រាជធានីភ្នំពេញ ៖ នៅវិមានរដ្ឋសភានៃព្រះរាជាណាចក្រកម្ពុជាមានប្រារព្ធសិក្ខាសាលាមួយស្តីពី«វិធានការដើម្បីកាត់បន្ថយការប្រើប្រាស់គ្រឿងស្រវឹង» ដែលធ្វើឡើងក្រោមអធិបតីភាពលោកជំទាវហូ ណូន ប្រធានគណៈកម្មការសុខាភិបាល សង្គមកិច្ច អតីតយុទ្ធជន យុវនីតិសម្បទា ការងារបណ្តុះបណ្តាលវិជ្ជាជីវៈ និងកិច្ចការនារី លោកអេសចន ហមបឺក នាយកប្រតិបត្តិអង្គការអាយអូជីធី អិុនធីអូមូវមែន នៃប្រទេសស៊ុយអ៊ែត ព្រមទាំងមានការចូលរួមពីភ្ញៀវជាតិ និងអន្តរជាតិជាច្រើននាក់ ។ សិក្ខាសាលានេះធ្វើឡើងរយៈពេល២ថ្ងៃ គឺនៅថ្ងៃទី១០និង១១កញ្ញា ។
លោកជំទាវហូ ណូន បានមានប្រសាសន៍ថា បញ្ហាគ្រឿងស្រវឹងមិនមែនកើតមានតែនៅប្រទេសកម្ពុជានោះទេ ប៉ុន្តែវាក៏ជាបញ្ហាដ៏ចម្បងដែលកើតមាននៅក្នុងបណ្តាប្រទេសនានាជាច្រើននៅលើសាកលលោកផងដែរ ។ លោកជំទាវបានបន្តថា នាពេលបច្ចុប្បន្នបញ្ហានេះបាននិងកំពុងបង្កឱ្យមានផលវិបាក និងផលប៉ះពាល់ចម្បងជាច្រើនដល់សុខភាព អាយុជីវិតគ្រួសារ សង្គម សេដ្ឋកិច្ច និងប្រទេសជាតិទាំងមូល ដែលក្នុងនោះមានជាអាទិ៍ជំងឺធ្ងន់ធ្ងរ ទាំងជំងឺឆ្លង និងមិនឆ្លង អត្រាស្លាប់ដោយគ្រោះថ្នាក់ចរាចរណ៍ខ្ពស់ ពិការភាព បាត់បង់ការងារ ផលិតភាពការងារមិនពេញលេញ ភាពក្រីក្រ បង្កឱ្យមានបទល្មើស ជាពិសេសអំពើហិង្សាក្នុងគ្រួសារ អំពើចាប់រំលោភសេពសន្ថវៈ ភាពអសន្តិសុខនានានៅក្នុងសហគមន៍ និងសង្គមជាតិទាំងមូល ។
យោងតាមរបាយការណ៍អង្គការសុខភាពពិភពលោកឆ្នាំ២០០៧ បានបង្ហាញថា អ្នកប្រើប្រាស់គ្រឿងស្រវឹងនៅលើពិភពលោកមានចំនួនប្រមាណ២.០០០លាននាក់ ។ គ្រឿងស្រវឹងបានបង្កឱ្យមានមនុស្សស្លាប់ប្រមាណ៣,៧% និងកើតមានជំងឺប្រចាំកាយប្រហែល៤,៤% ចំពោះអ្នកស្លាប់នៅគ្រប់អាយុទាំងអស់រួមមាន៦,១% និងស្ត្រី១,១% ។
លោកជំទាវបានបន្ថែមថា ការប្រើប្រាស់គ្រឿងស្រវឹងក្នុងចំណោមយុវជន ជាបច្ច័យដ៏អាក្រក់មួយដែលធ្វើឱ្យប៉ះពាល់ជាចម្បងដល់ការអភិវឌ្ឍលើគ្រប់វិស័យរបស់ប្រទេសជាតិ ពីព្រោះយុវជនគឺជាទំពាំងស្នងប្ញស្សី ជាសសរទ្រូងរឹងមាំ ជាធនធានមនុស្សដ៏សំខាន់ ជាកម្លាំងពលកម្មស្នូល ដែលមិនអាចខ្វះបានរបស់ប្រទេសជាតិ ។ ជាក់ស្តែងសម្រាប់កម្ពុជា យុវជនកំពុងដើរតួនាទីយ៉ាងសំខាន់នៅក្នុងសង្គម ពិសេសក្រុមយុវជនស្ម័គ្រចិត្តរបស់សម្តេចអគ្គមហាសេនាបតីេតជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ដែលបានរួមចំណែកយ៉ាងសកម្មក្នុងកិច្ចអភិវឌ្ឍប្រទេសជាតិ ដោយបានសហការជាមួយអាជ្ញាធរមូលដ្ឋានពាក់ព័ន្ធ ចុះបំពេញបេសកកម្មវាស់វែងដីធ្លី និងផ្តល់ប័ណ្ណកម្មសិទ្ធិស្របច្បាប់ជូនប្រជាពលរដ្ឋគ្រប់ខេត្ត-ក្រុងនៅទូទាំងប្រទេស ។
លោកជំទាវបានបន្ថែមទៀតថា បញ្ហាគ្រឿងស្រវឹងមិនត្រឹមតែជាបញ្ហាកង្វល់របស់ប្រទេសកម្ពុជាមួយនោះទេ ប៉ុន្តែវាក៏ជាបញ្ហាកង្វល់រួមរបស់សាកលលោកផងដែរ ហើយក្នុងនោះដើម្បីឆ្លើយតបចំពោះបញ្ហានេះជាបន្ទាន់ អង្គការសុខភាពពិភពលោកបានដាក់េចញនូវយុទ្ធសាស្ត្រសាកលមួយសំដៅកាត់បន្ថយគ្រោះថ្នាក់ដែលបណ្តាលមកពីការប្រើប្រាស់គ្រឿងស្រវឹង តាមរយៈសេចក្តីសម្រេចលេខ១២៦.R១១ ក្នុងនោះយុទ្ធសាស្ត្រសាកលបានដាក់បញ្ចូលអំពីការស្នើសុំយ៉ាងទទូចដល់រដ្ឋជាសមាជិកឱ្យបង្កើតនូវឆន្ទៈនយោបាយ រួមនឹងការកៀងគរធនធានហិរញ្ញវត្ថុ ដើម្បីជួយបំពេញបន្ថែម និងគាំទ្រទៅលើគោលនយោបាយសុខភាពសាធារណៈ ។
ដោយឡែក នៅប្រទេសកម្ពុជា ដើម្បីឆ្លើយតបចំពោះបញ្ហានៃការប្រើប្រាស់គ្រឿងស្រវឹងខាងលើនេះ សភាកម្ពុជាបានអនុម័តច្បាប់ពាក់ព័ន្ធក្នុងគោលបំណងទប់ស្កាត់ និងកាត់បន្ថយការប្រើប្រាស់គ្រឿងស្រវឹងនេះដែរ ៕
ចែករំលែកព័តមាននេះ