ខេត្តស្ទឹងត្រែង ៖ គោ២ក្បាល និងក្របី១០ក្បាល បានឈ្លក់ទឹកងាប់នៅក្នុងអូរ បន្ទាប់ពីឈ្មួញដើរប្រមូលទិញពីទីកន្លែងនានាក្នុងស្រុកថាឡាបរិវ៉ាត់ រួចជួលទូកចម្លងកាត់អូរ ហើយទូកដនោះបានលិចដោយសារការរើបម្រះរបស់សត្វគោ ក្របី ដែលជាប់ចំណង ។ ហេតុការណ៍នេះបានកើតឡើងកាលពីវេលាម៉ោង៤ និង៣០នាទីល្ងាចថ្ងៃទី១០ កញ្ញា នៅកណ្តាលអូរកាំតេជោ ស្ថិតនៅក្នុងភូមិអូរត្រែល ឃុំអូរត្រែល ស្រុកថាឡាបរិវ៉ាត់ ។
លោកទ្រី វុត្ថា អាយុ៤៣ឆ្នាំ ជាឈ្មួញរកស៊ីទិញគោ-ក្របី រស់នៅក្នុងភូមិព្រែក សង្កាត់ស្ទឹងត្រែង ក្រុងស្ទឹងត្រែង បានឱ្យដឹងថា លោកបានឱ្យកូនចៅដើរប្រមូលទិញគោ-ក្របី បានចំនួន១៩ក្បាល ក្នុងនោះមានគោ៣ក្បាល ដោយទិញចូលក្នុង១ក្បាលជិត៤លានរៀល ហើយដឹកជញ្ជូនតាមទូកពីអូរមួយទៅមួយដើម្បីឆ្លងទន្លេមេគង្គមកក្រុងស្ទឹងត្រែង លុះពេលកំពុងឆ្លងកាត់អូរ ស្រាប់តែជួបឧប្បត្តិហេតុលិចទូកកណ្តាលអូរ ។ ខណៈនោះកម្មករក្នុងទូកក៏លោតចុះទឹកដើម្បីស្រាយខ្សែចេញពីគោ-ក្របីទាំងនោះដែរ តែសង្គ្រោះបានតែគោ១ក្បាល និងក្របី៦ក្បាលប៉ុណ្ណោះ ធ្វើឱ្យគាត់ត្រូវខាតប្រាក់មិនតិចជាង៥០លានរៀលឡើយ ក្នុងនោះក៏មានម៉ូតូ២គ្រឿងទៀត មិនទាន់បានស្រង់ចេញពីបាតអូរនៅឡើយ ។
លោកទ្រី វុត្ថា បានបន្តថា ការចម្លងគោ ក្របីទាំងអស់នេះ គឺលោកជួលទូកដដឹកជញ្ជូនដូច្នេះបើយោងតាមច្បាប់ដឹកជញ្ជូនម្ចាស់ទូកដត្រូវតែទទួលខុសត្រូវលើការខូចខាតនេះ ប៉ុន្តែលោកមិនទាន់បានជជែកគ្នាជាមួយម្ចាស់ទូកដនៅឡើយទេ ។
ជុំវិញករណីនេះ ម្ចាស់ទូកដមិនអាចទំនាក់ទំនងសុំការបំភ្លឺបានឡើយ តែអ្នកបើកទូកដនិយាយថា វាមិនមែនជាកំហុសទាំងស្រុងរបស់់ម្ចាស់ទូកដទេ ដោយសារការចម្លងគោ-ក្របី គឺពិបាកណាស់ ព្រោះនៅពេលវារើម្តងៗទូករបស់គេឃ្លោងមិនងាយយកចង្កូតបានឡើយដូចករណីខាងលើគោ-ក្របីផ្អើលជ្រុំជើងធ្វើឱ្យទូកឃ្លោង និងលិចតែម្តង ៕
ចែករំលែកព័តមាននេះ