រាជធានីភ្នំពេញ ៖ សម្តេចនាយករដ្ឋមន្ត្រីហ៊ុន សែន បានថ្លែងថា រដ្ឋាភិបាលបាននឹងខិតខំទាក់ទាញវិនិយោគិនពីបរទេសឱ្យមកវិនិយោគនៅប្រទេសកម្ពុជាបន្ថែមទៀត ដើម្បីបង្កើនការងារសម្រាប់ពលរដ្ឋក្នុងស្រុក។ សម្តេចបានលើកឡើងបែបនេះនៅក្នុងពិធីជួបសំណេះសំណាលជាមួយកម្មករ កម្មការិនីប្រមាណ ១ម៉ឺន៤ពាន់នាក់ មកពីរោងចក្រចំនួន២០ នៅតំបន់ចំការដូង ក្នុងខណ្ឌដង្កោ។
សម្តេចបានបញ្ជាក់ថា ការបង្កើនអ្នកវិនិយោគទុននេះ ខណៈសម្តេចសង្កេតឃើញថាកំណើនយុវជនដែលគ្រប់អាយុត្រូវបំពេញការងារបានកើនឡើងគួរឱ្យកត់សម្គាល់ និងដើម្បីកាត់បន្ថយការចំណាកស្រុកផងដែរ។ ជាមួយនឹងការបង្កើនការងារនេះ សម្តេចបញ្ជាក់ថា រដ្ឋាភិបាលនឹងបង្កើនប្រាក់បៀរវត្សសម្រាប់កម្មករផងដែរ ដែលការតម្លើងនឹងធ្វើឡើងនៅឆ្នាំបន្តបន្ទាប់។
សម្តេចបានអះអាងថា ដើម្បីទាក់ទាញវិនិយោគទុនបរទេសឱ្យចាប់អារម្មណ៍មកវិនិយោគនៅកម្ពុជា រដ្ឋាភិបាលនឹងបន្តអភិវឌ្ឍន៍ផ្លូវ ថ្នល់ ស្ពាន កំពង់ផែ ព្រលានយន្តហោះ ព្រមទាំងធ្វើឱ្យតម្លៃអគ្គិសនីមានតម្លៃថោក ដើម្បីប្រកួតប្រជែងជាមួយប្រទេសផ្សេងទៀត។ លើសពីនេះទៅទៀត រដ្ឋាភិបាលមិនត្រូវឱ្យម្ចាស់ក្រុមហ៊ុន រោងចក្រ បើកប្រាក់ខែឱ្យបុគ្គលជាប្រាក់រៀល និងមិនតម្រូវឱ្យមានភាគហ៊ុនក្នុងស្រុក៕
ចែករំលែកព័តមាននេះ