ខេត្តសៀមរាប ៖ កម្ពុជាមានមោទនភាពយ៉ាងខ្លាំង ដែលមានឱកាសរៀបចំនូវព្រឹត្តិការណ៍ពិព័រណ៍ទេសចរណ៍អន្តរជាតិលើកទី១ ស្របពេលដែលប្រទេសកំពុងមានសន្ដិភាព ស្ថិរភាពនយោបាយ និងរីកចម្រើនលើគ្រប់វិស័យ ។ ព្រឹត្តិការណ៍ដ៏សំខាន់មួយនេះ មិនត្រឹមតែទាក់ទាញភ្ញៀវទេសចរអន្តរជាតិ និងវិនិយោគិនមកបណ្ដាក់ទុនវិនិយោគប៉ុណ្ណោះទេ ថែមទាំងសបញ្ជាក់ថា កម្ពុជាទទួលបានសិទ្ធិស្មើមុខស្មើមាត់នៅលើឆាកអន្តរជាតិផងដែរ ។
ពិព័រណ៍នេះបានប្រារព្ធធ្វើឡើង កាលពីថ្ងៃទី ១៧-១៩ ខែវិច្ឆិកា ឆ្នាំ២០១៧ នៅមុខបរិវេណប្រាសាទបាយ័ន ខេត្តសៀមរាប ។
ថ្លែងនៅក្នុងពិធីជប់លៀងជូនប្រតិភូជាតិ និងអន្តរជាតិ ដែលបានចូលរួមក្នុងពិព័រណ៍ទេសចរណ៍កម្ពុជាអន្តរជាតិ២០១៧ (CTM) លើកទី១នៅកម្ពុជា លោកឧបនាយករដ្ឋមន្ត្រី យឹម ឆៃលី បានលើកឡើងថា ព្រឹត្តិការណ៍នេះ គឺជាពេលវេលាសមស្រប ដែលកម្ពុជាបច្ចុប្បន្នកំពុងស្ថិតក្នុងសន្តិភាព និងស្ថិរភាពនយោបាយ រួមទាំងមានការរីកចម្រើនលើគ្រប់វិស័យ ។ តាមរយៈសមិទ្ធផលខាងលើនេះ បានធ្វើឲ្យប្រទេសកម្ពុជាទទួលបានសិទ្ធិស្មើមុខស្មើមាត់នៅលើឆាកអន្តរជាតិផងដែរ ។
លោកឧបនាយករដ្ឋមន្ត្រីថ្លែងថា ៖« ជាក់ស្តែងថ្ងៃនេះ យើងបានរៀបចំពិព័រណ៍ទេសចរណ៍អន្តរជាតិលើកទី១ ដែលទទួលបានការជឿជាក់ពីអង្គការ ស្ថាប័នវាយតម្លៃអន្តរជាតិនានាតាមរយៈការផ្តល់ពានរង្វាន់ដល់កម្ពុជានាពេលកន្លងមក » ។
លោក យឹម ឆៃលី បានបង្ហាញនូវក្តីរំពឹងតាមរយៈព្រឹត្តិការណ៍ដ៏សំខាន់មួយនេះ មិនគ្រាន់តែរួមចំណែកដល់ការអភិវឌ្ឍវិស័យទេសចរណ៍នៅកម្ពុជាប៉ុណ្ណោះទេ ប៉ុន្តែព្រឹត្តិការណ៍នេះនឹងក្លាយជាឧបករណ៍ស្រូបយកភ្ញៀវទេសចរអន្តរជាតិកាន់តែច្រើនឡើងថែមទៀតមកទស្សនាកម្ពុជា ។
រដ្ឋមន្ត្រីក្រសួងទេសចរណ៍ លោក ថោង ខុន មានប្រសាសន៍ថា ព្រឹត្តិការណ៍ទេសចរណ៍អន្តរជាតិ២០១៧ និងវេទិកាទេសចរណ៍អាស៊ាន-ចិនលើកនេះ កម្ពុជានឹងទទួលបានវិនិយោគិន និងទេសចរមកពីគ្រប់ទិសទី សំខាន់ទេសចរណ៍ចិនកាន់តែច្រើននាពេលដ៏ខ្លីខាងមុខ ព្រោះយើងមានកត្តាជំរុញជាច្រើន ដែលជាសក្តានុពលដ៏អស្ចារ្យរបស់ប្រទេសកម្ពុជា ។
លោករដ្ឋមន្ត្រីបានសំណូមពរផងដែរដល់ក្រុមហ៊ុនប្រតិបត្តិករទេសចរណ៍នៃប្រទេស អាស៊ានបូកចិន ជប៉ុន និងកូរ៉េ ជួយសហការនិងផ្សព្វផ្សាយឲ្យកាន់តែទូលំទូលាយថែមទៀតទៅដល់បណ្តាញដៃគូធុរកិច្ចទាំងអស់ក្នុងតំបន់ និងពិភពលោក អំពីពិព័រណ៍ទេសចរណ៍កម្ពុជាអន្តរជាតិ២០១៧នេះ ដើម្បីជំរុញការអភិវឌ្ឍវិស័យទេសចរណ៍នៅកម្ពុជា ក៏ដូចក្នុងតំបន់ ។
គួរបញ្ជាក់ថា ក្នុងឆ្នាំ២០១៦ កន្លងទៅកម្ពុជាទទួលបានទេសចរអន្តរជាតិជាង៥លាននាក់ ក្នុងកំណើន៥% ក្នុងនោះទេសចរចិនមានចំនួនជាង៨៣ម៉ឺននាក់ ។ ដោយឡែក រយៈពេល៩ខែដើមឆ្នាំ២០១៧នេះ កម្ពុជាទទួលបានទេសចរអន្តរជាតិជាង៣,៩លាននាក់ ក្នុងកំណើន១១,៥% ក្នុងនោះទេសចរចិនមានចំនួនជាង៨៤ម៉ឺននាក់ ក្នុងកំណើន៤៦% ធៀបនឹងរយៈពេលដូចគ្នាឆ្នាំ២០១៦ ។
តាមការព្យាករនៅឆ្នាំ២០១៧នេះ កម្ពុជានឹងអាចទទួលបានទេសចរចិនប្រមាណ១លាននាក់ ហើយនៅឆ្នាំ២០២០ នឹងកើនដល់យ៉ាងតិច២លាននាក់ ក្នុងចំណោមទេសចរអន្តរជាតិសរុបប្រមាណ៧លាននាក់ ។ ដើម្បីសម្រេចតាមគោលដៅនេះ បច្ចុប្បន្នកម្ពុជាកំពុងរៀបចំគោលនយោបាយ និងយុទ្ធសាស្ត្រជាច្រើន ដូចជា ការចុះអនុស្សរណៈបើកការហោះហើរ និងរៀបចំព្រឹត្តិការណ៍សំខាន់ៗ និងពង្រឹងសេវាបដិសណ្ឋារកិច្ច និងការបណ្តុះបណ្តាលធនធានមនុស្សក្នុងវិស័យនេះ ធ្វើយ៉ាងណាទាក់ទាញភ្ញៀវទេសចរអន្តរជាតិ ដែលធ្វើដំណើរកម្សាន្ដនៅជុំវិញពិភពលោកកំពុងមានកំណើនខ្ពស់ ពិសេសភ្ញៀវទេសចរចិនឲ្យមកទស្សនានៅកម្ពុជា ។
លោក ហូ វណ្ឌី ទីប្រឹក្សាសមាគមទីភ្នាក់ងារទេសចរណ៍កម្ពុជា បានថ្លែងថា កម្ពុជានឹងសម្រេចបានកំណើនភ្ញៀវទេសចរអន្តរជាតិ តាមការព្យាកររបស់ក្រសួងទេសចរណ៍ ក្នុងនោះភ្ញៀវទេសចរចិននឹងឈរចំណាត់ថ្នាក់លេខ១។ លោកថា កំណើនភ្ញៀវទេសចរឆ្នាំនេះ ឆ្លុះបញ្ចាំងនូវការអនុវត្តគោលនយោបាយរបស់រាជរដ្ឋាភិបាលមានប្រសិទ្ធភាព ជាពិសេសគោលនយោបាយបើកចំហជើងមេឃរបស់រាជរដ្ឋាភិបាលកម្ពុជា ។ លោកបន្តថា ៖« ទេសចរណ៍ ជាវិស័យមួយ ដែលបានជួយជំរុញកំណើនសេដ្ឋកិច្ចយ៉ាងខ្លាំង ព្រោះពេលភ្ញៀវទៅដល់ទីណា តែងតែមានសកម្មភាពសេដ្ឋកិច្ចកើតឡើងនៅទីនោះ » ។
តាមរបាយការណ៍របស់អង្គការទេសចរណ៍ពិភពលោក (UNWTO) បានឲ្យដឹងថា អាស្រ័យដោយកត្តាអំណោយផល ធ្វើឲ្យតម្រូវការនៃការធ្វើដំណើរទេសចរណ៍របស់ប្រជាពលរដ្ឋចិននៅក្នុងឆ្នាំ២០១៤ មានចំនួន១៣០លាននាក់ រួមទាំងការចំណាយថវិកាក្នុងការធ្វើដំណើរប្រមាណ២៥០ប៊ីលានដុល្លារ ។ ទន្ទឹមនឹងនេះ ប្រជាពលរដ្ឋចិនបានចូលមកទស្សនាកម្សាន្ដនៅតំបន់អាស៊ាន ប្រមាណ១២លាននាក់ ៕
ចែករំលែកព័តមាននេះ