ខេត្តសៀមរាប ៖ ឆ្អឹងសពមនុស្សជាច្រើនរួមមានឆ្អឹងលលាដ៍ក្បាល ដៃ និងជើងត្រូវបានក្រុមកម្មករជីករណ្តៅកសាងកុដិព្រះសង្ឃ ប្រទះឃើញនៅក្នុងបរិវេណវត្តកេសារារាម ហៅវត្តធម្មយុទ្ធ ស្ថិតក្នុងភូមិសាលាកន្សែង សង្កាត់ស្វាយដង្គំ ក្រុងសៀមរាប ។
តាមសំដីរបស់ប្រជាពលរដ្ឋឈ្មោះចាន់ អូន ភេទប្រុស អាយុ៣៦ឆ្នាំ ជាមេការក្រុមកម្មករទទួលបន្ទុកការងារសាងសង់កុដិឱ្យដឹងកាលពីរសៀលថ្ងៃទី១១ កញ្ញា ២០១២ ថា គ្រោងឆ្អឹងសពមនុស្សជាច្រើននោះត្រូវបានក្រុមកម្មកររបស់ខ្លួនប្រទះឃើញជាបន្តបន្ទាប់ ខណៈពេលជីករណ្តៅចំនួន៦ដើម្បីចាក់គ្រឹះកសាងកុដិ ។ ប្រភពបញ្ជាក់ឱ្យដឹងដែរថា ការប្រទះឃើញគ្រោងឆ្អឹងសពនេះគឺតាំងពីព្រឹកថ្ងៃទី៣ កញ្ញា ២០១២ រហូតមកដល់ថ្ងៃទី១១ កញ្ញា ២០១២ ជីកប្រទះឃើញមានចំនួន៤រណ្តៅក្នុងចំណោម៦រណ្តៅ ។
រណ្តៅទី១ ជីកប្រទះឃើញនាព្រឹកថ្ងៃទី៣ កញ្ញា មានលលាដ៍ក្បាលចំនួន៤ និងឆ្អឹងដៃជើង ។ រណ្តៅទី២ ជីកប្រទះឃើញនាព្រឹកថ្ងៃទី៤ កញ្ញា មានលលាដ៍ក្បាលចំនួន២ រួមទាំងឆ្អឹងដៃជើង ។រណ្តៅទី៣ ជីកក្រោមដើមដូងនាព្រឹកថ្ងៃទី៩ កញ្ញា មានឆ្អឹងលលាដ៍ក្បាលចំនួន១០ និងឆ្អឹងដៃជើងជាច្រើន និងរណ្តៅទី៤ ជីកប្រទះឃើញនាព្រឹកថ្ងៃទី១១ កញ្ញា មានឆ្អឹងលលាដ៍ក្បាលចំនួន២ រួមជាមួយនឹងឆ្អឹងដៃជើងមួយចំនួនទៀត ដែលគ្រោងឆ្អឹងសពមនុស្សទាំងនោះស្ថិតនៅក្នុងសភាពជាប់ខ្នោះ និងចំណងក្រណាត់ពណ៌ខ្មៅ គួរឱ្យសង្វេគ ។
ព័ត៌មានលំអិតនឹងផ្សាយជូននៅពេលក្រោយ នៅលើទំព័រកាសែតកោះសន្តិភាព និងនៅតាមវិទ្យុសំឡេងកោះសន្តិភាព FM 87.75 រាជធានីភ្នំពេញ, FM 87.5 ខេត្តបាត់ដំបង៕
ចែករំលែកព័តមាននេះ