ខេត្តកណ្តាល ៖ ប្រជាពលរដ្ឋរស់នៅក្នុងភូុមិព្រែកត្រែង ឃុំសិត្បូ ស្រុកស្អាង ដែលមានដីចម្ការនិងផ្ទះនៅក្បែរច្រាំងទន្លេ កំពុងមានការព្រួយបារម្ភយ៉ាងខ្លាំង ព្រោះខ្លាចបាក់ដីចម្ការនិងផ្ទះរបស់ពួកគាត់ចូលទៅក្នុងទន្លេ ដោយសារតែថ្មីៗកន្លងមកនេះមានសាឡង់ធំៗបានមកបូមខ្សាច់ក្នុងទន្លេបាសាក់ចំណុចក្បាលកោះ ។ ការបូមនោះគឺនៅក្បែរៗច្រាំង យកទៅចាក់បំពេញដីបឹងជា
ខេត្តកណ្តាល ៖ ប្រជាពលរដ្ឋរស់នៅក្នុងភូុមិព្រែកត្រែង ឃុំសិត្បូ ស្រុកស្អាង ដែលមានដីចម្ការនិងផ្ទះនៅក្បែរច្រាំងទន្លេ កំពុងមានការព្រួយបារម្ភយ៉ាងខ្លាំង ព្រោះខ្លាចបាក់ដីចម្ការនិងផ្ទះរបស់ពួកគាត់ចូលទៅក្នុងទន្លេ ដោយសារតែថ្មីៗកន្លងមកនេះមានសាឡង់ធំៗបានមកបូមខ្សាច់ក្នុងទន្លេបាសាក់ចំណុចក្បាលកោះ ។ ការបូមនោះគឺនៅក្បែរៗច្រាំង យកទៅចាក់បំពេញដីបឹងជាច្រើនហិកតា និងបានចោះទម្លុះផ្លូវជាតិលេខ២១ កប់ទុយោបូមខ្សាច់ទៀតផង ។
ប្រជាពលរដ្ឋនិយាយថា ខណៈទឹកទន្លេបាសាក់ កំពុងជន់ឡើងខ្លាំង ស្រាប់តែមានសាឡង់ធំៗមកសម្រុកបូមខ្សាច់យ៉ាងសកម្មពីក្នុងបាតទន្លេបាសាក់ ធ្វើឱ្យពួកគាត់មានការព្រួយបារម្ភយ៉ាងខ្លាំងខ្លាចបាក់ដីចម្ការនិងផ្ទះរបស់ពួកគាត់ចូលទៅក្នុងទន្លេ ព្រោះសាឡង់បូមខ្សាច់ទាំងនោះបូមឡើងរញ្ជួយដីនៅក្បែរៗច្រាំងទន្លេនិងលាន់ឮសំឡេងកងរំពងរំខានដល់ការរស់នៅ របស់ប្រជាពលរដ្ឋថែមទៀត ។ ប្រជាពលរដ្ឋដែលមានការព្រួយបារម្ភនិយាយថា មិនដឹងថា ការបូមខ្សាច់នេះមានរយៈពេលប៉ុន្មានឆ្នាំនោះទេ ព្រោះបូមយកទៅ ចាក់បំពេញដីបឹងជាច្រើនហិកតានៅក្នុងភូមិព្រែកត្រែង មិនតែប៉ុណ្ណោះក្រុមហ៊ុនបូមខ្សាច់នេះបានខួងចោះទម្លុះដីផ្លូវជាតិលេខ២១កប់ទុយោបូមខ្សាច់នៅទីនោះថែមទៀត ។
ពួកគាត់និយាយថា ចំណុចបូមខ្សាច់ខាងលើនេះកាលពីពីរឆ្នាំមុនធ្លាប់មានកាណូតធំៗមកសម្រុកបូមខ្សាច់ម្តងរួចមកហើយគឺបូមរាប់ឆ្នាំហើយក្រោយពីឈប់បូមក៏ធ្វើឱ្យបាក់ច្រាំងទន្លេនៅទីនោះជាអន្លើៗដោយនាំយកដីចម្ការនិងលំនៅឋានរបស់ប្រជាពលរដ្ឋទៅជាមួយផងដែរ ។ ហេតុដូចនេះហើយ ទើបពួកគាត់មានការព្រួយបារម្ភនៅពេលដែលមានសាឡង់ធំៗមកបូមខ្សាច់នៅក្បែរច្រាំងបែបនេះ ។
មន្រ្តីមន្ទីរឧស្សាហកម្មរ៉ែនិងថាមពលខេត្តមួយរូបបានប្រាប់ឱ្យដឹងថា ចំណុចបូមខ្សាច់ខាងលើ គឺមានច្បាប់ត្រឹមត្រូវដែលម្ចាស់អាជ្ញាប័ណ្ណឈ្មោះអេង ចាន់ថន ប៉ុន្តែលក់បន្តទៅឱ្យឈ្មោះតាឃីជាអ្នកបូមធ្វើអាជីវកម្មនាពេលនេះ ។ ចំណែកប្រជា ពលរដ្ឋនិយាយទៀតថា គាត់មិនដែលឃើញអ្នកចេញអាជ្ញាប័ណ្ណឬអ្នកចេញច្បាប់មកពិនិត្យមើលលក្ខណៈបច្ចេកទេសនៃការបូមខ្សាច់នៅទីនេះសោះ គឺទុកឱ្យអ្នកបូមធ្វើស្រេចតែចិត្ត។ ប្រជាពលរដ្ឋសំណូមពរដល់អ្នកចេញអាជ្ញាប័ណ្ណឬអ្នកចេញច្បាប់ មេត្តាមកពិនិត្យមើលលក្ខណៈ បច្ចេកទេសបូមខ្សាច់នៅទីនេះផង មុននឹងមានមហន្តរាយដោយការបាក់ច្រាំងទន្លេនៅទីនេះ ដើម្បីឱ្យច្បាស់ថា បើមានផលវិបាកណាមួយកើតឡើងជាយថាហេតុ តើនរណាជាអ្នកទទួលខុសត្រូវ?
ចែករំលែកព័តមាននេះ