រាជធានីភ្នំពេញ ៖ មានយុវជនខ្មែរភាគតិចណាស់ដែលចាប់អារម្មណ៍ចង់រៀនជំនាញខាងអាកាសចរណ៍ ហើយក៏មិនដែលចាប់អារម្មណ៍ពីតម្លៃសិក្សាលើមុខជំនាញនេះដែរ។ តើអ្នកដឹងទេ ការសិក្សាជំនាញបើកយន្ដហោះត្រូវចំណាយប្រាក់អស់ប៉ុន្មាន ?
តាមការបញ្ជាក់ពីអាកាសយានិកមួយរូបដែលទើបបញ្ចប់ការសិក្សាពីសហរដ្ឋអាមេរិក បានឲ្យដឹងថា ជំនាញជាអ្នកបើកយន្តហោះ មិនត្រឹមតែត្រូវចំណាយប្រាក់ច្រើនប៉ុណ្ណោះទេ ប៉ុន្តែទាមទារឲ្យមានការហ្វឹកហាត់តាំងពីតូចៗ និងមានសមត្ថភាពចំណេះដឹងខ្ពស់ផងដែរ ។
លោក ផល កុសល បានឲ្យដឹងថា លោកត្រូវចំណាយពេល២ឆ្នាំ សម្រាប់សិក្សាលើជំនាញបើកយន្តហោះ ក្នុងនោះលោកបានទៅសិក្សាវគ្គមូលដ្ឋាននៅប្រទេសវៀតណាម រួចហើយទើបបន្តទៅសិក្សានៅសហរដ្ឋអាមេរិក ដោយក្នុងនោះ វគ្គសិក្សានៅប្រទេសវៀតណាម លោកបានចំណាយប្រាក់ប្រមាណ៦ពាន់ទៅ៧ពាន់ដុល្លារ។ ចំណែកវគ្គហ្វឹកហាត់នៅសហរដ្ឋអាមេរិក លោកបានចំណាយប្រាក់ប្រមាណជាង១២ម៉ឺនដុល្លារទៀត ។ ដូចនេះ បើសរុបទាំងអស់ លោកបានចំណាយជាង១៣ម៉ឺនដុល្លារអាមេរិក ។
អាកាសយានិកជនជាតិខ្មែរបានបន្ដថា ៖ «ជំនាញបើកយន្តហោះ ខុសពីជំនាញដទៃទៀត ពេលខ្លះ មានប្រាក់គ្រប់គ្រាន់សម្រាប់រៀនជំនាញនេះ ប៉ុន្តែមិនមានសមត្ថភាពគ្រប់គ្រាន់អាចរៀនបាន ។ ដូចនេះ ជំនាញនេះត្រូវការចំណេះដឹងខ្ពស់ ទាំងផ្នែកភាសាអង់គ្លេស និងវិទ្យាសាស្ត្រ ហើយអ្វីដែលពិសេសនោះ អ្នកចង់សិក្សាលើមុខជំនាញមួយនេះ ត្រូវតែមានកាយសម្បទាមាំមួន ស្មារតីវាងវៃ និងភាពរហ័សរហួនខ្ពស់ » ។
គួររំលឹកថា រហូតមកដល់ពេលនេះ កម្ពុជាមានធនធានអ្នកបើកយន្តហោះសរុបតែ៨នាក់ប៉ុណ្ណោះ បូកនឹងធនធាន៤រូបទៀតដែលទើបបញ្ចប់ការសិក្សាថ្មីៗនេះ ។ ដូច្នេះ ជំនាញមួយនេះពិតជាពិបាក និងកម្រមានអ្នកអាចទទួលបានជោគជ័យ ។
លោក តឹក រ៉េតសំរេច រដ្ឋលេខាធិការទីស្តីការគណៈរដ្ឋមន្ត្រី និងជាអគ្គនាយកក្រុមហ៊ុនអាកាសចរណ៍ជាតិកម្ពុជា អង្គរ អ៊ែរ បានឲ្យដឹងថា ជំនាញអ្នកបើកយន្តហោះនៅកម្ពុជា នៅមានភាពទូលាយខ្លាំងណាស់ ខណៈវិស័យហោះហើរនៅកម្ពុជាកំពុងមានសន្ទុះទៅមុខជាលំដាប់ ។
លោកថា ៖« ជំនាញមួយនេះ ខុសប្លែកពីជំនាញដទៃទៀត ដែលមិនចេះតែមានអ្នករៀនបាននោះទេ ។ ជំនាញនេះទាមទារឲ្យមានសមត្ថភាពខ្ពស់ ទាំងចំណេះដឹង និងកាយសម្បទាមាំមួន។ ជាក់ស្ដែង កម្ពុជានៅពេលនេះមានអ្នកដែលមានសញ្ញាបត្រហោះហើរបានតែ៨នាក់ប៉ុណ្ណោះ អីចឹងហើយបើសិនជាមានអ្នករៀនចប់ មានសញ្ញាបត្រលើជំនាញមួយនេះ មិនខ្វះទេការងារទាំងក្នុង និងក្រៅប្រទេស » ។
លោកបន្តថា កម្ពុជាក៏ត្រៀមបញ្ជូនធនធានទៅបណ្ដុះបណ្ដាលបន្ថែមទៀត ក៏ប៉ុន្តែវាពិបាកក្នុងការបញ្ជូន និងត្រូវឆ្លងកាត់ការធ្វើតេស្តជាច្រើនដំណាក់កាល ដើម្បីជ្រើសរើសយកអ្នកមានសមត្ថភាពពិតប្រាកដទៅបណ្ដុះបណ្ដាលជំនាញនេះ ។
លោកបញ្ជាក់ថា យន្តហោះ១គ្រឿងត្រូវការអ្នកបើកបរយ៉ាងតិចណាស់៨នាក់ ។ ដូចនេះ សម្រាប់ក្រុមហ៊ុនអាកាសចរណ៍នីមួយៗដែលនាំចូលយន្តហោះថ្មីៗមកនោះ គឺត្រូវការបន្ថែមចំនួនអាកាសយានិកច្រើន ៕
ចែករំលែកព័តមាននេះ