ខេត្តប៉ៃលិន ៖ មានរថយន្តនីស្សាន់ ទួរីស និងហ៊ីយ៉ាន់ដាយជាច្រើនគ្រឿងដឹកទំនិញសំពីងសំពោងលើសទម្ងន់ខ្ពស់កប់ពពកកំពុងបន្តរត់នៅលើផ្លូវជាតិលេខ៥៧ ជារៀងរាល់ថ្ងៃ តែគ្មានសមត្ថកិច្ចណាម្នាក់មើលឃើញនោះទេ ដោយរថយន្តទាំងនេះដឹកទំនិញដាក់លើដំបូលចងកន្តុបគ្របកៅស៊ូតង់ពីលើដឹកយ៉ាងខ្ពស់កប់ពពកឆ្លងកាត់ពីខេត្តបាត់ដំបង ទៅព្រំដែនខេត្តប៉ៃលិន (កម្ពុជា-ថៃ) ហើយក៏មានរថយន្តដឹកទំនិញធ្ងន់លើសចំណុះ បើកបរចេញពីច្រកទ្វារព្រំដែនឆ្លងកាត់ខេត្តប៉ៃលិន ទៅខេត្តបាត់ដំបងវិញផងដែរ ។ ករណីនេះបានកើតឡើងកាលពីថ្ងៃទី១៣ កញ្ញា ២០១២ ចាប់ពីព្រឹករហូតដល់ពេលយប់ ។
ប្រជាពលរដ្ឋឱ្យដឹងថា រថយន្តជាច្រើនគ្រឿងដឹកសំពីងសំពោងទាំងនេះបានបើកនៅលើផ្លូវជាតិលេខ៥៧ ជារៀងរាល់ថ្ងៃ តាំងពីយូរយារណាស់មកហើយ តែមិនឃើញមានសមត្ថកិច្ចណាម្នាក់អើពើសោះ មានតែមកអង្គុយ និងឈរកាក់រថយន្តឱ្យឈប់ រួចឱ្យរថយន្តទាំងនេះធ្វើចរាចរណ៍តាមផ្លូវយ៉ាងរំភើយ ទំនងជាម្ចាស់ទំនិញចេញប្រាក់ត្រូវរ៉ូវគ្នាជាមួយសមត្ថកិច្ចហើយមើលទៅ ដោយរៀងរាល់ថ្ងៃ ពេលរថយន្តដឹកទំនិញឆ្លងកាត់ខេត្តនេះគេឃើញម្ចាស់រថយន្តរត់ប្រសាចនៅពេលដែលទៅដល់កន្លែងកាំកុងត្រូលច្រកទ្វារម្តងៗទំនងជាត្រូវរ៉ូវគ្នាទេដឹង ។
ព័ត៌មានលំអិតនឹងផ្សាយជូននៅពេលក្រោយ នៅលើទំព័រកាសែតកោះសន្តិភាព និងនៅតាមវិទ្យុសំឡេងកោះសន្តិភាព FM 87.75 រាជធានីភ្នំពេញ, FM 87.5 ខេត្តបាត់ដំបង៕
ចែករំលែកព័តមាននេះ