ប្រទេសរុស្ស៊ី ៖ នៅឯមហោស្រពអន្តរជាតិនៃយុវជនឯទីក្រុងសូតជី ប្រធានាធិបតីរុស្ស៊ី លោកវ្ល៉ាឌីមៀរ ពូទីន លើកឡើងកាលពីថ្ងៃទី២១ តុលា ពីបច្ចេកវិទ្យាមួយដែលគួរឱ្យខ្លាចជាងគ្រាប់បែកនុយក្លេអ៊ែរទៅទៀត ។
លោកថា បច្ចេកវិទ្យានេះនឹងផ្តោតលើលទ្ធភាពដ៏អស្ចារ្យក្នុងវិស័យឱសថជីវវិទ្យា និងក្នុងការផ្លាស់ប្តូរកូដហ្សែន CODE GENETIQUE ។ វាជាការបញ្ចូលកម្មវិធីហ្សែនរបស់មនុស្សយោងតៅតាមលក្ខណសម្បត្តិនៃទិន្នន័យដែលគេអាចធ្វើបានក្នុងពេលអនាគតដ៏ឆាប់ខាងមុខនេះ និងថារឿងនេះនឹងអាចគួរឱ្យខ្លាចជាងគ្រាប់បែកនុយក្លេអ៊ែរមួយទៅទៀត ។ លោកធ្វើការកត់សម្គាល់ថា គេគិតថា មនុស្សម្នាក់អាចបង្កើតមនុស្សម្នាក់ទៀតយោងទៅតាមលក្ខណសម្បត្តិពិសេសនានា ។ មនុស្សនេះអាចជាអ្នកប្រាជ្ញខាងគណិតវិទ្យា ឬជាតន្ត្រីករយ៉ាងល្អប្រសើរម្នាក់ ក៏ប៉ុន្តែគេក៏អាចជាទាហានម្នាក់ដែលអាចប្រយុទ្ធដោយពុំខ្លាច ពុំរាថយ ពុំមានការសោកស្តាយ និងគ្មានការឈឺចាប់ ។
លោកពូទីន គូសបញ្ជាក់ទៀតថា លោកអ្នកដឹងហើយថា មនុស្សជាតិអាចចូលក្នុងសករាជដ៏ស្មុគស្មាញបំផុត និងសំខាន់បំផុតមួយនៃការវិវត្តន៍ និងអត្តិភាព ហើយអ្វីដែលមានលទ្ធភាពខ្ពស់បំផុតនោះតើនាពេលខាងមុខមនុស្សជាតិនឹងធ្វើអ្វី ។ ដូចខ្ញុំនិយាយអញ្ចឹង មនុស្សអាចធ្វើនូវអ្វីដែលគួរឱ្យភ័យខ្លាចជាងគ្រាប់បែកនុយក្លេអ៊ែរទៅទៀត ។
តាមលោកពូទីន ថា មនុស្សជាតិពុំត្រូវភ្លេចសីលធម៌នៃអំពើរបស់ខ្លួនឡើយ ព្រោះថា បើគ្មានសីលធម៌ទេ នោះវានឹងអាចនាំទៅរកការបំផ្លាញមនុស្ស ៕
ចែករំលែកព័តមាននេះ