រាជធានីភ្នំពេញ ៖ កីឡាករអឹុង បូរ៉ា មកពីក្លិបព្រះខ័នរាជ ពេលនេះមានសង្ឃឹម១០០ភាគរយក្នុងការឡើងទៅប្រកួតនៅវគ្គពាក់កណ្តាលផ្តាច់ព្រ័ត្រជាបន្តទៀតបានហើយ បន្ទាប់ពីរូបគេប្រកួតឈ្នះកីឡាករឈិត ង៉ុយ មកពីសមាគមកីឡាប្រដាល់ក្រសួងការពារជាតិ ដោយពិន្ទុ នៅលើសង្វៀនស្ថានីយទូរទស្សន៍ CTN កាលពីថ្ងៃអាទិត្យទី១៦ កញ្ញា កន្លងទៅនេះ ។
អ៊ឹង បូរ៉ា ពេលនេះគេមាន៦ពិន្ទុនៅក្នុងដៃរួចហើយ ព្រោះប្រកួតទាំង២លើកឈ្នះទាំង២លើកជាប់គ្នាតែម្តង ។ រីឯឈិត ង៉ុយ វិញប្រកួតបាន២លើកឈ្នះ១លើក ចាញ់១លើកមាន៤ពិន្ទុប៉ុណ្ណោះ ដោយមិនទាន់ដឹងថាគេអាចគេចផុតពីការហាលខោ ឬអត់នោះដែរ។ទឹកទី១ ឈិត ង៉ុយ ត្រូវបូរ៉ាវាយស្ទើរតែរកឱកាសតដៃលែងរួចទៅហើយ ប៉ុន្តែទឹកទី២ និងទី៣ ឈិត ង៉ុយ បានប្រើស្នៀតកណ្តាប់ដៃវាយបកសងវិញយ៉ាងរហ័ស រួមទាំងប្រើស្នៀតកែងទៀតផងនោះបានធ្វើឱ្យបូរ៉ាចង់យ៉ាប់ម្តងៗ ។ ប៉ុន្តែនៅទឹកទី៤ និងទី៥ ស្នៀតកណ្តាប់ដៃបូរ៉ាបានវាយចូលមុខឈិត ង៉ុយ ពេញៗធ្វើឱ្យឈិត ង៉ុយ វង្វេងវង្វាន់រកឱកាសការពារខ្លួនស្ទើរតែមិនបានផង ទើបត្រូវចាញ់ពិន្ទុបែបនេះ ប៉ុន្តែឈិត ង៉ុយ នៅមិនទាន់អស់សង្ឃឹមនៅឡើយទេ ព្រោះនៅសល់១ប្រកួតទៀត ។
រីឯលទ្ធផលគូប្រកួតមិត្តភាពវិញ ជាម អាដាំ មកពីក្លិបឃ្លាំងមឿងកីឡា ឈ្នះពិន្ទុយឹម ឌៀប មកពីសមាគមកីឡាប្រដាល់ក្រសួងការពារជាតិ។ ខុន ចាន់ថន មកពីក្លិបកងពលធំអន្តរាគមន៍លេខ៣ ព្រះវិហារ ឈ្នះពិន្ទុ ភុន សោភ័ណ មកពីក្លិបយុវកីឡាខេត្តកណ្តាល និងសូយ យក្សតឿ មកពីក្លិបអូដឹមកីឡា ប្រកួតឈ្នះពិន្ទុ ឈឿន សារិទ្ធ មកពីក្លិបរកាខ្នុរគុនខ្មែរ ៕
ចែករំលែកព័តមាននេះ