រាជធានីភ្នំពេញ៖ សមាជិករបស់គណៈកម្មាធិការជាតិរៀបចំការបោះឆ្នោតចំនួន ៣ រូបក្នុងចំណោមសមាជិកសរុប ៩ រូបបានសម្រេចលាឈប់ពីតួនាទីជាផ្លូវការ បន្ទាប់ពីតុលាការកំពូលចេញសាលដីកាសម្រេចរំលាយគណបក្សសង្គ្រោះជាតិ។ នេះបើយោងតាមពាក្យសុំលាលែងរបស់អ្នកទាំង ៣ ជូនសម្តេចចក្រី…
រាជធានីភ្នំពេញ៖ សមាជិករបស់គណៈកម្មាធិការជាតិរៀបចំការបោះឆ្នោតចំនួន ៣ រូបក្នុងចំណោមសមាជិកសរុប ៩ រូបបានសម្រេចលាឈប់ពីតួនាទីជាផ្លូវការ បន្ទាប់ពីតុលាការកំពូលចេញសាលដីកាសម្រេចរំលាយគណបក្សសង្គ្រោះជាតិ។ នេះបើយោងតាមពាក្យសុំលាលែងរបស់អ្នកទាំង ៣ ជូនសម្តេចចក្រី ហេង សំរិន ប្រធានរដ្ឋសភា ។
សមាជិក គ.ជ.ប ៣រូបដែលសម្រេចលាលែងពីតំណែងរូមមាន៖ (១)- លោក គួយ ប៊ុនរឿន អនុប្រធាន គ.ជ.ប, (២) លោក រ៉ុង ឈុន និង (៣) លោកស្រី តែ ម៉ានីរ៉ុង ដែលអ្នកទាំងពីរមានតួនាទីជាសមាជិក គ.ជ.ប ។
សូមបញ្ជាក់ថា អ្នកទាំង ៣ គឺជាអតីតកូតារបស់បក្សសង្គ្រោះជាតិក្នុងចំណោមកូតារបស់សរុប ៤ រូប ដូច្នេះមានន័យថា សមាជិករបស់ គ.ជ.ប ម្នាក់ទៀត គឺលោក ហ៊ីង ធីឬទ្ធិ ជាសមាជិកគណៈកម្មាធិការជាតិរៀបចំការបោះឆ្នោត (គ.ជ.ប) ដែលមកពីកូតា អតីតគណបក្សសង្គ្រោះជាតិ (CNRP) បានប្រកាសថា ខ្លួនលោកនឹងមិនលាឈប់ពីសមាជិកនោះទេ ទោះបីជាគណបក្សសង្គ្រោះជាតិ ត្រូវបានរំលាយចោល ដោយអំណាចតុលាការក៏
ដោយ។
យោងតាមលិខិតលាឈប់ អ្នកទាំង៣បានអះអាងថា ការបើកផ្លូវឱ្យ គ.ជ.ប អនុវត្តការបែងចែកអាសន្នៈនៃរដ្ឋសភាអាណត្តិទី ៥ និងអាសន្នៈក្រុមប្រឹក្សាឃុំ-សង្កាត់អាណត្តិទី ៤ឡើងវិញ ដោយយកទៅចែកចាយគណបក្សនយោបាយផ្សេងទៀត ដែលប្រជាពលរដ្ឋមិនបានបោះឆ្នោតជូនត្រូវបានមតិជាតិ និងអន្តរជាតិ ថា «គឺជាការរំលោភរដ្ឋធម្មនុញ្ញ ច្បាប់បោះឆ្នោត និងបទបញ្ជា និងនីតិវិធីនៃបោះឆ្នោត នៅក្នុងអាណត្តិនៃការបោះឆ្នោតនីមួយៗ ជាពិសេសគឺជាការរំលោភឆន្ទៈរបស់ប្រជាពលរដ្ឋ ដែលបានបោះឆ្នោតជូនគណបក្សនយោបាយដែលខ្លួនពេញចិត្តរួចហើយ»។
ពាក្យសុំលាលែងរបស់អ្នកទាំងបីបានបន្តទៀតថា៖ «ដោយមូលហេតុ និងហេតុផលដូចបានជម្រាបជូនខាងលើនេះហើយ ទើបធ្វើឱ្យយើងខ្ញុំ ជាអនុប្រធាន សមាជិក សមាជិកា គ.ជ.ប ក្នុងនាមជាអាជ្ញាកណ្តាលរៀបចំការបោះឆ្នោត មិនអាចនៅបន្តធ្វើកិច្ចការនៅក្នុងស្ថាប័នរៀបចំការបោះឆ្នោតនេះ តទៅទៀតបានឡើយ ពីព្រោះវាក្បត់ឧត្តមគតិ មនសិការ របស់យើងផ្ទាល់ខ្លួន និងក្បត់ឆន្ទៈពិតប្រាកដរបស់ប្រជាពលរដ្ឋម្ចាស់ឆ្នោត នាំឱ្យជាប់ឈ្មោះអាក្រក់ក្នុងប្រវត្តិសាស្ត្រ»៕
ចែករំលែកព័តមាននេះ