបស់ពួកគេ ។
ការទម្លាក់គ្រាប់បែកនេះធ្វើឡើងដោយមានការព្រមព្រៀងរបស់រដ្ឋាភិបាលសូម៉ាលីកើតមាននៅកន្លែងមួយចម្ងាយប្រមាណជា២០០គីឡូម៉ែត្រ ភាគពាយ័ព្យក្រុងម៉ូហ្គាឌីស្យូ រដ្ឋធានីសូម៉ាលី ។ នេះជាការបញ្ជាក់របស់ទីបញ្ជាការយោធាអាមេរិកនៅអាហ្វ្រិកតាមរយៈសេចក្តីប្រកាសមួយ ។ សេចក្តីប្រកាសនិយាយថា ការវាយប្រហារតាមអាកាសនឹងបន្តទៅទៀត ។
ការវាយប្រហារតាមអាកាសរបស់កងទ័ពអាមេរិកនៅសូម៉ាលី កម្រមានណាស់ ។ កាល
ពីខែមីនា ឆ្នាំ២០១៦ ការវាយប្រហារប្រហាក់ប្រហែលគ្នានេះដែរ សម្លាប់ជនសកម្មប្រយុទ្ធរបស់ក្រុម AL CHABAAB ជាអង្គការភេរវកម្មមួយមានទំនាក់ទំនងជាមួយអាល់កៃដា១៥០នាក់ ។
ពួក AL CHABAAB ត្រូវវាយបណ្តេញចេញពីក្រុងម៉ូហ្គាឌីស្យូកាលពីឆ្នាំ២០១១ ហើយបាត់បង់ការត្រួតត្រាតំបន់ទីក្រុងជាច្រើននៅស៊ូម៉ាលី ។ ក៏ប៉ុន្តែពួកនេះនៅមានវត្តមានច្រើននាភាគខាងត្បូង និងភាគកណ្តាលប្រទេស ព្រមទាំងអាចធ្វើការវាយប្រហារភេរវកម្មយ៉ាងបង្ហូរឈាមនានានៅក្នុងប្រទេស និងនៅតាមប្រទេសជាប់ជិតខាង ពិសេសប្រទេសកេនយ៉ាផង ៕
ចែករំលែកព័តមាននេះ