ខេត្តសៀមរាប ៖ កាលពីរសៀលថ្ងៃទី៩ ខែវិច្ឆិកា ឆ្នាំ២០១៧ នៅសណ្ឋាគារសុខា សៀមរាប មានរៀបចំពិធីលៀងសាយភោជន៍ ទទួលស្វាគមន៍ចំពោះគណៈប្រតិភូបវរកញ្ញាពិភពលោកឆ្នាំ២០១៧ ដែលទៅធ្វើទស្សនកិច្ចនៅលើទឹកដីប្រវត្តិសាស្ត្រសៀមរាប ដើម្បីឈ្វេងយល់ពីសក្តានុពលទេសចរណ៍ដែលជាតំបន់គោលដៅទេសចរណ៍វប្បធម៌ ធម្មជាតិ ប្រវត្តិសាស្ត្រ ហើយក៏ជាសម្បត្តិបេតិកភណ្ឌពិភពលោករបស់មនុស្សជាតិផងដែរ ។
កម្មពិធីនេះធ្វើឡើងក្រោមវត្តមានរបស់លោកបណ្ឌិតឃឹម ប៊ុនសុង អភិបាលខេត្តលោកបណ្ឌិតនូ ផល្លា ប្រធានក្រុមប្រឹក្សាខេត្ត និងលោកជំទាវ រួមទាំងលោក លោកស្រីជាគណៈអភិបាលខេត្ត សមាជិកក្រុមប្រឹក្សាខេត្ត អស់លោក លោកស្រីជាថ្នាក់ដឹកនាំមន្ទីរ អង្គភាពនានា ។
នាឱកាសនោះម្ចាស់មកុដបវរកញ្ញាពិភពលោកឆ្នាំ២០១៦ និងបេក្ខនារីបវរកញ្ញាពិភពលោកឆ្នាំ២០១៧ បានលើកឡើងពីភាពអស្ចារ្យនៃព្រះរាជាណាចក្រកម្ពុជា ក្នុងការអភិវឌ្ឍលើគ្រប់វិស័យ សំខាន់នៅខេត្តសៀមរាប ដែលសម្បូរទៅដោយសម្បត្តិវប្បធម៌ និង ធម្មជាតិ បាន និងកំពុងទាក់ទាញអារម្មណ៍ភ្ញៀវទេសចរចូលមកទស្សនាកម្សាន្តពីគ្រប់មជ្ឈដ្ឋាន នានាលើពិភពលោក ដែលប្រកបទៅដោយសុខសន្តិភាព និងសុវត្ថិភាព ។
លោកបណ្ឌិតឃឹម ប៊ុនសុង អភិបាលខេត្តសៀមរាប បានស្វាគមន៍ចំពោះប្រតិភូបវរកញ្ញាពិភពលោកឆ្នាំ២០១៧ ដែលមកទស្សនកិច្ចដើម្បីឈ្វេងយល់ពីសក្តានុពលទេសចរណ៍នៅខេត្តសៀមរាប ដែលជាតំបន់គោលដៅទេសចរណ៍វប្បធម៌ និងធម្មជាតិ ហើយក៏ជាសម្បត្តិបេតិកភណ្ឌពិភពលោកយើងនាពេលនេះផងដែរ។ លោកបណ្ឌិតក៏បានលើកឡើងផងដែរអំពីសក្តានុពលរបស់ខេត្តសៀមរាប និងផ្នែកសន្តិសុខ សណ្តាប់ធ្នាប់ បរិស្ថាន អនាម័យ និងជីវភាពរស់នៅរបស់ប្រជាពលរដ្ឋខេត្តសៀមរាប ដោយពឹងផ្អែកលើវិស័យកសិកម្ម និងទេសចរណ៍ ។
លោកអភិបាលខេត្តថ្លែងថា ខេត្តសៀមរាបជាអតីតរាជធានីនៃអធិរាជាណាចក្រខ្មែរសម័យអង្គរ នាសតវត្សទី៩ ដល់ទី១៤ ដែលជាទីក្រុងដ៏ប្រណីតផ្នែកវប្បធម៌ប្រវត្តិសាស្ត្រមួយនៅអាស៊ី ដែលមានកេរមរតកវប្បធម៌ដ៏សម្បូរបែបជាច្រើនជាស្នាដៃនៃបុព្វបុរសជំនាន់ដើមបន្សល់ទុក ហើយបានក្លាយជាកំណប់ទ្រព្យដ៏មហាសាល ដែលធ្វើឲ្យខេត្តសៀមរាបនាពេលបច្ចុប្បន្ននេះក្លាយជាតំបន់គោលដៅទេសចរណ៍ វប្បធម៌ និងធម្មជាតិដ៏សំខាន់មួយរបស់កម្ពុជា ក៏ដូចលើពិភពលោកទាំងមូលផងដែរ ។ កំណើននៃភ្ញៀវទេសចរសំខាន់នៅ១០ខែឆ្នាំ២០១៧នេះ ខេត្តសៀមរាបទទួលបានភ្ញៀវទេសចរសរុប៤លាន៧០២ពាន់១៣៦នាក់ (កើនឡើង១២,១១% ប្រៀធៀបរយៈពេលដូចគ្នាឆ្នាំ២០១៦) ភ្ញៀវអន្តរជាតិ១លាន៩៤០ពាន់៨៣២នាក់ (កើនឡើង១២,២៧% ប្រៀបធៀបរយៈពេលដូចគ្នាឆ្នាំ២០១៦) ក្នុងនោះភ្ញៀវទេសចរចិន ជាប់លំដាប់ថ្នាក់ទី១ ។
ស្របពេលជាមួយនឹងកំណើនភ្ញៀវទេសចរនេះ ខេត្តបាន និងកំពុងពង្រឹងគុណភាព និង ពង្រីកវិសាលភាពនៃសេវាទេសចរណ៍ និងសេវាចាំបាច់ដទៃទៀតដែលជាតម្រូវការរបស់ភ្ញៀវទេសចរឆ្លើយតបទៅនឹងកំណើននោះ ស្របតាមគោលនយោបាយទេសចរណ៍នៃព្រះរាជាណាចក្រកម្ពុជា គឺ «ទីក្រុងស្អាត រមណីយដ្ឋានស្អាត សេវាល្អ បដិសណ្ឋារកិច្ចល្អ» ។ កត្តាសំខាន់លើការងារសន្តិសុខ សណ្តាប់ធ្នាប់សាធារណៈដែលមានតួនាទីស្នូល ដើម្បីធានានូវភាពសុខដុមជូនភ្ញៀវទេសចរ និងប្រជាពលរដ្ឋទូទៅឲ្យមានភាពកក់ក្តៅ និងមិនបាត់ឱកាសក្នុងការប្រកបមុខរបរសម្រាប់ទ្រទ្រង់ជីវភាពប្រចាំថ្ងៃ ក៏ដូចជាដំណើរកម្សាន្តរបស់ភ្ញៀវទេសចរគ្រប់រមណីយដ្ឋាន និងគ្រប់ទីកន្លែងទាំងនៅទីក្រុង និងនៅជនបទដែលបណ្តាលមកពីបញ្ហាអសន្តិសុខនោះឡើយ ។ ម្យ៉ាងទៀតការអញ្ជើញមកបំពេញទស្សនៈ របស់ប្រតិភូបវរកញ្ញាពិភពលោកនាពេលនេះ ជាការបញ្ជាក់ឲ្យឃើញកាន់តែច្បាស់ថាកម្ពុជា ទទួលបានយ៉ាងពេញលេញនូវសន្តិសុខ ស្ថិរភាពនយោបាយ និងការអភិវឌ្ឍ ការរីកចម្រើនឥតឈប់ឈរ ។ ជាមួយគ្នានេះដែរក៏បានឃើញផ្ទាល់ភ្នែកអំពីស្នារដៃដ៏ល្អឯករបស់បុព្វបុរសខ្មែរដែលបានបន្សល់ទុកនូវប្រាង្គប្រាសាទ ដល់កូនចៅជំនាន់ក្រោយ និងបានឈ្វេងយល់ពីវប្បធម៌ អរិយធ៌ម និងទំនៀមទម្លាប់ដ៏ល្អផូរផង់របស់ប្រជាពលរដ្ឋខ្មែរយើង ៕
ចែករំលែកព័តមាននេះ