ខេត្តពោធិ៍សាត់ ៖ កាលពីរសៀលថ្ងៃទី១២ កញ្ញា នៅស្នងការដ្ឋាននគរបាលខេត្ត មានធ្វើពិធីប្រកាសផ្ទេរភារកិច្ចតែងតាំងមុខតំណែងនិងបំពាក់ឋានន្តរស័ក្តិមន្ត្រីនគរបាលជាតិក្រោមអធិបតីភាពលោកឧត្តមសេនីយ៍ទោដូង សារឿន អនុប្រធាននាយកដ្ឋានបុគ្គលិកតំណាងដ៏ខ្ពង់ខ្ពស់ លោកនាយឧត្តមសេនីយ៍ នេត សាវឿន អគ្គស្នងការនគរបាលជាតិ និងលោកសួន រិនឌី អភិបាលរងខេត្ត ។
ខេត្តពោធិ៍សាត់ ៖ កាលពីរសៀលថ្ងៃទី១២ កញ្ញា នៅស្នងការដ្ឋាននគរបាលខេត្ត មានធ្វើពិធីប្រកាសផ្ទេរភារកិច្ចតែងតាំងមុខតំណែងនិងបំពាក់ឋានន្តរស័ក្តិមន្ត្រីនគរបាលជាតិក្រោមអធិបតីភាពលោកឧត្តមសេនីយ៍ទោដូង សារឿន អនុប្រធាននាយកដ្ឋានបុគ្គលិកតំណាងដ៏ខ្ពង់ខ្ពស់ លោកនាយឧត្តមសេនីយ៍ នេត សាវឿន អគ្គស្នងការនគរបាលជាតិ និងលោកសួន រិនឌី អភិបាលរងខេត្ត ។
តាមប្រកាសរបស់ក្រសួងមហាផ្ទៃលេខ៣៧៥១ ប្រ.ក បានសម្រេចតែងតាំងលោកអនុសេនីយ៍ឯក សូ សាហុង អធិការរងស្រុកភ្នំក្រវាញ ជាអធិការនគរបាលស្រុកភ្នំក្រវាញ ជំនួសលោកវរសេនីយ៍ត្រី ពេជ សុភាព ដែលទទួលមរណភាព និងលោកអនុសេនីយ៍ឯក ធាង ឡេង ពីអធិការរងនគរបាលស្រុកកណ្តៀង ទៅកាន់អធិការនគរបាលស្រុកវាលវែងជំនួសលោកវរសេនីយ៍ត្រី ភួង សូឡី ដែលចូលនិវត្តន៍ ។ ក្រៅពីនេះ មានការតែងតាំងអធិការរង និងផ្ទេរភារកិច្ចតាមការិយាល័យមួយចំនួន និងបំពាក់ឋានន្តរស័ក្តិថ្នាក់វរសេនីយ៍ទោ១រូប ថ្នាក់អនុសេនីយ៍ត្រី៨រូប ថ្នាក់អនុសេនីយ៍ឯក១រូប ថ្នាក់អនុសេនីយ៍ត្រី៥រូប និងព្រិន្ទបាលទោ២រូប ។
លោក សួន រិនឌី និងលោកឧត្តមសេនីយ៍ ដូង សារឿន បានថ្លែងកោតសរសើរចំពោះស្នងការ ស្នងការរង និងមន្ត្រីនគរបាលខេត្តពោធិ៍សាត់ទាំងអស់ដែលបានខិតខំប្រឹងប្រែងយ៉ាងខ្លាំងក្នុងកិច្ចការពារសន្តិសុខសណ្តាប់ធ្នាប់សង្គមជូនប្រជាពលរដ្ឋ ពិសេសការងារបោះឆ្នោតជ្រើសរើសក្រុមប្រឹក្សាឃុំ-សង្កាត់ កន្លងមក ។ ការតែងតាំងផ្ទេរភារកិច្ចនិងដំឡើងឋានន្តរស័ក្តិគឺជាការយកចិត្តទុកដាក់និងលើកទឹកចិត្តរបស់ថ្នាក់ដឹកនាំក្រសួងមហាផ្ទៃ និងអគ្គស្នងការនគរបាលជាតិចំពោះមន្ត្រីនគរបាលយើងដែលបានខិតខំបម្រើការងារនិងមានស្នាដៃល្អកន្លងមកនេះ ។ លោកផ្តាំផ្ញើដល់មន្ត្រីនគរបាលដែលទើបតែងតាំង ផ្ទេរភារកិច្ច និងដំឡើងឋានន្តរស័ក្តិទាំងអស់ត្រូវខិតខំបម្រើការងារបន្តទៀត ដោយសហការឱ្យបានជិតស្និទ្ធជាមួយកងកម្លាំងប្រដាប់អាវុធ និងអាជ្ញាធរមូលដ្ឋាន ដើម្បីទទួលបានជោគជ័យកាន់តែប្រសើរឡើង ៕
ចែករំលែកព័តមាននេះ