រាជធានីភ្នំពេញ ៖ ពិធីការិនីប្រចាំស្ថានីយទូរទស្សន៍អប្សរា កញ្ញា នៅ សុនិតា បានបង្ហាញភាពជោគជ័យការសម្ដែងរបស់ខ្លួននៅប្រទេសអូស្ដ្រាលី រួមជាមួយតារាសម្ដែង តារាចម្រៀងជាច្រើនរូបទៀតដែលបានរួមដំណើរជាមួយគ្នា ។ សុនិតា និយាយថា នៅប្រទេសអូស្ដ្រាលីបងប្អូនខ្មែរយើងរស់នៅទីនោះបានគាំទ្រចំពោះការសម្ដែងរបស់តារាខ្មែរយើង ដោយរាល់ការសម្ដែងម្ដងៗទទួលបានការចូលរួមយ៉ាងច្រើនកុះករ ធ្វើឱ្យសិល្បករ សិល្បការិនីខ្មែរយីងមានទឹកចិត្ដរំភើប និងសប្បាយរីករាយយ៉ាងខ្លាំង ។
កញ្ញា នៅ សុនិតា មានអាយុ១៩ឆ្នាំ កំពុងបំរើការងារក្នុងស្ថានីយទូរទស្សន៍អប្សរា ជាពិធីការិនីកម្មវិធីកុមារឆ្លាត។ បើទោះបីជារូបនាងមិនទាន់មានឈ្មោះល្បីក្នុងចំណោមពិធីការិនីនៅកម្ពុជាក្ដី តែទេពកោសល្យ និងទឹកដមសម្លេង រួមទាំងការប្រើពាក្យពេចន៍របស់នាងបានបង្ហាញថា នាពេលអនាគតនាងប្រាកដជានឹងក្លាយជាពិធីការិនីដែលមានឈ្មោះល្បីមិនខាន ។ សុនិតា និយាយថា ក្រៅពីអាជីពជាពិធីការិនីប្រចាំស្ថានីយទូរទស្សន៍អប្សរា នាងជានិស្សិតឆ្នាំទី១នៅសាកលវិទ្យាល័យភូមិន្ទនីតិសាស្ដ្រ និងវិទ្យាសាស្ដ្រសេដ្ឋកិច្ច ផ្នែកសេដ្ឋកិច្ច និងធនាគារ ។ នាង គឺជាតារាឯកចំណាត់ថ្នាក់លេខ១ ខាងថតរូបស្អាតរបស់ក្រុមហ៊ុនប្រ៊ីសស្ដុន ហើយក៏ជាតារាបង្ហាញម៉ូដដ៏ស្រស់ស្អាតផងដែរ ។ នាងធ្លាប់ថត ស្ប៉តពាណិជ្ជកម្មឱ្យក្រុមហ៊ុនខេស៊ីមេន និងសម្ដែងកាយវិការខារ៉ាអូខេឱ្យក្រុមហ៊ុនសាន់ដេជាច្រើនវ៉ុល ។ សំខាន់ជាងនេះទៀត នាងធ្លាប់ចូលរួមសម្ដែងក្នុងខ្សែរឿងភាគបានចំនួនពីររឿង គឺរឿងដងវិថីតារា និងរឿងល្បិចស្រី សំរាប់បញ្ចាំងនៅស្ថានីយទូរទស្សន៍ CTN ។ ទោះបីជាសុនិតា កំពុងដើរលើវិថីសិល្បៈយ៉ាងណាក៏ដោយចុះ តែនាងបានបង្ហាញនូវទស្សនៈរបស់ខ្លួនថា នាងស្រឡាញ់សិល្បៈតាំងពីតូចពិតមែន តែនាងប្រហែលមិនចាប់យកអាជីពជាអ្នកសិល្បៈជារៀងរហូតទេ ព្រោះសព្វថ្ងៃនាងមានឪពុកជាមន្ដ្រីរាជការ ដែលមានជីវភាពអាចរស់ដោយស្រួលបាន។ ម្យ៉ាងទៀតការសិក្សារបស់នាងកំពុងតែត្រួសត្រាយផ្លូវសំរាប់អនាគតដ៏ល្អសំរាប់រូបនាង ។
ពាក់ព័ន្ធដល់ការរិះគន់ទាំងឡាយដែលតែងតែមានចំពោះអ្នកសិល្បៈសំខាន់អំពីបញ្ហាស្នេហានោះ សុនិតា និយាយថា នាងហាក់មិនយកចិត្ដទុកដាក់ចំពោះការរិះគន់ទាំងអស់នោះទេ ព្រោះរឿងល្អនិងអាក្រក់អាស្រ័យលើបុគ្គលម្នាក់ៗជាអ្នកប្រព្រឹត្ដ។ ដូច្នេះមិនចាំបាច់មានការរិះគន់ពីខាងក្រៅក៏ម្នាក់ៗបានដឹងដោយខ្លួនឯងថា យើងជាមនុស្សល្អ ឬមិនល្អនោះ ។ ជាការពិតណាស់ អ្នកសិល្បៈភាគច្រើន គឺរងនូវការរិះគន់អំពីការភ្លើតភ្លើន និងបញ្ហាស្នេហា សំខាន់ការលង់ខ្លួននឹងបញ្ហាទ្រព្យសម្បត្ដិរបស់បុរស ដែលធ្វើឱ្យមានការបាត់បង់នូវអ្វីជាកិត្ដិយសសំរាប់ជីវិត ។ ទោះជាយ៉ាងណាក្ដី អ្នកសិល្បៈភាគច្រើនគិតថា ជាបញ្ហាដែលចៀសមិនរួចក្នុងពេលដែលអ្នកសិល្បៈត្រូវប្រឈមមុខនឹងមតិចំរុះដែលមានទាំងល្អ និងអាក្រក់ ។ ដូច្នេះទោះបីដំណើររបស់ពួកគេជួបឧបសគ្គ ឬ ជួបនូវភាពអាម៉ាស់អ្វីមួយក្ដី ក៏ពួកគេចាត់ទុកថា នោះជារឿងធម្មតា។ ដូច្នេះអ្វីដែលជាគំនិតរបស់ សុនិតា លើកឡើងខាងលើគឺមិនខុសអ្វីពីអ្នកសិល្បៈដទៃទៀតដែរ ។ មហាជននិយាយថា អ្នកសិល្បៈគ្រប់រូបត្រូវគិតអំពីតម្លៃសីលធម៌ វប្បធម៌ ប្រពៃណី ដ៏ផូរផង់របស់ជាតិ នោះទើបខ្លួនឯងមានកិត្ដិយស និងការគាំទ្រមិនសាបសូន្យ ៕
ចែករំលែកព័តមាននេះ