នាំមកជូនដោយ Forte Insurance
រាជធានីភ្នំពេញ ៖ ដោយសារតែជំងឺមហារីកមាត់ស្បូនកំពុងតែវាយលុកលើស្ត្រីកម្ពុជាយ៉ាងខ្លាំងក្លា ការយល់ដឹងអំពីវិធីបង្ការជំងឺនេះ គឺពិតជាសំខាន់ណាស់ ។ ជំងឺមហារីកមាត់ស្បូនត្រូវបានបង្កឡើងដោយវីរុស HPV ហើយវីរុស HPV មានពីរប្រភេទដែលមានហានិភ័យខ្ពស់ (High Risk) និងបង្កជាមហារីកមាត់ស្បូន ។
លោកស្រីឱសថបណ្ឌិតជំនាន់ទី ៦ ដោក ដាលីស មានប្រសាសន៍ថា វ៉ាក់សាំងបង្ការជំងឺមហារីកមាត់ស្បូន គឺមានពីរប្រភេទ ហើយការចាក់វ៉ាក់សាំងនេះ គឺមានប្រយោជន៍បំផុតដើម្បីការពារស្ត្រីមិនឲ្យកើតមានជំងឺមហារីកមាត់ស្បូន ហើយក៏ដូចជាការកាត់បន្ថយអត្រាស្លាប់ដែរ ។ ពីព្រោះយើងឥតដឹងទេថា អនាគតនឹងកើតលើអ្នកណាទេ ព្រោះគេរកឃើញថា រៀងរាល់១នាទីម្តង គឺត្រូវបានរកឃើញថា មានស្ត្រីម្នាក់កើតជំងឺមហារីកមាត់ស្បូន ។
ហេតុដូច្នេះហើយមកដល់ត្រឹមខែមេសា ឆ្នាំ២០១៧នេះ មានប្រទេសចំនួន ៧១ ហើយដែលបានដាក់បញ្ជូលការចាក់វ៉ាក់សាំងមហារីកមាត់ស្បូនចូលទៅក្នុងកម្មវិធីរបស់ជាតិរបស់គាត់ ។ ការចាក់វ៉ាក់សាំងតែមួយមុខគត់ គឺមិនអាចការពារស្ត្រីពីជំងឺមហារីកមាត់ស្បូន ១០០%ទេ គឺទាមទារឲ្យមានការពិនិត្យមាត់ស្បូនជាប្រចាំជាមួយគ្រូពេទ្យជំនាញ។
យ៉ាងណាមិញ ការចាក់វ៉ាក់សាំង HPV ពេលមានផ្ទៃពោះមិនគួរធ្វើនោះទេ ។ លោកស្រីឱសថបណ្ឌិតបន្តទៀតថា បើសិនជាស្ត្រីបានចាក់វ៉ាក់សាំងលើកទី១ ស្រាប់តែខែបន្ទាប់រកឃើញថា ខ្លួនមានផ្ទៃពោះនោះ គឺត្រូវបញ្ឈប់ការចាក់វ៉ាក់សាំងHPV ជាបន្ទាន់។
ជាចុងក្រោយលោកស្រីឱសថបណ្ឌិតវ័យ ៣៣ ឆ្នាំរូបនេះបានផ្តាំផ្ញើថា ៖ «ការពិតខ្ញុំចង់ផ្ញើសារទៅកាន់អ្នកម្តាយទាំងឡាយដែលមានកូនស្រីវ័យចាប់ពី ៩ ឆ្នាំឡើង ត្រូវនាំកូនស្រីទៅទទួលសេវាចាក់វ៉ាក់សាំងការពារមហារីកមាត់ស្បូនហ្នឹងឱ្យហើយទៅ ពីព្រោះវាជាកាដូមួយដ៏ល្អសម្រាប់កុមារីដែលចាប់ពីអាយុ៩ឆ្នាំហ្នឹង ដើម្បីការពារអាយុជីវិតនាពេលអនាគតរបស់ពួកគាត់ កុំឲ្យកើតជំងឺមហារីកមាត់ស្បូន។ ចំណែកនារីៗដែលធ្វើការងារតាមស្ថាប័ននានា ចង់និយាយថា យើងស្រលាញ់ការងារ លុយក៏យើងស្រលាញ់ ចំណែកប្តីក៏យើងស្រលាញ់ អញ្ចឹងបើទោះបីជាថវិកាមានកំណត់យ៉ាងណា ក៏ត្រូវចេះស្រលាញ់ខ្លួនឯងមុនគេ។ បើសិនយើងមានបញ្ហាសុខភាព ដូចជាជំងឺមហារីកមាត់ស្បូន ពិតជាឥតមានកម្លាំងទៅរកលុយចិញ្ចឹមកូន ហើយពេលយើងឈឺ ប្តីយើងក៏អាចថា មិនស្រលាញ់ដូចមុនទេ អញ្ចឹងត្រូវស្រលាញ់ខ្លួន ដោយទៅពិនិត្យមាត់ស្បូន និងការទទួលការការពារមាត់ស្បូន» ៕
ចែករំលែកព័តមាននេះ