ខេត្តស្វាយរៀង ៖ មានរឿងហួសចិត្តមួយបានកើតឡើងផ្អើលអ្នកស្រុកទាំងយប់ ដោយស្ត្រី២នាក់បងប្អូនបង្កើតវាយតប់គ្នារហូតសន្លប់ទាំង២នាក់ បណ្តាលមកពីការរកសីុហ៊ុនគ្នាហើយមិនទុកចិត្តគ្នា ដោយប្អូនស្រីចោទថាបងស្រីកេងប្រាក់យកម្នាក់ឯង ក៏កើតជម្លោះឡើង ។ ហេតុការណ៍នេះបានកើតឡើង កាលពីថ្ងៃទី៧ កញ្ញា វេលាម៉ោង៧និង៣០នាទីយប់ នៅភូមិព្រៃឈើទាល ឃុំអង្គតាសូ ស្រុកស្វាយជ្រំ ។
បើតាមប្តីរបស់ស្ត្រីជាបងឱ្យដឹងថា ប្រពន្ធរបស់គាត់ឈ្មោះស៊ុក ស្រី អាយុ៤០ឆ្នាំ បានយកប្រាក់ចូលហ៊ុនគ្នាជាមួយប្អូនស្រីទិញរថយន្ត១គ្រឿងម៉ាកសាំយ៉ុង តម្លៃ៧.០០០ដុល្លារ ដើម្បីរត់តាក់សីុដឹកអ្នកដំណើរពីផ្សារដូនស ឃុំដូនស ស្រុកស្វាយជ្រំ ទៅចំណតផ្សារអូឡាំពិក រាជធានីភ្នំពេញ ។ នៅក្នុងការរត់តាក់សីុនេះ គឺឈ្មោះប៊ូ រក្សា ភេទប្រុស អាយុ៣៤ឆ្នាំ ជាប្តីរបស់ឈ្មោះស៊ុក ទន់ អាយុ៣០ឆ្នាំ ត្រូវជាប្អូនស្រីជាអ្នកបើកបរ ដោយឱ្យប្រពន្ធគាត់ស៊ុក ស្រី ធ្វើជាព្រូចាំយកលុយពីអ្នកជិះ ។ ការរកសីុកាក់កបបានចំនួនតែ៧ខែ ស្រាប់តែប្រមាណមួយខែចុងក្រោយនេះរកសីុមិនសូវរួចថ្លៃសាំង រួចថ្លៃចំណត សាឡាង ជួនខាតថ្លៃប្រេង ជួនក៏បានប្រាក់ចំណេញពីចាយវាយតិចតួច ។
បុរសជាប្តីរូបនេះ រៀបរាប់ទៀតថា នៅយប់ថ្ងៃកើតហេតុ ពេលត្រឡប់មកពីរត់វិញក៏រាប់លុយ ស្រាប់តែអ្នកបើកបរឈ្មោះប៊ូ រក្សា កើតការសង្ស័យនិងចោទបងថ្លៃស្រីថាលួចកិបកេងលុយ ព្រោះឃើញមានម៉ូយជិះទៅមកពេញរថយន្ត គឺ១៥ទៅ១៨នាក់ ហើយក្នុងម្នាក់ៗតម្លៃ១.៥០០០រៀល ពេលកាត់ថ្លៃសាំង ថ្លៃអ្នកចាប់ម៉ូយ ថ្លៃចំណត និងថ្លៃឆ្លងសាឡាង ថ្លៃបាយហើយ គួរសល់ចំណេញច្រើន តែពេលរាប់ប្រាក់ទៅសល់ជាក់ស្តែងតិចក៏សួរនាំរហូតឈ្លោះប្រកែកគ្នាចោទថា បងថ្លៃកិបកេងប្រាក់មិនស្មោះត្រង់ ។ ប៉ុន្តែស្ត្រីជាបងថ្លៃនិយាយថា ឃើញជិះច្រើនមែនតែអ្នកខ្លះឱ្យតែ១ម៉ឺនរៀលទេ អ្នកខ្លះនៅស្រុកជាមួយគ្នាឱ្យ១ម៉ឺនរៀល ហើយសុំជំពាក់សិន ដោយមិនសូវមានម៉ូយដណ្តើមគ្នាក៏ដាក់តម្លៃ១ម៉ឺនរៀល ឯគាត់ក៏ដាក់តម្លៃ១ម៉ឺនរៀលដូចគ្នា មិនបានតម្លៃ១.៥០០០រៀលទេ ។
ពេលនោះប្អូនស្រីឈ្មោះស៊ុក ទន់ កាន់ជើងប្តីក៏ឆ្លើយថា ពិតជាមានការកិបកេងលុយ ប្តីជាអ្នកបើករថយន្តមានភ្នែកមើលរាប់មនុស្សជិះ និងតម្លៃរថយន្តដែរ ទើបឈ្លោះគ្នា ហើយនាងស៊ុក ទន់ បានស្ទុះដាល់បងស្រីត្រូវពោះ២-៣ដៃ និងដើមទ្រូង២-៣ដៃ ក៏កើតមានការប្រវាយប្រតប់គ្នាដូចកីឡាកាស ។
ស្រ្តីជាប្អូនក្មេងជាង និងមានមាឌមាំជាង ក៏ចាប់បងស្រីបោកក្បាលទៅនឹងជញ្ជាំងរថយន្ត រហូតបែកក្បាលហូរឈាមពេញផ្ទៃមុខ តែការប្រវាយប្រតប់នេះ បណ្តាលឱ្យដួលសន្លប់ទាំងពីនាក់នៅក្បែររថយន្ត ទើបបុរសជាប្តី និងអ្នកជិតខាងមកជួយ រួចលើកដាក់លើរថយន្តទាំងពីរនាក់បងប្អូនដឹកមកកាន់មន្ទីរពេទ្យខេត្ត ដើម្បីសង្គ្រោះ ។
ពេលមកដល់មន្ទីរពេទ្យគ្រូពេទ្យដាក់ឱ្យដេកគ្រែក្បែរគ្នា លុះងើបពីសន្លប់ឈ្លោះប្រកែកគ្នាទៀត ដោយប្រកាសឈប់រកសីុហ៊ុនជាមួយគ្នាទៀត ហើយលក់រថយន្តចែកដើមគ្នា ឬអ្នកណាមានលុយចេញយកទៅ ឯម្នាក់ទៀតឆ្លើយថា បើមានលុយមិនចូលហ៊ុនជាមួយទេ ។ ពាក្យចាស់លោកនិយាយថា បើបងប្អូនស្រឡាញ់គ្នា កុំធ្វើស្រែប្រវាស់ កុំសង់ផ្ទះជាប់គ្នា ហើយបើនិយាយតាមមួយបែបទៀត គឺការចូលហ៊ុនរកសីុច្រើនតែ«ហ៊ុនចូលខ្យល់»យកល្អ គប្បីរកសីុតាមលទ្ធភាពរបស់ខ្លួនវិញទើបប្រសើរ ៕
ចែករំលែកព័តមាននេះ