ខេត្តបន្ទាយមានជ័យ ៖ ពស់វែកចម្រុះមានទម្ងន់ប្រហែល៣០គីឡូក្រាម ត្រូវបានអ្នកបើកបររថយន្តក្រុមហ៊ុនដឹកជញ្ជូនប៉ារ៉ាម៉ោនអង្គរ ប្រគល់ឲ្យសមត្ថកិច្ចរដ្ឋបាលព្រៃឈើខេត្ត កាលពីវេលាម៉ោង១១និង៣០នាទីព្រឹកថ្ងៃទី១១ សីហា នៅស្នាក់សាខាក្រុមហ៊ុនស្ថិតនៅទល់មុខមន្ទីរប្រៃសណីយ៍ខេត្ត បន្ទាប់ពីអ្នកបើកបរសង្ស័យ ហើយធ្វើការឆែកឆេរដឹងថា ក្នុងឡាំងដាក់អីវ៉ាន់គេបង្កប់ដាក់សត្វពស់ ។
បើតាមអ្នកបើកបររថយន្តឲ្យដឹងថា កាលពីព្រឹកព្រលឹមថ្ងៃទី១១ សីហា រថយន្តបានដឹកអ្នកដំណើរចេញពីសាខាក្រុមហ៊ុនស្រុកចុងកាល់ ខេត្តឧត្តរមានជ័យ ហើយមានបុរសម្នាក់អាយុប្រហែល៣០ឆ្នាំ យកអីវ៉ាន់មកផ្ញើទៅក្រុងសិរីសោភ័ណ និងប្រាប់ថា រូបគេទៅមុនចាំជិះរថយន្តនៅឯស្រុកស្រីស្នំ ខេត្តសៀមរាប ។ លុះរថយន្តចេញដំណើរមកដល់ស្រុកស្រីស្នំ មិនឃើញបុរសម្ចាស់អីវ៉ាន់ រថយន្តក៏បានចេញចោលហើយក្រោយពីរថយន្តចេញដំណើរបានមួយសន្ទុះធំ បុរសម្ចាស់អីវ៉ាន់ក៏បានទូរស័ព្ទមករូបគាត់ជាអ្នកបើកបរថា ហេតុអីចេញចោលគេ ឯគាត់ក៏ប្រាប់ទៅវិញថា ចាំជិះរថយន្តជើងទី២វិញទៅ ។
ប្រភពព័ត៌មានដដែលបានឲ្យដឹងទៀតថា ពេលរថយន្តធ្វើដំណើរមកដល់សាខាក្រុងសិរីសោភ័ណ ដើម្បីឲ្យភ្ញៀវចុះ អ្នកបើកបររថយន្តក៏រើអីវ៉ាន់ចុះ ខណៈនោះមានការសង្ស័យឡាំង ក្រដាសដាក់អីវ៉ាន់ដែលបុរសនោះផ្ញើទើបធ្វើការឆែកឆេរមើលស្រាប់តែឃើញនៅក្នុងឡាំងនោះមានសុទ្ធតែសត្វពស់វែកចម្រុះ ។ ដោយខ្លាចក្រែងមានបញ្ហាពាក់ព័ន្ធទៅនឹងផ្លូវច្បាប់ ទើបអ្នកបើកបររថយន្តរាយការណ៍ទៅសមត្ថកិច្ចជំនាញនិងហៅអ្នកសារព័ត៌មានទៅថតយករូបភាពនិងជួយដឹងឮក្នុងករណីនេះពេលប្រគល់ឱ្យមន្ត្រីជំនាញយកទៅចាត់ចែង ។
ប្រភពព័ត៌មានដដែលបានឲ្យដឹងទៀតថា ទំនងជារឿងនេះបែកការណ៍ដល់បុរសម្ចាស់អីវ៉ាន់ ទើបពេលគេជិះរថយន្តជើងទី២មកដល់ស្រុកព្រះនេត្រព្រះ ស្រាប់តែចុះពីរថយន្តទៅបាត់ ។ បន្ទាប់មកបុរសនោះបានទូរស័ព្ទគំរាមអ្នកបើកបររថយន្តកុំឲ្យរាយការណ៍ប្រាប់សមត្ថកិច្ចចាំគេសម្រួលឲ្យលុយខ្លះ ដោយនិយាយថា ប្រសិនបើអ្នកឯងហ៊ានរាយការណ៍ប្រាប់សមត្ថកិច្ចប្រយ័ត្នថ្ងៃក្រោយមានរឿងជាមួយគេ ៕
ចែករំលែកព័តមាននេះ