តើអាចជឿទេថា ស្ត្រីមេផ្ទះវ័យ៤១ឆ្នាំ និងមានកូនដល់ទៅពីរនាក់ហើយនោះ នៅតែរក្សាបាននូវសម្រស់ស្រស់ស្អាតដូចនារីទើបធំពេញវ័យអ៊ីចឹង ។ មិនត្រឹមតែប៉ុណ្ណោះ នាងកំពុងក្លាយជានារីល្បីឈ្មោះតាមអ៊ីនធើរណេតទៀតផង ។
យោងតាមប្រភពគេហទំព័រឆាយណាប៊ើស ចេញផ្សាយថ្ងៃទី១ សីហា ឆ្នាំ២០១២ បានឱ្យដឹងថា ស្ត្រីមេផ្ទះឈ្មោះ Zhang Tingxuan រស់នៅកោះតៃវ៉ាន់ បានក្លាយជានារីល្បីឈ្មោះតាមអ៊ីនធើរណេត បន្ទាប់ពីរូបថតរបស់នាងមួយចំនួនត្រូវបានគេហទំព័រចិនចុះផ្សាយ ។
ប្រភពបន្តថា អ្វីដែលគួរឱ្យអស្ចារ្យជាងនេះគឺនាងមានកូន២នាក់ទៅហើយ តែរូបសម្រស់របស់នាងនៅតែស្អាតគួរឱ្យចង់គយគន់ ដែលមើលទៅលក្ខណសម្បត្តិរបស់នាងខាងក្រៅ ហាក់ដូចជាទើបមានអាយុ២០ឆ្នាំអីុចឹង ។ ទន្ទឹមនឹងនេះ នាងត្រូវបានគេប្រៀបធៀបជាមួយតារាម៉ូដែលជនជាតិជប៉ុនឈ្មោះMasako Mizutani អាយុ៤៤ឆ្នាំ និងមានកូនស្រីអាយុ២០ឆ្នាំម្នាក់ តែនាងអាចថែរក្សាសម្រស់របស់នាងប្រហាក់ប្រហែលនឹងវ័យកូនរបស់នាងដែរ ។ ដោយសារកាយសម្បទាមាំមួន និងរូបសម្រស់ដ៏មានមន្តស្នេហ៍គួរឱ្យទាក់ទាញបែបនេះ នាង Zhang Tingxuan ត្រូវបានអ្នកប្រើប្រាស់អីុនធើរណេតដាក់រហ្សនាមឱ្យថា ទេពធីតាប្រចាំក្លឹបហាត់ប្រាណ «Gym Goddess »។
ប្រភពបន្តឱ្យដឹងទៀតថា នៅពេលជួបសម្ភាសន៍ជាមួយអ្នកសារព័ត៌មាន នាង Zhang Tingxuan និយាយថា នាងគ្រាន់តែជាស្ត្រីមេផ្ទះមួយរូបប៉ុណ្ណោះ ហើយវិធីសាស្ត្រសំខាន់ក្នុងការថែរក្សាសម្រស់ឱ្យនៅក្មេងជាងវ័យ និងរាងស្រលូននោះ គឺហាត់ប្រាណជាប្រចាំ និងបរិភោគផ្លែឈើរៀងរាល់ថ្ងៃ ។
បណ្តាញព័ត៌មានក្នុងស្រុកដែលបានសម្ភាសន៍ជាមួយនាងបានកោតសរសើរយ៉ាងស្មោះថា នាង Zhang Tingxuan ពិតជាមានសាច់ស្អាត ក្មេងជាងវ័យ និងមានកាយសម្បទាមាំមួនពិតប្រាកដមែន ៕
ចែករំលែកព័តមាននេះ