ខេត្តតាកែវ ៖ ប៉ូលិសស្រុកគិរីវង់ ខេត្តតាកែវ សហការជាមួយប៉ូលិសស្រុកអង្គស្នួល ខេត្តកណ្តាល បានឃាត់ខ្លួនបុរសម្នាក់ទៅតាមដីការបស់សាលាដំបូងខេត្តតាកែវ ដោយចោទប្រកាន់ពីបទលួចមេគោ១ក្បាល ហើយក្រោយពេលធ្វើសកម្មភាពរួចក៏បានរត់គេចខ្លួនរហូត តែដូចពាក្យចាស់លោកពោលថា កុកភ្លេចជង់ តែជង់មិនភ្លេចកុកទេ ។ ការចាប់ខ្លួនតាមដីកាតុលាការនេះបានធ្វើឡើងកាលពីថ្ងៃទី៨ កញ្ញា នៅចំណុចព្រំប្រទល់រវាងខេត្តតាកែវ និងខេត្តកណ្តាល វេលាម៉ោងជាង៥ល្ងាច ។
លោកវរសេនីយ៍ត្រី យ៉ុក សារ៉ាត់ អធិការនគរបាលស្រុកគិរីវង់ឱ្យដឹងថា ជនសង្ស័យដែលប៉ូលិសឃាត់ខ្លួននេះឈ្មោះកែ ខេន អាយុ៥១ឆ្នាំ រស់នៅភូមិតាអូ ឃុំតាអូ ស្រុកគិរីវង់ ។ បុរសនេះត្រូវបានប៉ូលិសចាប់ខ្លួនតាមដីកាដែលចេញដោយលោកជ័យ សុផល ចៅក្រមស៊ើបអង្កេតសាលាដំបូងខេត្ត និងលោកកាន់ ឈឺន ព្រះរាជអាជ្ញារងអមសាលាដំបូងខេត្ត ដោយចោទប្រកាន់ពីបទលួចមេគោ១ក្បាល ប្រព្រឹត្តកាលពីថ្ងៃទី៧ ខែកញ្ញា ២០០៤ នៅភូមិ-ឃុំខាងលើ ។
លោកអធិការនគរបាលស្រុកបន្តទៀតថា បន្ទាប់ពីប្រព្រឹត្តបទល្មើសរួច ជនសង្ស័យបានរត់គេចខ្លួនរហូតដល់ថ្ងៃចាប់ខ្លួន ដែលគិតមកដល់ពេលនេះមានរយៈពេល៨ឆ្នាំហើយ ដោយជនសង្ស័យបានទៅរស់នៅលាក់ខ្លួនជាមួយប្រពន្ធកូននៅភូមិព្រៃរកា ឃុំឆក់ឈើនាង ស្រុកអង្គស្នួល ខេត្តកណ្តាល ។ ទោះបីជាបែបណាដោយមានកិច្ចសហការគ្នារវាងប៉ូលិសស្រុកគិរីវង់ និងប៉ូលិសស្រុកអង្គស្នួល ទោះបីជាយូរឆ្នាំប៉ុនណា ក៏នៅតែបន្តស្រាវជ្រាវចាប់ខ្លួនយកមកផ្តន្ទាទោសទាល់តែបាន ។
នៅចំពោះមុខសមត្ថកិច្ច ជនសង្ស័យបានសារភាពថា ខ្លួនពិតជាបានលួចមេគោរបស់អ្នកភូមិប្រាកដមែននៅក្នុងឆ្នាំ២០០៤ ដោយដឹកយកទៅលក់នៅស្រុកយួន ក្នុងតម្លៃ៧៥ម៉ឺនរៀល តែនៅពេលនោះមិនទាន់បានលុយទេ ហើយដោយម្ចាស់គោដឹងគាត់ក៏រត់គេចខ្លួន និងឱ្យប្រពន្ធលក់ស្រែ និងផ្ទះនាំគ្នារត់ទៅនៅឯខេត្តបាត់ដំបង ។ នៅទីនោះបានមួយរយៈក៏ត្រឡប់មករស់នៅក្នុងស្រុកអង្គស្នួល លុះដល់ថ្ងៃទី៨ កញ្ញា ឆ្នាំ២០១២ ក៏ត្រូវប៉ូលិសចាប់ខ្លួនតែម្តង ។ជនសង្ស័យត្រូវបានបញ្ជូនទៅសាលាដំបូងខេត្ត នៅថ្ងៃទី៩ កញ្ញា ៕
ចែករំលែកព័តមាននេះ