រាជធានីភ្នំពេញ ៖ ការប្រកួតប្រដាល់ដណ្តើមខ្សែក្រវាត់ខារ៉ាបាវទម្ងន់៥៧គីឡូក្រាម នៅលើសង្វៀនស្ថានីយទូរទស្សន៍ CTN ថ្ងៃសុក្រ ទី២១ កញ្ញា ខាងមុខនេះ ឈានចូលដល់វគ្គពាក់កណ្តាលផ្តាច់ព្រ័ត្រហើយ ។ ទេស សំខាន់ លេខ១ក្នុងពូល A មកពីក្លិបកងពលតូចលេខ៧០ ប្រកួតជាមួយ សេក គឹមផាន លេខ២ក្នុងពូល B មកពីក្លិបសឹករងខេត្តសៀមរាប ។ ចំណែកសំ រិទ្ធ សុភាព លេខ១ក្នុងពូល B មកពីក្លិបអប្សរាក្បាច់គុនខ្មែរ ប្រកួតជាមួយ សុខ សុវណ្ណ លេខ២ក្នុងពូល A មកពីក្លិបកងពលតូចលេខ៣១ ។
សំខាន់ បើទោះជាគេមានចំណាត់ថ្នាក់ល្អជាងគឹមផាន បន្តិចមែន ប៉ុន្តែមិនទាន់ប្រាកដថា អាចយកឈ្នះបានដែរ ។ សំខាន់មានស្នៀតកែង និងជង្គង់ល្អ ចិត្តសឿង ប៉ុន្តែកម្លាំងរបស់គេរាងខ្សោយបន្តិច រីឯចលនាវាយចេញក៏មិនសូវជារហ័សរហួនប៉ុន្មានដែរ រីឯគឹមផានវិញ ទាំងស្នៀតដៃ និងស្នៀតជើងមិនសូវជាល្អប៉ុន្មានឡើយ ប៉ុន្តែបើនិយាយពីកម្លាំងវិញនោះគឺខ្លាំង ថែមទាំងកណ្តាប់ដៃវាយចេញក៏ធ្ងន់គ្រាន់បើដែរ ។ ទោះបី យ៉ាងណារវាងគូនេះ គេមិនទាន់ដឹងមុនថា អ្នកណាមានសំណាងជាងអ្នកណានោះទេ ។
សំរិទ្ធ សុភាព និងសុខ សុវណ្ណ សុទ្ធតែជាអ្នកប្រដាល់ចាស់វស្សាដែលមានល្បិចប្រយុទ្ធលើសង្វៀនក្រាស់ឃ្មឹកដូចគ្នា ។ សុភាព រហ័សរហួនគ្រាន់បើពេលវាយចេញមានការកំណត់គោលដៅច្បាស់លាស់ មិនវាយរបៀបផ្សងព្រេងឡើយ ។ សុភាព បិុនប្រសប់ខាងប្រើស្នៀតកែង និងជង្គង់បំផុត ហើយរាល់ការវាយចេញរបស់គេមិនសូវជាឥតប្រយោជន៍ឡើយ ។ សម្រាប់សុវណ្ណវិញ សំអាងលើទឹកចិត្តសឿងរបស់គេបែបមិនអន់ជាងសុភាពប៉ុន្មានឡើយ ប៉ុន្តែភាគច្រើន សុវណ្ណ ចូលចិត្តប្រើប្រាស់កម្លាំងច្រើនជាង ។ ស្នៀតប្រយុទ្ធដែលគេប្រើសម្រាប់ផ្តួលគូប្រកួត គឺស្នៀតជើង និងស្នៀតកណ្តាប់ដៃ តែស្នៀតទាំងនេះពេលវាយ និងទាត់ចេញមិនសូវជារហ័សរហួនប៉ុន្មានទេ តែបើគេចមិនទាន់ច្បាស់ជាវីវរមិនខាន ។ ចាំមើលគូនេះអ្នកណាមានសំណាងបានឡើងទៅប្រកួតនៅវគ្គផ្តាច់ព្រ័ត្រ?
ចំណែកគូប្រកួតមិត្តភាពវិញ កីឡាករ អ៊ុំ ចំរើន មកពីក្លិបតាឡីដំរីមានប្ញទ្ធិ ប្រកួតជាមួយកីឡាករ រឿម វណ្ណៈ មកពីសមាគមកីឡាប្រដាល់ក្រសួងការពារជាតិ និងកីឡាករ អាន សុផល មកពីក្លិបមិត្តប៉ូលិស ប្រកួតជាមួយកីឡាករទូចស័ក្តិ មកពីក្លិបរស្មីកុមារកំព្រា៕
ចែករំលែកព័តមាននេះ