រាជធានីភ្នំពេញ ៖ ក្រសួងទេសចរណ៍បានបង្ហាញតួលេខចុងក្រោយដោយបញ្ជាក់ថា សម្រាប់រយៈពេល៧ខែដើមឆ្នាំ២០១២នេះ ភ្ញៀវទេសចរអន្តរជាតិដែលមកទស្សនាប្រទេសកម្ពុជាមានការកើនឡើងប្រមាណ២៥,៦ភាគរយ បើប្រៀបធៀបរយៈពេលដូចគ្នានៃឆ្នាំ២០១១ ។
រាជធានីភ្នំពេញ ៖ ក្រសួងទេសចរណ៍បានបង្ហាញតួលេខចុងក្រោយដោយបញ្ជាក់ថា សម្រាប់រយៈពេល៧ខែដើមឆ្នាំ២០១២នេះ ភ្ញៀវទេសចរអន្តរជាតិដែលមកទស្សនាប្រទេសកម្ពុជាមានការកើនឡើងប្រមាណ២៥,៦ភាគរយ បើប្រៀបធៀបរយៈពេលដូចគ្នានៃឆ្នាំ២០១១ ។
តាមរបាយការណ៍ក្រសួងទេសចរណ៍រយៈពេល៧ខែដើមឆ្នាំ២០១២នេះ ភ្ញៀវអន្តរជាតិដែលមកទស្សនាកម្ពុជាមានចំនួន២.០៤០.៩៣៥ នាក់កើនឡើង២៥,៦ភាគរយ បើប្រៀបធៀបរយៈពេលដូចគ្នានៃឆ្នាំ២០១១ ក្នុងចំណោមនោះភ្ញៀវទេសចរដែលធ្វើដំណើរតាមផ្លូវអាកាសមានចំនួន៩៧៧.២៨៤នាក់ តាមផ្លូវគោកចំនួន១.០១៤.៤១៩នាក់ និងតាមផ្លូវទឹកចំនួន៤៩.២៣១នាក់ ។
លោកថោង ខុន រដ្ឋមន្ត្រីក្រសួងទេសចរណ៍ បានថ្លែងថា ទីផ្សារទេសចរណ៍សំខាន់ៗទាំង១០ដែលមានភ្ញៀវមកទស្សនាកម្ពុជារួមមានភ្ញៀវមកពីប្រទេសវៀតណាមចំនួន៤៥៣.៨៩៤នាក់ មកពីកូរ៉េចំនួន២៥៦.៣១៥នាក់ មកពីចិន ចំនួន១៧៩.២៥១នាក់ ឡាវចំនួន១២៧.២៩៧នាក់ ថៃចំនួន១០៥.៣៩៣នាក់ អាមេរិកចំនួន១០៣.៨១២នាក់ ជប៉ុនចំនួន៩៥.៨៧៧នាក់ បារាំងចំនួន៧០.៨៦៦នាក់ អូស្ត្រាលីចំនួន៦៧.២០២នាក់ និងអង់គ្លេសចំនួន៦៥.៨៧៣នាក់ ។ ចំនួនភ្ញៀវទេសចរមកពីបណ្តាប្រទេសទាំង១០នោះ គឺសុទ្ធតែមានចំនួនកើនឡើងបើប្រៀបធៀបរយៈពេលដូចគ្នានៃឆ្នាំ២០១១ ។
ទាក់ទងនឹងតំបន់ទេសចរណ៍ដែលអូសទាញភ្ញៀវមកទស្សនាកម្សាន្តនោះ លោករដ្ឋមន្ត្រីក្រសួងទេសចរណ៍បានលើកឡើងថា តំបន់អាទិភាពទាំង៥រួមមាន តំបន់សៀមរាបអង្គរ ទទួលបានភ្ញៀវទេសចរចំនួន១.២០២.១២១នាក់ ស្មើនឹង៥៨,៩ភាគរយ តំបន់ភ្នំពេញ ទទួលបានភ្ញៀវទេសចរចំនួន៨៣៨.៨១៣នាក់ កើនឡើង១៧ភាគរយ តំបន់ឆ្នេរទទួលបានភ្ញៀវទេសចរចំនួន១៦៥.៦២៨នាក់ កើនឡើង៤៩,៤ភាគរយ និងតំបន់អេកូទេសចរណ៍ភូមិភាគឦសានទទួលភ្ញៀវទេសចរចំនួន៣៤.០៥៨នាក់ កើនឡើង៩,៦ភាគរយ ។
ទោះជាយ៉ាងណាក៏ដោយ លោករដ្ឋមន្ត្រីបានបញ្ជាក់បន្ថែមថា សម្រាប់រយៈពេល៧ខែដើមឆ្នាំ២០១២នេះ ភ្ញៀវទេសចរកម្ពុជាដែលបានចេញទៅក្រៅប្រទេសមានចំនួន៤៥៥.០១៧នាក់ កើនឡើង២៧,៤ភាគរយ បើធៀបនឹងរយៈពេលដូចគ្នាឆ្នាំ២០១១ ៕
ចែករំលែកព័តមាននេះ