រាជធានីភ្នំពេញ ៖ គណៈកម្មាធិការអចិន្ត្រៃយ៍រដ្ឋសភានៅព្រឹកថ្ងៃទី២៥ តុលា ឆ្នាំ២០១៧ បានពិនិត្យសេចក្តីព្រាងគម្រោងថវិការបស់រដ្ឋសភាសម្រាប់ឆ្នាំ២០១៨ ដើម្បីបញ្ចូលក្នុងកញ្ចប់ថវិកាជាតិឆ្នាំ២០១៨ ក្រោមអធិបតីភាពសម្តេច ហេង សំរិន…
រាជធានីភ្នំពេញ ៖ គណៈកម្មាធិការអចិន្ត្រៃយ៍រដ្ឋសភានៅព្រឹកថ្ងៃទី២៥ តុលា ឆ្នាំ២០១៧ បានពិនិត្យសេចក្តីព្រាងគម្រោងថវិការបស់រដ្ឋសភាសម្រាប់ឆ្នាំ២០១៨ ដើម្បីបញ្ចូលក្នុងកញ្ចប់ថវិកាជាតិឆ្នាំ២០១៨ ក្រោមអធិបតីភាពសម្តេច ហេង សំរិន ប្រធានរដ្ឋសភា ដោយឡែកសមាជិកគណៈកម្មាធិការអចិន្ត្រៃយ៍មកពីគណបក្សសង្គ្រោះជាតិ បានបន្តធ្វើពហិកាមិនចូលប្រជុំឡើយនៅថ្ងៃនេះ។
បន្ទាប់ពីចប់កិច្ចប្រជុំគណៈកម្មាធិការអចិន្ត្រៃយ៍ លោកឈាង វុន អ្នកនាំពាក្យរដ្ឋសភាបានថ្លែងបញ្ជាក់ថា គណៈកម្មាធិការអចិន្ត្រៃយ៍បានពិភាក្សាថវិការដ្ឋសភាសម្រាប់ការចំណាយ ឆ្នាំ២០១៨ ដើម្បីផ្ញើជូនរដ្ឋាភិបាលបញ្ចូលក្នុងកញ្ចប់ថវិកាជាតិ ឆ្នាំ២០១៨ ។
រដ្ឋសភាប្រជុំគ្រោងអនុម័តថវិកាជាតិនៅខែវិច្ឆិកា ឆ្នាំ២០១៧ អនុវត្តតាមច្បាប់ថវិកាជាតិ។ នៅឆ្នាំក្រោយឆ្នាំ២០១៨ មានការបោះឆ្នោតរើសសមាជិកព្រឹទ្ធសភា និងការបោះឆ្នោតជ្រើសតាំងសមាជិករដ្ឋសភាឆ្នាំ២០១៨ អាណត្តិទី៦ និងការបោះឆ្នោតក្រុមប្រឹក្សា រាជធានីខេត្ត ស្រុក ខណ្ណ ផងដែរ។
ដូច្នេះថវិការរដ្ឋសភាឆ្នាំ២០១៨ មានការកើនឡើងជាងឆ្នាំ២០១៧ ខណៈដែលសភាបង្កើនចំនួនអាសនៈរដ្ឋសភាចំនួន ២ អាសនៈបន្ថែមទៀត (១២៥ អាសនៈ)។ នៅរដ្ឋសភា និងមានការបញ្ចូលមន្ត្រីមួយចំនួននៅឆ្នាំ២០១៩ ។ សម្រាប់ឆ្នាំ២០១៨ មិនមានការបន្ថែមចំនួនមន្ត្រីទេ ។ ឯប្រាក់ខែតំណាងរាស្ត្រមិនមានការឡើងទេ គឺនៅដដែល។
លោក ឈាង វុន បានថ្លែងឲ្យដឹងថា រដ្ឋសភាបានគ្រោងចំណាយថវិកាចំនួន ១,៨០៨,៨៧៧,០០០ រៀល (ប្រមាណជាង ៤៤៧,៣៧១ ដុល្លារសហរដ្ឋអាមេរិក) នៅឆ្នាំ២០១៨ខាងមុខ ។ ហើយសំណើនេះ រាជរដ្ឋាភិបាលនឹងសម្រេចក្នុងពេលឆាប់ៗនេះទាំងថវិកាជាតិ និងថវិការដ្ឋសភា៕
ចែករំលែកព័តមាននេះ