ខេត្តបាត់ដំបង ៖ មានសេចក្ដីរាយការណ៍ថា ក្មេងប្រុសស្រីចំនួន៣នាក់នៅតំបន់ឆ្ងាយដាច់ស្រយាលមួយ ត្រូវជនមិនស្គាល់មុខចាប់ពង្រត់ចេញពីផ្ទះ កាលពីថ្ងៃអាទិត្យចុងសប្ដាហ៍មុន ខណៈជីដូនប្រើឲ្យទៅផ្លាស់ចំណងគោស៊ីស្មៅខាងក្រោយផ្ទះ នៅភូមិអណ្ដូងកន្ទូត ឃុំដូនបា ស្រុកគាស់ក្រឡ ។
ប្រភពព័ត៌មានបានអះអាងថា ក្មេងប្រុសស្រីទាំង៣នាក់ដែលត្រូវគេចាប់ពង្រត់នោះ មានរយៈពេល៤ថ្ងៃហើយ គិតមកដល់ថ្ងៃទី១២ កញ្ញាមិនទាន់ទទួលដំណឹងទេ ។ អាណាព្យាបាលសង្ស័យថា ករណីនេះអាចពាក់ព័ន្ធនឹងរឿងគំនុំអ្វីមួយ ។ ដោយសារគ្មានដំណឹងពីក្មេងទាំង៣នាក់ខាងលើនេះ នៅរសៀលថ្ងៃទី១១ កញ្ញា ជីដូន និងអាណាព្យាបាលរបស់ពួកគេបានមកដាក់ពាក្យបណ្ដឹងនៅការិយាល័យនគរបាលប្រឆាំងការជួញដូរមនុស្ស និងការពារអនីតិជននៃស្នងការដ្ឋានខេត្តដើម្បីសុំឲ្យជួយអន្តរគមន៍ ។
ក្នុងពាក្យបណ្ដឹងរបស់អ្នកស្រី សៀន សូត្រ អាយុ៤៨ឆ្នាំ ដែលត្រូវជាជីដូនក្មេងទាំង៣នាក់បានឲ្យដឹងថា ចៅទាំង៣នាក់ដែលត្រូវជនមិនស្គាល់មុខចាប់ពង្រត់នោះមាន ១-ឈ្មោះភាពយន្ត ចិន្តា ហៅផឹង ភេទប្រុស អាយុ១០ឆ្នាំ ២-ឈ្មោះចាន់ អាត្រា ភេទប្រុស អាយុ១១ឆ្នាំ និង៣-ឈ្មោះម៉ាប់ រំដួល ភេទស្រី អាយុ៨ឆ្នាំ។ អ្នកស្រីបញ្ជាក់ថា ពួកគេត្រូវជនមិនស្គាល់មុខចាប់ពង្រត់នៅវេលាម៉ោង១២ថ្ងៃត្រង់ថ្ងៃទី៩ កញ្ញា ខណៈគាត់ប្រើពួកគេឲ្យទៅផ្លាស់ចំណងគោនៅខាងក្រោយផ្ទះចម្ងាយប្រហែល១០០ម៉ែត្រ ។ អ្នកស្រីសៀន សូត្រ បញ្ជាក់ថា ក្រោយពីបាត់ពួកគេជាច្រើនម៉ោងមិនឃើញត្រឡប់មកវិញ គាត់ក៏ចេញទៅដើររក និងស្រែកហៅគ្រប់ទីកន្លែង តែមិនឮសំឡេងឆ្លើយតបហើយក៏គ្មានអ្នកណាប្រទះឃើញដែរ ។ ក្នុងគ្រាដែលគាត់ និងឪពុកម្ដាយក្មេងកំពុងដើររកពួកគេ មានស្ដ្រីម្នាក់ឈ្មោះកែវ ឆែម ប្រាប់ថា គាត់បានប្រទះឃើញបុរសម្នាក់បណ្ដើរក្មេងប្រុសស្រីទាំង៣នាក់នៅឯស្រុកបាណន់ទើបមានការផ្អើលឆោឡោតែម្ដង ។
ស្រ្តីឈ្មោះកែវ ឆែម ដែលជាសាក្សីត្រូវបានជីដូនក្មេងប្រុសស្រីទាំង៣នាក់ស្រង់សំដីថា គាត់បានប្រទះឃើញបុរសម្នាក់មាឌតូច សម្បុរស្រអែម ដុះពុកមាត់តិចៗ រុំកន្សែងក្បាល និងពាក់មួកកន្តឹប ដើរបណ្ដើរក្មេងប្រុស២នាក់ និងក្មេងស្រីម្នាក់ ដោយខ្លះអត់អាវ និងខ្លះអត់ស្បែកជើង ។ ស្ត្រីឈ្មោះកែវ ឆែម បានប្រាប់ជីដូនក្មេងរងគ្រោះទៀតថា គាត់មិនបានស្គាល់ពួកក្មេងៗនោះទេ។ គ្រានោះគាត់បានសួរបុរសនោះថា តើពូនាំក្មេងទាំងនេះទៅណា? បុរសនោះឆ្លើយថា«ខ្ញុំទើបលែងលះប្រពន្ធ ហើយចែកកូនគ្នាម្នាក់៣»។ សាក្សីរូបនេះបានបញ្ជាក់ថា គាត់បានប្រទះឃើញគេបណ្ដើរក្មេងៗទាំង៣នាក់នេះនៅភូមិកញ្ចាញ់ច្រាស ឃុំកន្ទឺ២ ស្រុកបាណន់ ។ ក្រោយមកក៏មានអ្នកប្រទះឃើញគេបណ្ដើរក្មេងទាំង៣នាក់នេះជាហូរហែទៀតដែរ តែគ្មានអ្នកណាដឹងថា ក្មេងទាំងនេះត្រូវគេចាប់ពង្រត់ឡើយ ។
ជីដូនក្មេងរងគ្រោះ អ្នកស្រីសៀន សូត្រ បានបញ្ជាក់ដែរថា តាមការបំភ្លឺពីសាក្សីដែលប្រទះឃើញគេបណ្ដើរក្មេងទាំង៣នាក់នោះ គឺពិតជាចៅរបស់គាត់ហើយ ។ គាត់និយាយថា ភិនភាគបុរសដែលបណ្ដើរចៅគាត់នោះ គាត់សង្ស័យជននោះមានជាប់ពាក់ព័ន្ធនឹងការកាប់សម្លាប់ប្ដីរបស់គាត់កាលពីប៉ុន្មានខែមុន ដែលសមត្ថកិច្ចមិនទាន់បានវែកមុខនៅឡើយ ។ អ្នកស្រីបន្តថា ជនដែលសម្លាប់ប្ដីគាត់ គឺមានភិនភាគដូចបុរសម្នាក់ដែលសាក្សីប្រទះឃើញបណ្ដើរចៅគាត់ដែរ។ ជននេះត្រូវគេដឹងថា បានឆ្មក់ចូលទៅកាន់តំបន់«អណ្ដូងកន្ទូត»នោះម្ដងម្កាលដោយការបិទបាំងមុខ តែមិនបានបង្កការភា្ញក់ផ្អើលដល់សមត្ថកិច្ចទេ ។ គាត់សង្ស័យថា ការចាប់ពង្រត់ចៅរបស់គាត់ទាំង៣នាក់ខាងលើនេះ គឺអាចពាក់ព័ន្ធនឹងរឿងគំនុំចាស់ ដែលជននោះសម្លាប់ប្ដីគាត់ហើយ តាមព្យាបាទកូនចៅគាត់ទៀត ។
មន្រ្តីការិយាល័យជំនាញបានឲ្យដឹងដែរថា ក្រោយពីទទួលបានពាក្យបណ្ដឹងនេះ មន្ត្រីការិយាល័យជំនាញក៏បានចុះទៅកាន់តំបន់កើតហេតុ ដើម្បីស្រាវជ្រាវករណីនេះហើយ ។ មន្រ្តីដដែលនិយាយថា មានសាក្សីមួយចំនួនបានបំភ្លឺ ជុំវិញបញ្ហានេះ ប៉ុន្តែគេនៅមិនទាន់ដឹងអំពីតម្រុយនៃមុខសញ្ញានៅឡើយទេ ហើយក៏មិនទាន់ហ៊ានសន្និដ្ឋានបានដែរថា តើជនប្រមាត់ប្រមង់ចាប់ពង្រត់ក្មេងតូចៗទាំង៣នាក់នេះក្នុងគោលបំណងបែបណា ។ ទោះជាយ៉ាងណាមតិនានាបានលើកឡើងថា ករណីនេះមិនមែនជារឿងធម្មតាទេ ដែលសមត្ថកិច្ចគួរតែដុតដៃដុតជើងក្នុងការតាមស្វែងរកការពិត ។ បើមិនដូច្នេះទេ ក្មេងទាំង៣នាក់នោះច្បាស់ជាជួបគ្រោះថ្នាក់ធ្ងន់ធ្ងរជាមិនខាន ។
ព័ត៌មានចុងក្រោយ លោកជេត វណ្ណនី ស្នងការរងនគរបាលខេត្តបានផ្តល់ព័ត៌មានបន្ថែមថា អាណាព្យាបាលក្មេងនោះបានរកឃើញក្មេងរងគ្រោះពីរនាក់ បានក្លាយជាសាកសពស្អុយទៅហើយ ដែលម្នាក់ឈ្មោះភាពយន្ត ចិន្តា ហៅផឹង ភេទប្រុស អាយុ១០ឆ្នាំ និងម្នាក់ទៀតឈ្មោះម៉ាប់ រំដួល ភេទស្រី អាយុ៨ឆ្នាំ តែបាត់ខ្លួនម្នាក់ឈ្មោះចាន់ អាត្រា ភេទប្រុស១១ ឆ្នាំ ។ សពក្មេងស្រីត្រូវគេវះពោះ រីឯសពក្មេងប្រុសមានស្នាមវាយជាំកញ្ចឹងក និងដងខ្លួន ។លោកស្នងការរងបានបញ្ជាក់ថា សពត្រូវបានរកឃើញនៅវេលាម៉ោង២និង៣០នាទីរសៀលថ្ងៃទី១២ កញ្ញា នៅក្នុងព្រៃខាងក្រោយផ្ទះក្មេងរងគ្រោះនោះ ប្រហែលជាង៣០០ម៉ែត្រ ក្នុងភូមិ-ឃុំកើតហេតុខាងលើ ។ គេមិនទាន់ធ្វើការសន្និដ្ឋានយ៉ាងណានៅឡើយទេចំពោះករណីនេះ ព្រោះសមត្ថកិច្ចជំនាញកំពុងធ្វើការស្រាវជ្រាវបន្ត ៕
ចែករំលែកព័តមាននេះ