ខេត្តក្រចេះ ៖ មនុស្ស២នាក់បានរងរបួសធ្ងន់ត្រូវបានដឹកបញ្ជូនទៅសង្គ្រោះបន្ទាន់នៅមន្ទីរពេទ្យព្រះកុសុមៈ រាជធានីភ្នំពេញ ដោយសារផ្ទុះកំប៉ុងហ្គាសកាលពីវេលាម៉ោង១១និង៣០នាទីព្រឹកថ្ងៃទី២៨ សីហា ២០១២ ស្ថិតក្នុងភូមិក្បាលស្នួល ឃុំក្បាលស្នួល ស្រុកស្នួល ។
ជនរងគ្រោះទាំង២នាក់ម្នាក់ឈ្មោះសូ មឿន អាយុ៤១ឆ្នាំ ភេទប្រុស មានស្រុកកំណើតស្រុកក្រូចឆ្មារ ខេត្តកំពង់ចាម បានមកស៊ីឈ្នួលធ្វើចម្ការឱ្យគេនៅភូមិខាងលើ និងម្នាក់ទៀតឈ្មោះជន ឆេងលាង ភេទស្រី អាយុ២៨ឆ្នាំ មានទីលំនៅផ្សារជីហែ ក្នុងស្រុកកោះសូទិន ខេត្តកំពង់ចាម ត្រូវជាមិត្តភក្តិ និងស៊ីឈ្នួលធ្វើចម្ការឱ្យគេដូចគ្នា ។ អ្នកទាំងពីរនាក់រងរបួសធ្ងន់ដូចគ្នា ដោយរលាករោលពេញផ្ទៃមុខ និងដងខ្លួន ។ ប្រភពព័ត៌មានឱ្យដឹងថា មុនពេលកើតហេតុឈ្មោះសូ មឿន បានបើកចង្ក្រានហ្គាសដាំឆ្នាំងស៊ុប និងនារីជាមិត្តភក្តិអង្គុយចិតបន្លែ ខណៈនោះស្រាប់តែឃើញកំប៉ុងហ្គាស៦កំប៉ុងនៅក្បែរនោះមាន១កំប៉ុងធ្លាយលើកយកមកមើលក៏ឆាបឆេះអស់៤កំប៉ុងជាបន្តបន្ទាប់ អណ្តាតភ្លើងយ៉ាងសន្ធោសន្ធៅពេញបន្ទប់ បណ្តាលឱ្យរងរបួសតែម្តង តែសំណាងល្អពុំបង្កឱ្យមានអគ្គិភ័យឆេះផ្ទះនោះទេ ។
ព័ត៌មានលំអិតនឹងផ្សាយជូននៅពេលក្រោយ នៅលើទំព័រកាសែតកោះសន្តិភាព និងនៅតាមវិទ្យុសំឡេងកោះសន្តិភាព FM 87.75 រាជធានីភ្នំពេញ, FM 87.5 ខេត្តបាត់ដំបង៕
ចែករំលែកព័តមាននេះ