ខេត្តព្រះសីហនុ ៖ ស្ត្រីវ័យកណ្តាលម្នាក់ដែលទើបចេញពីពន្ធនាគារ បានធ្វើអត្តឃាតដោយយកក្រមាពណ៌សចងកធ្វើអត្តឃាតខ្លួននៅក្នុងផ្ទះជួលមួយកន្លែងស្ថិតក្នុងក្រុមទី២ ភូមិ៤ សង្កាត់លេខ៤ ក្រុងព្រះសីហនុ កាលពីវេលាម៉ោង១១និង៣០នាទីយប់ថ្ងៃទី១០ កញ្ញា ។
តាមការឱ្យដឹងពីសមត្ថកិច្ចប៉ូលិសសង្កាត់លេខ៤ បានឱ្យដឹងថា ស្ត្រីរូបនេះឈ្មោះណុត សោភ័ណ អាយុ៣២ឆ្នាំ មានស្រុកកំណើតនៅខេត្តតាកែវ បច្ចុប្បន្នស្នាក់នៅក្រុមទី២ ភូមិ៤ សង្កាត់លេខ៤ ក្រុងព្រះសីហនុ ខេត្តព្រះសីហនុ មានមុខរបរជាស្ត្រីបំរើការនៅអាហារដ្ឋានខារ៉ាអូខេ យីយោ រស្មីធីណា ដែលមានទីតាំងស្ថិតនៅក្បែរកន្លែងកើតហេតុ ។ តាមការសន្និដ្ឋានស្ត្រីរូបនេះ ធ្វើអត្តឃាតនៅចន្លោះម៉ោង៩ ដល់ម៉ោង១១យប់ ។
ប្រភពដដែលបានបន្តថាស្ត្រីរូបនេះ គឺទើបតែចេញពីពន្ធនាគារខេត្ត កាលពីថ្ងៃទី២៣ សីហាដោយលិខិតដោះលែងលេខ១៨៤ ពត.ខសន១២ របស់លោកសំ សុផល ប្រធានពន្ធនាគារខេត្តព្រះសីហនុ បន្ទាប់ពីបានជាប់ពន្ធនាគាររយៈពេល២ឆ្នាំ៦ខែ ក្នុងបទល្មើសជួញដូរគ្រឿងញៀន ។
យោងតាមស្ត្រីជាម្តាយឈ្មោះយ៉ក់ ពិសី អាយុ៦០ឆ្នាំ បានឱ្យដឹងថា គាត់ដឹងថាកូនស្រីរបស់គាត់មិនមានបំណងចង់សម្លាប់ខ្លួនទេ បន្ទាប់ពីកូនស្រីរបស់គាត់ចេញពីពន្ធនាគារមកកូនស្រីគាត់បានធ្វើការនៅហាងខារ៉ាអូខេវិញដោយពុំមានបញ្ហាអ្វី បើទោះបីជាប្តីរបស់នាងបានយកប្រពន្ធថ្មីខណៈពេលកូនស្រីរបស់គាត់ជាប់ពន្ធនាគារយ៉ាងណាក៏ដោយ ។ អ៊ុំស្រីបានបន្តទៀតថា ជារៀងរាល់ថ្ងៃកូនស្រីគាត់បានចេញទៅធ្វើការពីម៉ោង៦ល្ងាច និងត្រឡប់មកវិញនៅម៉ោងប្រមាណ១២យប់ ប៉ុន្តែនៅយប់កើតហេតុ កូនស្រីរបស់គាត់ ត្រឡប់មកផ្ទះវិញនៅម៉ោងប្រហែល៨យប់ ដោយពុំមាននិយាយស្តីអ្វីឡើយ ហើយក៏បានដើរចូលក្នុងបន្ទប់បាត់រហូត ។ លុះដល់ម៉ោងប្រមាណ១១យប់ខណៈពេលដែលគាត់ដើរទៅបត់ជើងតូចក៏បានឃើញកូនគាត់ចងកសម្លាប់ខ្លួនទៅហើយ ។
សពស្ត្រីជាកូនត្រូវបានជាម្តាយធ្វើបុណ្យតាមប្រពៃណី ដោយមានអ្នកចូលរួមច្រើនកុះករហើយមូលហេតុពិតប្រាកដបែបណានោះ មិនត្រូវបានដឹងនោះឡើយ ៕
ចែករំលែកព័តមាននេះ