រាជធានីភ្នំពេញ ៖ អ្នកស្រី ស កេសារ៉ា ជាតារាភាពយន្តជើងចាស់ជំនាន់អ្នកស្រីឌី សាវ៉េត ហើយបន្តប្រឡូកការងារមួយនេះមកទល់ជំនាន់ថ្មី ។ ដោយមានទឹកចិត្តស្រលាញ់សិល្បៈ អ្នកស្រីកេសារ៉ា នឹងនាំយកខ្សែភាពយន្តខ្មែរមួយចំនួនទៅដាក់បញ្ចាំងនៅសហរដ្ឋអាមេរិក ។ ការប្តេជ្ញាបែបនេះធ្វើឡើងកាលពីថ្ងៃទី៧ វិចិ្ឆកា ឆ្នាំ២០១៧ នៅអាកាសយានដ្ឋានអន្តរជាតិភ្នំពេញខណៈអ្នកស្រីស កេសារ៉ា និងស្វាមីចេញដំណើរទៅអាមេរិក។
នាឱកាសនោះអ្នកស្រីស កេសារ៉ា ចាងហ្វាងផលិតកម្មស កេសារ៉ា លើកឡើងថា អ្នកស្រី និងស្វាមីចេញទៅអាមេរិកកម្សាន្តផង និងពិភាក្សាពីការនាំយកខ្សែភាពយន្តខ្មែរយើងនាពេលបច្ចុប្បន្ននេះទៅដាក់បញ្ចាំងផង ។
អ្នកស្រីស កេសារ៉ា និយាយថា «អាណិតកុនខ្មែរយើងដែលធ្លាក់ចុះ ហើយចង់ឱ្យបងប្អូននៅអាមេរិកបានទស្សនារឿងខ្មែរម្តងគ្រាដែលកន្លងមកសម្បូរតែតារាទៅច្រៀងរាំ ។ ខ្ញុំគ្រោងពិភាក្សាយ៉ាងលម្អិតជាមួយមេធាវីនៅអាមេរិក និងម្ចាស់ស្ពុនស៊័រ ឬសមាគមខ្មែរនៅអាមេរិក ដើម្បីយករឿងខ្មែរយើងទៅបញ្ចាំង និងយកតារាក្នុងសាច់រឿងទប្រមាណជា២ឬ៣ដួងទៅជាមួយដែរ » ។
អ្នកស្រីស កេសារ៉ា ឱ្យដឹងថា ភាពយន្តខ្មែរចំនួនបួនរឿង បានជ្រើសរើសរួចហើយសម្រាប់បញ្ចាំងនៅរដ្ឋកាលីហ្វ័៊រនីញ៉ា គឺរឿង «វិកលចរិត» រឿង«ធ្មប់» របស់ផលិតកម្មមាតុចក្រ រឿង«រ៉ូហ្សា៥»របស់ផលិតកម្មកេសារ៉ា និងរឿងដុំមួយទៀតរបស់ផលិតកម្មមហាហង្ស ។ ការបញ្ចាំងនេះគ្រោងនឹងធ្វើឡើងមុនបុណ្យចូលឆ្នាំខ្មែរឆ្នាំ២០១៨ ។ ក្រៅពីនេះមានគម្រោងធានាលោកហ៊ុយ យ៉ាឡេង តួអង្គរឿងវិកលចរិត កញ្ញាដួង ម៉ានិច និងកញ្ញាហ៊ិន ច័ន្ទនិរ័ត្ន ទៅអាមេរិកដែរ នាពេលនោះ ព្រោះសុទ្ឋតែជាតួអង្គសំខាន់នៃសាច់រឿង និងល្បីឈ្មោះនាពេលសព្វថ្ងៃ ។
លោកហ៊ុយ យ៉ាឡេង សម្តែងការរំភើបដែលដឹងថាមានគម្រោងយកភាពយន្តររបស់លោករឿង«វិកលចរិត» និងរឿង«ធ្មប់»យកទៅបញ្ចាំងនៅអាមេរិក ។ «យើងរត់ការសំណុំឯកសារ និងរង់ចាំវីសា ហើយខ្ញុំរំពឹងថាស្ថានទូតអាមេរិកនៅកម្ពុជានឹងផ្តល់ការអនុញ្ញាតដើម្បីឱ្យរឿងខ្មែរយើងដែលមិនដែលបានបញ្ចាំងជូនខ្មែរនៅឯនាយសមុទ្រសោះបានទស្សនាម្តង ។ លើសពីនេះខ្ញុំក៏ត្រូវបានរៀបគម្រោងទៅទីនោះដែរ ដោយខ្ញុំ និងតារាស្រីទៅជាមួយនឹងរៀបចំគម្រោងសម្តែងក្រៅឆាកខ្លះដើម្បីឱ្យមានសភាពប្លែកចែកជូនពុកម៉ែនៅអាមេរិក» ។
លោកហ៊ុយ យ៉ាឆឡេង ចង់ឱ្យកញ្ញាហ៊ិន ច័ន្ទនិរ័ត្ន បានទៅអាមេរិកដែរព្រោះនាងជាតួអង្គក្នុងរឿង«ធ្មប់» ។
ចំណែកកញ្ញាដួង ម៉ានិច រីករាយដែល ផលិតកម្មកេសារ៉ាមានគម្រោងធានានាងទៅអាមេរិកទីដែលនាងមិនដែលទៅសោះ ៕
ចែករំលែកព័តមាននេះ