ខេត្តព្រៃវែង ៖ មានហេតុការណ៍មួយបានកើតឡើងធ្វើឱ្យមានការភ្ញាក់ផ្អើលទាំងព្រឹកព្រលឹម ដោយសារគេបានប្រទះឃើញស្ត្រីម្នាក់ឈ្មោះឌុច គន្ធី អាយុ៣៨ឆ្នាំ ដេកស្លាប់នៅក្នុងផ្ទះតែម្នាក់ឯងដោយមិនដឹងមូលហេតុ ។ ចំណែកអ្នកស្រុកជិតខាងបាននិយាយតៗគ្នាថា ស្ត្រីរងគ្រោះទំនងជាត្រូវប្រពន្ធចុងរបស់ប្តីដែលរស់នៅផ្ទះជាមួយគ្នានោះវាយសម្លាប់ ព្រោះក្រោយពេលកើតហេតុស្ត្រីជាប្រពន្ធចុង និងបុរសជាប្តីបានដើរចេញពីក្នុងផ្ទះកើតហេតុជាមួយគ្នា លុះពេលមានការផ្អើលឆោឡោ ស្រាប់តែបាត់ខ្លួនប្រពន្ធចុងនោះឈឹងតែម្តង ។
ហេតុការណ៍ភ្ញាក់ផ្អើលខាងលើនេះបានកើតឡើងកាលពីវេលាម៉ោង៧និង១៥នាទីព្រឹកថ្ងៃទី១៣ កញ្ញា ២០១២ នៅផ្ទះរបស់ស្ត្រីរងគ្រោះដែលស្ថិតក្នុងភូមិឧត្តម ឃុំព្រែកខ្សាយ(ក) ស្រុកពាមរក៍ ។ បើតាមការនិយាយតៗគ្នាពីមាត់មួយទៅមាត់មួយរបស់អ្នកស្រុកដែលរស់នៅជិតខាងជាមួយស្ត្រីរងគ្រោះបានបញ្ជាក់ថា នៅវេលាម៉ោង៧ព្រឹកមុនពេលកើតហេតុប៉ុន្មាននាទី គេឃើញស្ត្រីរងគ្រោះនៅធ្វើការក្នុងផ្ទះធម្មតា ដោយពុំមានបង្ហាញពីអាការមានជំងឺធ្ងន់ធ្ងរអ្វីបន្តិចនោះទេ ប៉ុន្តែរយៈពេលជាង១០នាទីប៉ុណ្ណោះស្រាប់តែឮថា ស្ត្រីរងគ្រោះស្លាប់នៅក្នុងផ្ទះបាត់ទៅហើយ ដោយពុំមាននរណាម្នាក់បានដឹងពីមូលហេតុច្បាស់លាស់សោះ ស្របពេលជាមួយគ្នានេះដែរ ស្រាប់តែគេប្រទះឃើញប្តីរបស់ស្ត្រីរងគ្រោះឈ្មោះចាន់ ថុល អាយុ៤៨ឆ្នាំ ដើរបណ្តើរស្ត្រីជាប្រពន្ធចុង ដែលគេមិនបានស្គាល់ឈ្មោះនោះ ចេញពីផ្ទះកើតហេតុទៅសម្ងំនៅផ្ទះលក់មាសមួយកន្លែងមានចម្ងាយប្រមាណជា២០០ម៉ែត្រពីផ្ទះរបស់ខ្លួន ហើយបន្តិចក្រោយមកទើបបុរសជាប្តីមានការភ្ញាក់ផ្អើល ហើយរត់ត្រឡប់មកផ្ទះកើតហេតុវិញតែម្នាក់ឯង ចំណែកស្ត្រីជាប្រពន្ធចុងបានបាត់ខ្លួនតែម្តង ។
ចំពោះករណីនេះត្រូវបានបុរសជាប្តីឈ្មោះចាន់ ថុល ឆ្លើយបំភ្លឺប្រាប់សមត្ថកិច្ចថា នៅវេលាម៉ោង៧ព្រឹកមុនពេលកើតហេតុគាត់បានឃើញប្រពន្ធគាត់នៅផ្ទះធ្វើការធម្មតា ដោយពុំមានឈឺអ្វីនោះទេ លុះពេលគាត់ដើរចេញពីផ្ទះបានប្រមាណជាង១៥នាទីស្រាប់តែមានគេទូរស័ព្ទទៅប្រាប់ថា ប្រពន្ធរបស់គាត់ស្លាប់បាត់ទៅហើយ ទើបគាត់មានការភ្ញាក់ផ្អើលហើយរត់ត្រឡប់មកផ្ទះវិញតែម្តង ។
ព័ត៌មានលំអិតនឹងផ្សាយជូននៅពេលក្រោយ នៅលើទំព័រកាសែតកោះសន្តិភាព និងនៅតាមវិទ្យុសំឡេងកោះសន្តិភាព FM 87.75 រាជធានីភ្នំពេញ, FM 87.5 ខេត្តបាត់ដំបង៕
ចែករំលែកព័តមាននេះ