រាជធានីភ្នំពេញ ៖ កម្ពុជាបាននាំចេញជ័រកៅស៊ូ បានជាង១៣ម៉ឺនតោនក្នុងរយៈពេល១០ខែ ឆ្នាំ២០១៧នេះដែល ទទួលបានចំណូលប្រមាណជាង ២០០លានដុល្លារសហរដ្ឋអាមេរិក។ តែអ្វីដែលប្រែប្រួលគួរឱ្យកត់សម្គាល់នោះគឺថា តម្លៃកៅស៊ូ ក្នុងខែតុលា…
រាជធានីភ្នំពេញ ៖ កម្ពុជាបាននាំចេញជ័រកៅស៊ូ បានជាង១៣ម៉ឺនតោនក្នុងរយៈពេល១០ខែ ឆ្នាំ២០១៧នេះដែល ទទួលបានចំណូលប្រមាណជាង ២០០លានដុល្លារសហរដ្ឋអាមេរិក។ តែអ្វីដែលប្រែប្រួលគួរឱ្យកត់សម្គាល់នោះគឺថា តម្លៃកៅស៊ូ ក្នុងខែតុលា បានធ្លាក់ចុះ៦៣ដុល្លារក្នុងតោន បើធៀបនឹងកញ្ញា ឆ្នាំ២០១៧កន្លងទៅ។ នេះបើតាមរបាយការណ៍ផ្លូវការរបស់អគ្គនាយកដ្ឋានកៅស៊ូ ស្ដីពីស្ថានភាពការងាររបស់អគ្គនាយកដ្ឋានកៅស៊ូ ប្រចាំខែតុលា ឆ្នាំ២០១៧ ដែលបានចេញផ្សាយកាលពីពេលថ្មីៗនេះ។
បើទោះបីតម្លៃកៅស៊ូ ក្នុងខែតុលា ឆ្នាំ២០១៧នេះ ធ្លាក់ចុះក៏ដោយ តែបើធៀបនឹងខែតុលា ឆ្នាំ២០១៦ តួលេខហាក់ដូចជាល្អ ព្រោះវាបានឡើងចំនួន២២៦ដុល្លារក្នុងមួយតោនស្មើនឹង១៧%។
របាយការណ៍របស់អគ្គនាយកដ្ឋានកៅស៊ូបានឱ្យដឹងបន្តថា ផលិតផលក្នុងខែតុលា ឆ្នាំ២០១៧ សម្រេចបានចំនួន ១៨,០៥១ តោន កើនឡើងចំនួន១,៦១៤តោន ស្មើនឹង១០ភាគរយ ធៀបនឹងខែកញ្ញា ឆ្នាំ២០១៧ និងបានកើនឡើងចំនួន៤,៧៨៧តោន ស្មើនឹង៣៦% ធៀបនឹងខែតុលា ឆ្នាំ២០១៦។ ចំណែកការប្រមូលចំណូលថវិកាចូលរដ្ឋ ក្នុងខែតុលាឆ្នាំ២០១៧ បានចំនួន ១១១,៧១៨,៩២៨រៀល។
សូមបញ្ជាក់ថា ចាប់ពីខែមករា ដល់ខែតុលា ឆ្នាំ២០១៧ កម្ពុជាប្រមូលផលជ័រកៅស៊ូបានចំនួន ១៣០,៧២៨ តោន កើនឡើងចំនួន ៣០,៨៧០តោន ស្មើនឹង៣១% បើធៀបរយៈពេលដូចគ្នាទៅនឹងឆ្នាំមុន ដោយទទួលបានទឹកប្រាក់ចំនួន ២១៦,២២៤,១១២ដុល្លារ ដែលតម្លៃលក់ជ័រកៅស៊ូ មធ្យមក្នុងរយៈពេល១០ខែគឺ ១,៦៥៤ដុល្លារក្នុង១តោន បានកើនឡើង៥៣៣ ដុល្លារក្នុងតោន។
ជ័រកៅស៊ូរបស់កម្ពុជា ត្រូវបាននាំចេញទៅកាន់ប្រទេសចិន វៀតណាម សិង្ហបុរី និងម៉ាឡេស៊ី។ ឆ្នាំ២០១៦ កន្លងទៅ កម្ពុជាបាននាំចេញជ័រកៅស៊ូបានជាង១៤ម៉ឺនតោន ទទួលបានទឹកប្រាក់ជាង ១៨០លានដុល្លារ៕
ចែករំលែកព័តមាននេះ