រាជធានីភ្នំពេញ៖ តារាសម្ដែងមេម៉ាយកូនមួយឌុច សុភា បដិសេធចោលមិនអធិប្បាយអ្វីទាំងអស់ចំពោះពាក្យលេចឮចុងក្រោយនេះថា នាងកំពុងតែបង្កើតស្នេហ៍ជាមួយបុរសអាណិកជននៅអូស្រ្ដាលីម្នាក់ដែលមានប្រពន្ធមិនទាន់រៀបការ ។ ក្នុងជំនួបផ្ទាល់ពេលចូលរួមកាន់ទុក្ខចំពោះការបាត់បង់ព្រះមហាវីរក្សត្រនៅស្ថានីយទូរទស្សន៍ហង្សមាស កាលពីពេលថ្មីៗនេះ ឌុច សុភា បានលើកឡើងថាចង់អ្នកណានិយាយអ្វីក៏និយាយទៅ គឺនាងសុំមិនបកស្រាយអ្វីទាំងអស់ដើម្បីកុំឱ្យតភាគវែងឆ្ងាយ ។
តារាសម្ដែងរូបនេះបដិសេធការបកស្រាយ បើទោះជាមានការលើកឡើងថា នាងកំពុងជំពប់ស្នេហាភេទដូចគ្នា និងកំពុងទាក់ទងបុរសដែលមានចំណងស្នេហ៍ពាក់ព័ន្ធហើយនោះក៏ដោយ ។ នាងនិយាយយ៉ាងខ្លីថា «ចង់អ្នកណានិយាយអ្វីនិយាយទៅ ខ្ញុំលែងខ្វល់ហើយ សំខាន់ឱ្យតែពេលពួកគេហត់ គឺពួកគេពិតជាឈប់និយាយ ប៉ុន្តែសម្រាប់ពេលនេះគឺទោះជានាងខ្ញុំធ្វើអ្វីក៏មិនទប់មាត់របស់មហាជនទាំងនោះបានដែរ» ។
ការអះអាងបែបនេះរបស់ឌុច សុភា គឺមានន័យថា ការលើកឡើងជុំវិញបញ្ហាស្នេហាជាមួយប្រុសនេះឬប្រុសនោះ និងចុងក្រោយថា នាងមានពាក់ព័ន្ធជាមួយបុរសនៅអូស្រ្តាលីម្នាក់ដែលមានប្រពន្ធមិនទាន់រៀបការនោះ នៅតែធ្វើឱ្យគេយល់ថា នាងនៅតែស្ថិតនៅក្នុងភាពអាថ៌កំបាំងក្នុងរឿងស្នេហានេះដដែល បន្ទាប់ពីនាងបានចែកផ្លូវពីស្វាមីដែលជាមន្ត្រីប៉ូលិសអន្តោប្រវេសន៍មានទ្រព្យស្ដុកម្នាក់ដោយបន្សល់ទុកកូនម្នាក់ជាចំណងដៃនោះ ។
រហូតមកដល់ពេលនេះនាងឌុច សុភា ត្រូវគេមើលឃើញថា នាងនៅតែស្រស់ស្អាត និងនៅខ្ញង់មិនចាញ់កាលពីមិនទាន់មានកូនដដែលបើទោះជាពេលនេះនាងធ្លាក់ខ្លួនអស់រថយន្តទំនើប អស់អង្គរក្សហែហមដូចពេលមានស្វាមីជាមន្ត្រីអន្តោប្រវេសន៍ព្រំដែនធ្វើជាបង្អែកនោះក៏ដោយ ។ គេសង្កេតឃើញថា ឌុច សុភាបានប្រែក្លាយពីភាពក្រអឺតក្រទមដែលនាងធ្លាប់សម្ញែងកាលពីអតីតកាលដោយសំអាងថា ខ្លួនមានឋានៈប្រហាក់ប្រហែលនឹងជំទាវម្នាក់ទាំងវ័យក្មេងនោះ មករាក់ទាក់តារារួមអាជីពវិញដូចមុនពេលនាងមិនទាន់មានស្វាមី ។
ក្នុងពិធីគោរពព្រះវិញ្ញាណក្ខន្ធព្រះមហាវីរក្សត្រឌុច សុភា ត្រូវគេមើលឃើញថាបានបង្ហូរទឹកភ្នែកដូចសិល្បករ-សិល្បការិនីផ្សេងទៀតដែរ ដោយបង្ហាញពីក្ដីក្ដុកក្ដួល និងអាឡោះអាល័យចំពោះការបាត់បង់ព្រះមហាវីរក្សត្រនរោត្តម សីហនុ ។
នាងឌុច សុភា បញ្ជាក់ថា តាំងពីនាងដឹងព្រះករុណាចូលទិវង្គតមកនាងកោសខ្យល់ញឹក ដោយសារមើលប្រវត្តិព្រះអង្គលើកណាក៏ទប់អារម្មណ៍ក្ដុកក្ដួលមិនបាន ។ គាប់ជួននាងសម្បូរការងារថត និងត្រូវបំពេញកាតព្វកិច្ចជាម្ដាយដែលមើលថែកូនប្រុសសំណព្វជារៀងរាល់យប់មិនសូវបានគេងគ្រប់គ្រាន់ទើបកាន់តែធ្វើឱ្យរាងកាយចុះខ្សោយ ។
ទោះបីយ៉ាងណាក្តី នាងសុភាអះអាងថា នាងមិនមានបញ្ហាផ្នែកសុខភាពទេក្រៅពីហត់ពេក ហើយអស់កម្លាំងតិចតួច ។រហូតមកដល់ពេលនេះឌុច សុភា នៅមិនទាន់មានស្នាដៃថ្មីនៅឡើយទេបូករួមទាំងរឿង «ចាំថ្ងៃវិលវិញ » ដែលនាងទើបសម្ដែងចប់មិនទាន់បានដាក់បញ្ចាំងនោះ ។ ឌុច សុភា ត្រូវគេឃើញមានការផ្លាស់ប្ដូរឥរិយាបទច្រើនបន្ទាប់ពីមានការរិះគន់ពាក់ព័ន្ធនឹងការវាយប្រហាររបស់នាង ចំពោះអ្នកសារព័ត៌មានកាលពីពេលថ្មីៗកន្លងមក ។ ទោះជានាងសុំមិនរំលឹកពីរឿងនោះក៏គេឃើញនាងហាក់មានការបន្ទន់ខ្លួនខុសប្លែក គឺវាស្មើនឹងការទទួលស្គាល់ និងដើម្បីលុបលាងពាក្យជ្រុលជ្រួសដែលនាងបានប្រកាសតាមបញ្ចក់ទូរទស្សន៍ធ្វើឱ្យមានប្រតិកម្មនោះ ៕
ចែករំលែកព័តមាននេះ