រាជធានីភ្នំពេញ ៖ យុវជន២នាក់ជិះម៉ូតូលឿនពេកប្រញាប់ទៅជក់ថ្នាំញៀន បានទាក់ដៃចង្កូតជាមួយម៉ូតូមួយគ្រឿងទៀតបណ្ដាលឲ្យដួល បម្រុងលើកម៉ូតូរត់ត្រូវសមត្ថកិច្ចជួយលើកស្រាប់តែជ្រុះថ្នាំញៀនប្រភេទម៉ាទឹកកកចំនួន២កញ្ចប់តូច ទើបសមត្ថកិច្ចឃាត់ខ្លួនកាលពីវេលាម៉ោង១១យប់ ថ្ងៃទី១២ ខែកញ្ញា តាមបណ្តោយផ្លូវសុរាម្រិត ត្រង់ចំណុចវិមានឯករាជ្យ ស្ថិតនៅក្នុងសង្កាត់ចតុមុខ ខណ្ឌដូនពេញ។ ជនសង្ស័យទី១មានឈ្មោះ ផាន់ វណ្ណៈ ភេទប្រុស អាយុ២០ឆ្នាំ មុខរបរធ្វើការរោងចក្រ ស្នាក់នៅមិនពិតប្រាកដ។ ជនសង្ស័យទី២ មានឈ្មោះ ឌី ភេទប្រុស អាយុ១៨ឆ្នាំ មុខរបរធ្វើការរោងចក្រ ស្នាក់នៅសង្កាត់ចោមចៅ ខណ្ឌពោធិ៍សែនជ័យ។
សាក្សីដែលឃើញហេតុការណ៍បានឲ្យដឹងថា មុនពេលកើតហេតុគេបានឃើញយុវជន២នាក់ជិះម៉ូតូម៉ាកហុងដាស្គូពី ពណ៌ស ពាក់ស្លាកលេខ ភ្នំពេញ-1AY6777 ធ្វើដំណើរមកតាមបណ្តោយផ្លូវសុរាម្រិតក្នុងទិសដៅពីកើតទៅលិចក្នុងល្បឿនយ៉ាងលឿន ខណៈដែលមកដល់ចំណុចកើតហេតុក៏ស្រាប់តែទាក់ដៃចង្កូតម៉ូតូម្ខាងទៀតមិនចាំម៉ាកបណ្តាលឲ្យដួលខ្លួនឯងត្រូវសមត្ថកិច្ចចរាចរណ៍ប្រចាំគោលដៅនោះជួយលើកម៉ូតូក៏ស្រាប់តែជ្រុះថ្នាំញៀនប្រភេទម៉ាទឹកកកចំនួន២កញ្ចប់ត្រូវសមត្ថកិច្ចមូលដ្ឋានឃាត់ខ្លួនយកទៅអធិការដ្ឋានខណ្ឌដូនពេញដើម្បីសួរនាំ។
ក្រោយពេលទៅដល់ខណ្ឌហើយក៏ជនសង្ស័យ២នាក់នោះបានប្រាប់សមត្ថកិច្ចថា ខ្លួនទិញថ្នាំញៀននេះមកពីប្លុកបឹងកក់ក្នុងមួយកញ្ចប់តំលៃ២ម៉ឺនរៀល ដើម្បីយកទៅប្រើប្រាស់តែប៉ុណ្ណោះ។ ក្រោយពេលកើតហេតុជនសង្ស័យទាំង២នាក់ត្រូវសមត្ថកិច្ចកសាងសំណុំរឿងបញ្ចូនទៅកាន់តុលាការដើម្បីចាត់ការទៅតាមនីតិវិធី៕
ចែករំលែកព័តមាននេះ