រាជធានីភ្នំពេញ ៖ ក្រុមសាខាកំពង់ស្ពឺ និងក្រុមសាខាមានជ័យ នឹងត្រូវជួបគ្នានៅវគ្គផ្តាច់ព្រ័ត្រដណ្តើមយកចំណាត់ថ្នាក់លេខ១ពានរង្វាន់បាល់ទាត់អេស៊ីលីដា John Brinsden Cup 2012 បន្ទាប់ពីក្រុមទាំង២នេះ ប្រកួតឈ្នះគូប្រកួតរបស់ខ្លួនក្នុងវគ្គពាក់កណ្តាលផ្តាច់ព្រ័ត្រនៅលើទីលានពហុកីឡដ្ឋានជាតិកាលពីរសៀលថ្ងៃអាទិត្យទី១៦ កញ្ញា កន្លងមកនេះ ។ក្រុមសាខាកំពង់ស្ពឺ បានប្រកួតឈ្នះក្រុមសាខាកំពង់ត្របែក ក្នុងលទ្ធផល 4-1 រីឯក្រុមសាខាមានជ័យវិញ បានយកឈ្នះលើក្រុមសាខាស្រីសន្ធរ 2-0 ។
នៅក្នុងតង់ទី១ ប្រកួតបាន២២នាទីដំបូងកីឡាករសុះ សុខបឿន ពាក់អាវលេខ១០ របស់ក្រុមសាខាកំពង់ស្ពឺ រកបាន១គ្រាប់នាំមុខមុន ខណៈពេលកីឡាករឯម សុផាន់ណា ពាក់អាវលេខ២៥ រកបាន១គ្រាប់ទៀតក្នុងតង់ទី២ នៅនាទីទី៦៤ ។ក្រុមសាខាកំពង់ត្របែក តាមសងបាន១គ្រាប់វិញ នៅនាទីទី៧០ ដែលរកបានដោយកីឡាករយ៉ាន់ ស៊ីណា ពាក់អាវលេខ១០ ។ នៅតង់ទី២ ក្រុមសាខាកំពង់ស្ពឺ មានឱកាសលេងវាយបកវិញយ៉ាងល្អ និងរកបាន២គ្រាប់បន្ថែមទៀតដោយកីឡាករព្រុំ វីរៈ ពាក់អាវលេខ២៣ នៅនាទីទី៨៣ និងឯម សុផាន់ណា នៅនាទីទី ៨៨ ។
ចំណែកក្រុមសាខាមានជ័យ បានយកឈ្នះក្រុមសាខាស្រីសន្ធរលើកនេះត្រៀមឡើងទៅជួបក្រុមសាខាកំពង់ស្ពឺដណ្តើមយកតំណែងលេខ១ជាបន្តទៀត ។ ប្រកួតបាន៨នាទីដំបូងកីឡាករនូ ថារិទ្ធ ពាក់អាវលេខ៣៣ រកបាន១គ្រាប់មុន បន្ទាប់មកកីឡាករអៀម សុខា ពាក់អាវលេខ៧ រកបាន១គ្រាប់បន្ថែមទៀតនៅនាទីទី៣០ ហើយលទ្ធផលនេះគ្មានការប្រែប្រួលទៀតឡើយរហូតដល់ចប់ការប្រកួត ។ ក្រុមបាល់ទាត់សាខាស្រីសន្ធរ និងសាខាកំពង់ត្របែក នឹងត្រូវជួបគ្នារកតំណែងលេខ៣នៅវគ្គប្រកួតផ្តាច់ព្រ័ត្រ ៕
ចែករំលែកព័តមាននេះ