ខេត្តឧត្តរមានជ័យ ៖ ស្រ្តីម្នាក់ឈ្មោះប៉ុន ម៉ៅ អាយុ៥៣ឆ្នាំ ប្តីឈ្មោះសន ហួត អាយុ៥០ ឆ្នាំ និងមានកូនចំនួន៤នាក់់ បានផឹកថ្នាំពុលសម្លាប់សត្វល្អិតធ្វើអត្តឃាតកាលពីវេលាម៉ោង១១និង៣០នាទីព្រឹកថ្ងៃទី១០កញ្ញា បន្ទាប់ពីទទួលព័ត៌ មានថា កូនប្រុសរបស់គាត់ដែលបាត់ខ្លួនលើខ្នងភ្នំដងរែកឈ្មោះហួត ហាក់ អាយុ៣១ឆ្នាំ ត្រូវក្រុមទាហានសៀមបាញ់ស្លាប់កាលពីថ្ងៃទី ២ កញ្ញា កន្លងទៅ ។ ហេតុការណ៍នេះបានកើតឡើងនៅភូមិតាសើ ឃុំបាក់អន្លូង ស្រុកត្រពាំងប្រាសាទ។
ប្តីស្រ្តីរងគ្រោះបានរៀបរាប់ឱ្យដឹងថា ពួកគាត់ទាំងពីរនាក់ប្តីប្រពន្ធនេះមានស្រុកកំណើតនៅភូមិដូនពៅ ឃុំជយោ ស្រុកចំការលើ ខេត្តកំពង់ចាម ប៉ុន្តែដោយសារតែមានជីវភាពខ្វះខាតពេកក៏បានសុំអាជ្ញាធរមូលដ្ឋានធ្វើការផ្លាស់ប្តូរទីលំនៅមករស់នៅក្នុងភូមិតាសើ ឃុំបាក់អន្លូង ស្រុកត្រពាំងប្រាសាទចំនួន១០ឆ្នាំមកហើយ ។ ចំណែកកូនប្រុសរបស់គាត់ឈ្មោះហួត ហាក់ មានប្រពន្ធឈ្មោះប៉ែត ញ៉ អាយុ៣១ឆ្នាំ និងមានកូនចំនួន៤ នាក់ ហើយដោយសារតែជីវភាពខ្វះខាតពេកក៏បានសម្រេចចិត្តចេញពីផ្ទះទៅឡើងភ្នំដងរែកស៊ីឈ្នួលអូសឈើគ្រញូងឱ្យគេជាមួួយអ្នកភូមិជាច្រើននាក់ទៀត ។ នៅថ្ងៃទី ២ កញ្ញា ក្រុមទាហានសៀមបានបាញ់ប្រហារលើក្រុមអ្នកស៊ីឈ្នួលអូសឈើគ្រញូងជាច្រើនគ្រាប់បណ្តាលឱ្យស្លាប់និងរងរបួស ហើយកូនរបស់គាត់ត្រូវបានអ្នករត់រួចមកដល់ផ្ទះ និយាយប្រាប់ថា មិនដឹងជាស្លាប់ឬរស់ទេពីព្រោះរត់បែកគ្នា ។ លុះនៅ ថ្ងៃទី១០ កញ្ញា ២០១២ អ្នកភូមិដែលឡើងទៅលើខ្នងភ្នំដងរែកទៀតនោះបានប្រទះឃើញសពកូនប្រុសគាត់នៅក្នុងព្រៃហើមស្អុយរលួយទៅហើយនិងបានមកប្រាប់ពួកគាត់ជាឪពុកម្តាយ ។
ប្តីស្រ្តីរងគ្រោះបានបញ្ជាក់ថា ពេលទទួលដំណឹងថា កូនស្លាប់បែបនេះស្រាប់តែនៅព្រឹកថ្ងៃទី ១០ កញ្ញា នោះ ប្រពន្ធគាត់យកថ្នាំសម្លាប់សត្វល្អិតដែលទុកសម្រាប់បាញ់បន្លែមកផឹកដើម្បីសម្លាប់ខ្លួនដែលពេលនោះគាត់និងកូនឯទៀតពុំបាននៅផ្ទះទេ ។ បន្ទាប់ពីដឹងថាប្រពន្ធផឹកថ្នាំពុល គាត់ក៏បានដឹកយកទៅសង្គ្រោះនៅមន្ទីពេទ្យបង្អែកស្រុកអន្លង់វែងប៉ុន្តែនៅវេលាម៉ោង១និង ៣០នាទីរំលងអធ្រាត្រឈានចូលថ្ងៃទី ១១ កញ្ញា ក៏បានស្លាប់បាត់បង់ជីវិតទៅ ។ គ្រូពេទ្យបានប្រាប់ថា ដោយសារតែស្ថានភាពអ្នកជំងឺនេះផឹកថ្នាំពុលច្រើនហើយមានការយឺតយ៉ាវក្នុងការនាំមកមន្ទីរពេទ្យទើបមិនអាចជួយសង្គ្រោះបាន ៕
ចែករំលែកព័តមាននេះ