រាជធានីភ្នំពេញ ៖ ចៅក្រមស៊ើបសួរសាលាដំបូងរាជធានី លោកលាង សំណាត់ បានចេញដីកាសម្រេចឱ្យនៅក្រៅឃុំបណ្តោះអាសន្នមន្ត្រីក្រសួងរៀបចំដែនដី នគរូបនីយកម្ម និងសំណង់ ចំនួន៤នាក់ដែលជាប់ឃុំនៅពន្ធនាគារព្រៃស ក្រោមការចោទប្រកាន់ពីបទពុករលួយ ពាក់ព័ន្ធនឹងការកិបកេងថវិការដ្ឋជិត២លានដុល្លារអាមេរិកដែលជាទឹកប្រាក់ក្នុងគម្រោងផ្តល់ដីសម្បទានសង្គមកិច្ចសាងសង់លំនៅឋានជូនអតីតយុទ្ធជន និងជនក្រីក្រ មកធ្វើជាប្រយោជន៍ផ្ទាល់ខ្លួន ។
ចៅក្រមស៊ើបសួរសាលាដំបូងរាជធានីភ្នំពេញ សម្រេចឱ្យនៅក្រៅឃុំបណ្តោះអាសន្ននេះ កាលពីព្រឹកថ្ងៃទី១៤ សីហា តែក៏បានដាក់ឱ្យស្ថិតក្រោមការត្រួតពិនិត្យតាមផ្លូវតុលាការ ។ ចំពោះការសម្រេចដោះលែងឱ្យនៅក្រៅឃុំនេះ បើតាមប្រភពពីក្រុមមេធាវីការពារក្តីឱ្យដឹងថា បន្ទាប់ពីដាក់ពាក្យជាបន្តបន្តាប់ឱ្យកូនក្តីរបស់ខ្លួនបាននៅក្រៅឃុំបណ្តោះអាសន្នកាលពីថ្ងៃទី១០ និងថ្ងៃទី១៣ សីហា កន្លងទៅ។
រឿងអាស្រូវពុករលួយមួយនេះ បានកើតឡើងគួរឱ្យភ្ញាក់ផ្អើលសម្រាប់មន្ត្រីរាជការទូទៅ។ មន្ត្រីទាំង៤នាក់បានជាប់ចោទកិបកេងថវិការដ្ឋក្នុងគម្រោងប្រគល់ដីសម្បទានសង្គមកិច្ចនិងសាងសង់លំនៅឋានសម្រាប់អតីតយុទ្ធជនប្រចាំឆ្នាំ២០១១ ដែលមានទឹកប្រាក់រាប់សិបពាន់លានរៀល ហើយការអនុវត្តជាក់ស្តែងត្រូវបានមន្ត្រីមួយចំនួនឃុបឃិតគ្នាកេងប្រវ័ញ្ច ដែលការឃុបឃិតគ្នានេះត្រូវបានមជ្ឈដ្ឋានអ្នកតាមដាននានាមើលឃើញថាគឺដូចជាសម្លកំពិស ។
ឆ្លងតាមការត្រួតពិនិត្យនិងស្រាវជ្រាវរបស់អង្គភាពប្រឆាំងអំពើពុករលួយ បានកំណត់អត្តសញ្ញាណអ្នកជាប់ពាក់ព័ន្ធនឹងករណីនេះ រួចសុំគោលការណ៍ពីតុលាការឃាត់ខ្លួនពួកគេយកមកសាកសួរដើម្បីរកខ្សែរយៈជាបន្តទៀត។មន្ត្រីទាំង៤នាក់នេះមាន
១-លោកសារ៉េត បូរ៉ាមី អគ្គនាយករងក្រសួងរៀបចំដែនដីនគរូបនីយកម្ម និងសំណង់។
២-លោកផូរ វុឌ្ឍី ប្រធាននាយកដ្ឋានផែនការសេដ្ឋកិច្ចហិរញ្ញវត្ថុ ។
៣-លោកមាស ឥស្សរ៉ា អនុប្រធាននាយកដ្ឋាន ។
៤-លោកទុយ ឡាយរិទ្ធី មន្ត្រីបម្រើការនៅក្រសួងរៀបចំដែនដីនគរូបនីយកម្ម និងសំណង់ ។
មន្ត្រីទាំង៤នាក់បានត្រូវលោកសុខ រឿន ព្រះរាជអាជ្ញារងអមសាលាដំបូងរាជធានីភ្នំពេញ សម្រេចចោទប្រកាន់ពីបទពុករលួយ រួចត្រូវចៅក្រមស៊ើបសួរសម្រេចឃុំខ្លួនកាលពីរសៀលថ្ងៃទី៩ ខែសីហា កន្លងមក ។
នៅថ្ងៃទី១០ ខែសីហា ក្រសួងរៀបចំដែនដី នគរូបនីយកម្ម និងសំណង់ បានចេញសេចក្តីប្រកាសព័ត៌មានជាសាធារណៈថា «ក្រោយពីបានទទួលព័ត៌មានអំពីភាពមិនប្រក្រតីស្តីពីការអនុវត្តគម្រោងសម្បទានដីសង្គមកិច្ចសម្រាប់អតីតកងកម្លាំងប្រដាប់អាវុធ និងគ្រួសារដែលបានចុះផ្សាយនៅលើទំព័រសារព័ត៌មានខ្លះ ក្រសួងបានបង្កើតគណៈកម្មការមួយឱ្យចុះទៅពិនិត្យស្ថានភាពលទ្ធផលសម្រេចជាក់ស្តែងនៅខេត្តអនុវត្តគម្រោងមួយចំនួន ។ ផ្អែកលើលទ្ធផលនៃការត្រួតពិនិត្យបឋមនេះ ក្រសួងបានព្យួរការងារលោកផូរ វុឌ្ឍី ប្រធាននាយកដ្ឋានផែនការ សេដ្ឋកិច្ច និងហិរញ្ញកិច្ចរបស់ក្រសួងនៅថ្ងៃទី១៩ ខែមិថុនា ឆ្នាំ២០១២ ដើម្បីឱ្យគណៈកម្មការសវនកម្មរបស់ក្រសួងធ្វើអធិការកិច្ចដោយមានកិច្ចសហការជាមួយអង្គភាពប្រឆាំងអំពើពុករលួយ ។ ជាលទ្ធផល មកដល់ពេលនេះមន្ត្រីរបស់ក្រសួងចំនួន៤រូបដែលជាប់ពាក់ព័ន្ធនឹងការសង្ស័យ បានត្រូវអង្គភាពប្រឆាំងអំពើពុករលួយបញ្ជូនទៅតុលាការដើម្បីបន្តការស្រាវជ្រាវនិងសម្រេចតាមនីតិវិធីច្បាប់ ៕
ចែករំលែកព័តមាននេះ